قصيدة السواد للجهيلي في حرب الجوف

**الهضباوي** · 23-10-2002 00:10

هذه قصيدة حشم الجهيلي عندما اراد اثارة شيوخ شمر بامر من عبدالله ابن طلال الرشيدعندما كان ابو خشم محاصر من قبل ابن شعلان خمسة شهور حيث كانوا زعلانين على ابو خشم فذهب الامير عبدالله والشاعر الجهيلي من شيخ الى شيخ حيث ربطوا المشايخ فزعتهم بفزعة ضاري

ياللــــه ياللي للمخاليــــق حساب ............... يالي على كل القبايل نظيري
ياللي لنار الحــــرب بالجوف شباب............... عليك من ركضة سعود خطيري
سعود ورد للجوف من عقب مزهاب ..............وانتم عن الجوبه شمال صديري
ماتشوف منصــور تقل وجــه نداب .............من الضيم ينخا شمر والاميري
يقول وين اللي يجـــــزون الاصعاب ............اللي على حياض المنايا خميري
صيحو لنــا وانخو طويلين الاطناب .............. ديهم على هل الجبل يستديري
الله يسود وجــــه شمر والاقراب............... سواد اسود من سواد الشحيري
وش نومكم وسعود يرمى بالاطواب ............ والضيــم ما تصبر عليه الحميري
ياما زعجنا يمــكم جيش وركــاب ...............ومن عندكم نتنا المدد والبشيري
كسابة الناموس عنهاالسعدغاب .............من يمنا لقــــــوا عذارن كثيـــــري
واليوم يومنه حصـــل حزم كلاب .............من يمكم حبــل الحميــــا قصيري
مع شيخنا جينا على الهجن تعاب .............شيخ على الاجواد قدره كبيــري
ولد طلال اللي للانفــال كساب ............... زيزوم قوم وبالمـــــلازيم زيــري
ولابي افوت حرب طويله لهااذناب ............ يلحق بنا راع القعــود الكسيري
وفزع ضاري وبقيه الامرا وانتصروا

**طلال صعفق الحافظ** · 23-10-2002 09:21

شكرا لك اخوي الهضباوي على ما تفضلت به من علوم غانمة

ودررر اتمنى اننا نشوفها منك دايم الدوم

سؤال هل من الممكن ان تقول لي او تنشد عن حرب الجوبة متى وقعت تقريبا..؟؟

وشكرا لك

**الهضباوي** · 24-10-2002 23:29

انا اسف لااعرف التاريخ بالضبط لمعركه الجوبه(موقع بالجوف) التي اعتقد انك تقصد الجوف ولكن تقريبا1334هـ والف شكر على المقد مه

**طلال صعفق الحافظ** · 26-10-2002 09:29

شكرا لك عزيزي

واتمنى لك التوفيق

**اخو حصه** · 31-10-2002 19:26

ونعم ببن طواله وامراء شمر اشكرك على الموضوع الثمين

اخـــــــــــــــــــــــــــــــــــو حصــــــــــــــــــــــــــــــــــــــ ـه

**الهضباوي** · 01-11-2002 00:59

والف شكر على تفاعلك مع القصه .... ياخو حصه

وبالتوفيق

**مخيلب** · 22-11-2002 06:39

ألف الف الف الف الف شكر لك أخي الهضباوي هالقصيدة أدوره من زمان.

والقصيدة كانت لعموم شمر وبالأخص الشيخ ضـــــاري بن برغــــش بن طواله رحمه الله لأنه كان به زعل بينه وبين سعود العبدالعزيز الرشيد رحمه الله علشان أباعر المسعودي ( قصه طويله).واللي علشانه جلي الشيخ/ضاري ومن معه من الأسلم ألى الجهرا وسفوان وهكالديار.

