لا تفرح إن الوقـت أسعدك واعطاك = لابـد مـاسود الليالي تـبـكـيك
دنــيا تقلب علها مـاتولاك = تمسي عزيز وتصبح امن الصعاليك
إلى اقبلت تخفي عيوبك عن اعداك = وإلى ادبرت تظهـر عيوبك لاهاليـك
اغنم من اصروف الدهر كانه امـداك = قبل اللحد عن ظاهر الارض يخفيك
وترى التشكي للمخاليق يشناك = يحط من قدرك ويفـرح مـعـاديـك
وكثر التشره يجعل الناس تجفاك = ولا عاد تلقى بيـنهـم من يخاويك
ولا تمادى في زعل من ترضاك = مادام جاء عاني على شأن يرضيك
ولا تخاوي من على ابوه بـداك = هذاك وان طال الزمان يغدر فـيـك
والجاهل احذر لاتجادله يـبلاك = في كلمة بين المخاليـق تعـميك
والهرجه العوجى لو أنه تنصاك = حاول تجاهلها وخله تـعـديـك
ولاتخيب هـقوت اللي تهقواك = مادام جاء بين المخاليق ناصيك
واحذر تـهـزا يافـتى بخلق مولاك = تـشوفها باقرب قـريـبٍ يوالـيك
ولاتفرح بزودٍ على الحق وان جاك = زودك ترى نقصٍ على حق ذوليـك
وخل القناعه ميزةٍ من مزايـاك = مع القناعه كل شيٍ يكفيك
وان جت لك الدنيا على غير مشهاك = اصبر ترى بالصبر تدرك امانيـك
ولا تأمـن الدنيا ترى الوقت فتاك = لجا القدر كثر الحذر ماينجيـك
للشاعر/
احمد بن عبدالرحمن العريفي
(نديم المجره)
رد مع اقتباس
المفضلات