مصافحة من بعد غياب
:
قل لـ الهنوف اللي تجازيني بعاد
يامبعدة ما لـ المسافـات داعي !
:
انتي وطن لـ اللي مشاويره بلاد
ملت كتوف الصبر شرهة متاعي
:
وانتي جروح اللي امانيّه جـداد
ياجرحي اللي كل مانمت واعي
:
فيك الامل يوم الامل حي مابـاد
ولك استماتت خاطري واندفاعي
:
جتني مشاريهك قويات وحداد
كن الترف يشره على كف راعي
:
ماتدركين ان الزمن دمع واعياد
وكلٍ على الثنتين يملك دواعي
:
تبكي على بغداد .. تمرات بغداد
وتضحك على بيروت صفر الافاعي
:
تبدل المفهوم .. واستبدل الضاد
حتى الحيا هاللحين عيب اجتماعي
:
حطيت من فوق القدر خرج وشداد
لكن فلت حبل الرسن من ذراعي
:
وقطعت ميعادك على غير ميعاد
وحقك على شح المطر يالمراعي
:
على رصيف المهزله شلت الاصفاد
وقصرت عن بعض الدروب المساعي
:
الخوف كل الخوف شاره ونقاد
يحكم علي من قبل يسمع دفاعي
:
عمار ياعودٍ شكى هجر الاحفاد
وعمار يالحنٍ يشد استـماعي
:
كفّنت انا الفرصة على نهج الاجداد
يقول : وان ماطاع وقتك يطاعي
:
مشعل حاشم
رد مع اقتباس
المفضلات