هذه القصيده للشاعر/ زيد بن زياد المفضلي الشمري
يقول فيها..
ولي أحلام(ن) جابت الحي والميت
تخالطوا عندي عزيزين قومي
حلم(ن) جمع ناس(ن) على ماتمنيت
قمت أتخيل شوفهم بالحلومي
ناظرت عندي من لهم بالوفا صيت
أهل المكارم طيبين السلومي
ياليتني بالحلم غطيت و أبطيت
والحلم طاولني على طول نومي
بالحلم لوجيه الرفاقه تحليت
حي(ن) بعيد وميت(ن) مايقومي
بالحلم معهم بالسبات أستلذيت
وبالعلم ضافت في حشايه همومي
صحيت وزادت عبرتي والتناهيت
الله يلوم اللي بوضعي يلومي
الله يقربني لمن كنت حبيت
حي(ن) بقربه ينهضني عزومي
والميت ربه يرحمه حامي البيت
ويجعل لنا معهم بطوبى لمومي
ياغفر الزلات كان أني أخطيت
عفوك رجيته من لهيب السمومي
ادعو جلالك با إلهي تعاليت
اسال عفوك يالغفور الرحومي
إنت الذي على الضماير توريت
تعلم بقلبي وش ذكر من علومي
والله يالولا الحلم أنا ما تطريت
صار السبب باللي مضالي عمومي
عن دار ربعي والجماعه تنحيت
لولا ظروفي لي هكا الدار تومي
وناس(ن) يحسبوني دلهت وتسليت
جسمي قعد والقلب يمه يهومي
ماني بغربه بس لدار حنيت
حنت خلوج(ن) كل ليله تحومي
اقفى ولدها في يدين الشماميت
حلال ميت يوم وزع قسومي
الولف من طبعي وأنا فيه اقريت
لربعي ومن له بالمراجل قدومي
الا ولا أشفق للعفون الهتاهيت
الخايبين الساقطين الرخومي
شتان بين أهل الشيم والسرابيت
الفرق شاسع بين حر(ن) وبومي
هداج تيما ما يشبه على هيت
والجدي يفرق عن جميع النجومي
ياتهت عن دربك بليل أستدليت
به تهتدي هذا الكلام امعلومي
والأمثله واجد لها ما تقصيت
ويعيش رجل(ن) للمعالي يهومي
فرق الرجال أفعال ما الفرق تنكيت
ماالفرق بالكشخه وزين الهدومي
ومهما بالهدنيا انبسطت وتمشيت
لازم يجيك من المصايب سهومي
دنيا دنيه به للاصحاب تشتيت
يدوم وجه الله وهي ماتدومي
كون(ن) يجي نهار والا ليا امسيت
شي(ن) موكد من طرفها الهجومي
دنياك ماتعطي عن الغيب توقيت
سره عميق وللخفايا كتومي
حصل المجال وجبت بيت(ن) ورى بيت
ولولا السبب بالشعر مالي لزومي
واختامها على أفضل الخلق صليت
اللي عن الزلات كان معصومي
وسلامتكم...
وإن شاء الله أن تحوز على رضاالجميع...
رد مع اقتباس
المفضلات