وفزع الشيخ ضاري والأسلم لو ان عددهم حسب ما سمعت ماهو كثير.. وضاري هو اللي صاح ورد على عنزه وردوا وراه شمر عقب ما كسروهم عنزه أول المناطح وأنتصروا ربعهم يوم الله نصرهم ومات عبد ضاري بهكاليوم .

وعقب السعد أستانس الأمير سعود أبوخشم على فزعت شمر وخص ضاري والأسلم وقال اللي بيني وبينك يا ضاري حدر الفراش.

وسالفت فزعت ضاري بكت أبن شعلان وقال أبن طواله فزاعن لبن عمه من الجهرا وأنا ابوي أسمع نبيح كلابه ولا فزع.

أكرر شكري لأخي : الهضباوي وهالمداخله بسيطه......أرجوا أني وضحت بعض الأمور.

وااله من وراء القصد.

مخيلب.

**قليب الذيب** · 22-11-2002 08:15

اخى الهضباوي المحترم
الله يعافيك على نشر هذه القصيده وعلى ماقال الاخ مخيليب كل يدوره
ودى اضافه قليله
وهذا سمعته انا من احد اقاربي وهو ما زال حى يرزق يقول انه سمعه من الجهيلى راع القصيده شخصياالله يرحمه0
يقول عند ما وصلنا الى الاسلم 0قمنا ببناء شراع صغير هو وخويه من ال رشيد وبعد قليل جانا عبد ضاري ويقود جمل وعند ما قرب منا عقر الجمل بالسيف وقال: يقول عمى هذي قدر لكم وهالحين يتفضلون يمنا
ثم ذهبنا الى بيت الامير ضارى رحمه الله 0 وتراكا ضاري وابن رشيدعلىالشداد
عندها قمت وقلت الرخصه يا محفوظ واقصد الامير ضاري قال:ضاري استرخص
من خويك قلت: كلنا عيال وعند ابوهم
قال: تفضل ثم قمت وجلست على ركبي وقلت القصيده بأعلى صوتىتجمعت الرجال حولنا وحتى النساء وراءالقاطع حتى ان القاطع من كثره النساء انقطع
ووقع بعض منهن بوسطنا ثم قام الامير يرحمه الله وكان معه شوحط بضرب النساء ورفعوا القاطع واثنا القصيده قامت تتغير وجيه الرجال وعندما انتهت القصيده ضرب الامير بالشوحط الارض وقال:حت خيال الهدلاءطويل انا اخو صلفه
تبونه الجمل و ما حمل أو مسلوله0 فقلنا: نبيه مسلوله الان ربعنا محاصرين واخاف ان ينتهى زهابهم او يحصل لهم مكروه قال: اظهورهن00وبقيةالسالفةعلىماتفضلتوا
تفسير لبعض ما سبق 00
الجمل وما حمل: يعنى حنا واهلنا وبيوتنا
مسلوله : يعنى على الخيل فقط

والف شكر للجميع ولله يعافيكم ولا تواخذ ونى ياربع

**الهضباوي** · 14-12-2002 18:21

والله لو اكتب كل الصفحه شكر لكم ما عبر عن اللي بداخلي واعتذر عن التاخير للسفر

والكلام اللي ذكرتوه انا سمعته من هل السالفه ويستاهلون هل الحيسا يوم قصد بكى اخو صلفه وقال تبيه مسلوله والا يقشع هالمثومن ولا يبنى الا بسكاكا قال لا نبيه مسلوله ياخو صلفه وهذا ما لحد فضل فيه كسبوا القصه بافعالهم هم وبقية المشايخ اللي فزعوا يوم جا نواف سلم عليه ابوه النوري ولا ردعليه قال تهجرني وانا ابوك قال ايه اهجرك تنحط انت وابن دغمي لك خمس شهور جيناك وجاك العون وهذولا مايتحاكون فزعوا قال هذولا ياجتمعوا عند شيخهم يرهبون الدول ما هو انت يالبدوي
تقبلوا تحياتي