يوم كل شي يحتسي ( مسابقه اطلق موضوع)

**أبو طنب** · 11-10-2002 13:31

[c]

ملاحظة قبل تقرا قصتي/ اكا الحين أي شي غير الانسان بحتسي باللهجه المصريه.

ابي احتسي عليكم قصتي اللي صارت لي يوم كل شين يحتسي كنت انا اكا الحين توي وغد اسرح بالغنم وبحدا الايام قعدت الصبح كالعادة (حلوة كالعادة) ابي اسرح بغنمي واروح للغنم وتلزلي اكا النعجة قالت : ]البي مش مستريح من السرحه دي[
قلت له: وكلي ربك يا بنت الحلال انشاء الله ماصايرن شي
وامد بغنمي ويم انه نصف النهار واخلي غنمي تستفلي بله روضن طيب
ووصي الحمار قلت افطن للغنم .
لا صخلن يطلع بالشارع (شارعن يوم كل شي يحتسي) . انت سمعت؟
قال :حازر يا فندم. (حازر = حاضر)

وقعد لك اصلح شاهي ويوم خلص وانا اقوم اشرب شاهي واكل من الجمريه المهم خلصت من الغدا وانا اغفي
يوم قعدت يمار الساعة 6

واتح لغنمي وأروح للبيت وانا مع الطريدز يمار صياح النعجة والتفت يمار الذيب عاضن العناق ويركضبه (العناق = بفتح العين وهي العنز يومنه دادا) وانا اقوم اطردة واتقرطه بس عجست الحقه

قلت مالي الا الحيلة

قلت ياذيب : خل العناق وانا اعطيك نعجه بداله
قال : لا . تلعبي . وهو يحتسي طاحت العناق من افمه
وهو يرجع للعناق يمار انا تقل طير وانا اشله مع رقبته وانا ابعد به عن العناق وانا افتح افمه وادخل راسي بوصطه (<<< على باله بسرك الاسود والنمور) وتقوم الغنم تصفق لي وتصفرلي (على بالهن بطل قومي)
وانا افك حنكه الحدري على شان اخليه لي نبيطة
واشلع لوزه على شان اخليهن نفيخاتن لي
واشلع سنونه على شان احطهن مخانيدز(مخانيدز = قلايد) للغنم
وأنتدز عيونه على شان احطهن مزاقيط
واصلخ جلده واسوي منه دزربه وشعره اخلي جدتي تنطاوه
واكسر رجله قلت هذي نبي نلعبه عظيم ضاح انا والوغدان

قالت العناق: انتا راقل ولا كل الرقاله.
وغدا وجهي حمرررررررررر من حتسيه ومدحه لي.

وارجع للبيت ومعي راس الذيب ( على باله ماوكلي يوم يذبح شريخان)

ونودي العناق لدكتور بيطري اسمه بصطويسي وما قصر بصطويسي عالج العناق
قال : لازم تسفرونه لنيوزيلندا فترة نقاهه وعلى شان تكمل العلاج الطبيعي بشكل صحيح
ويوم رجعت من نيوزلندا ودلت تسرح معنا
قامت كل يوم تسولف لي عن نيوزلندا وخوياته اللي تعرفت عليهن هناك

الله يا اكا الايام صدز وناسه

[/c]

**أبــ شهاب ــو** · 11-10-2002 18:19

بالله اجبل دخلت راسك بافم الذيب هههههههههههههه والله فعلا قصه روعه

تستاهل الجايزة الثانيه اما الاولى لي

**مفتاح14** · 11-10-2002 18:29

وتلزلي اكا النعجة قالت : ]البي مش مستريح من السرحه دي

هههههههههههههههههه
هههههههههههههههههه
وكمان

ههههههههههههههههههههههههه

ابو طنب والله انك خبل :p

<<--- يحسبه مدحه :D

ياخي وين مغيبن هالابداع عنا.. ايه تكفى ابيك تسحب (الزوليه

) من حدر بعض الناس

<<--- معجبه اسمك خخخخخخ

تسان ماني واهم هذا ثاني موضوع لك.. يعني باقي لك واحد..بسرعه نزله تراني ماشبعت ضحتس

<<------ ما ينعطي وجه

p

**أبو طنب** · 11-10-2002 20:59

أبــ شهاب ــو
ترى هذا يوم كل شين يحتسي
ولاتنسى اني وغد
<<< قام يتميلح

مفتاح14
اذا اسمي معجبك ما يغلى عليك بس تعطيني الجايزه الاولى
<<< مطلعن لسانه يعني يتسذب على مفتاح14

**khaled** · 12-10-2002 07:17

والله ابداع ومواهب وبصراحه فلت حجاج بمعنها الحقيقي

الله يوسع صدوركم جميعا

والله ونستونا الله يونسكم بالعافيه

**أبو طنب** · 13-10-2002 22:14

أخوي / خالد
الله يسلمك
وعلى قوله الكائنات (يازين اللغه العربيه الفصحى) دا من زوأك حبيبي

بيني وبينك لا أحد يسمع: لا تنسى الترشيح.

**أبــ شهاب ــو** · 14-10-2002 21:30

.............

لمن الجايزه اكيد لي

**الاشعل** · 14-10-2002 22:51

ووصي الحمار قلت افطن للغنم .
لا صخلن يطلع بالشارع (شارعن يوم كل شي يحتسي) . انت سمعت؟
قال :حازر يا فندم. (حازر = حاضر)

هههههههههههههههههههههههههههههههههههههههه هه انوااااااااااااااااع
التسسسسسسسسسسسسسسسسسسسس

اجل شارعن يوم كل شي يحتسي هههههههههههههههه

بس وش قصدك بلهجة الحمااااااااار ( وجه يدور الشر والشرير )

ابدااااااااااااااااااااااااع يا ابو طنب ابدااااااااااااااااااااااااااااع

تسلم وننتظر مواااااااااااضيعك