قولوا لي ويش اسوي .... ♥

**ريوف** · 23-05-2011 16:56

:
:

هههههههههههههههههههه

ياوووووه كل ما اتذكر يوم نتبادل انا ومهاجره بالنعول تكرمووون ..

الصبح قاعدين كلنا نتجهز نبي نداوم كلن يروح لمدرسته ولاعندنا من الشيطان طاري ..

انا كنت بالمتوسط ومهاجره بالثانوي ..
انا تحضرت من قمت ولبست جزمتي تكرمون ..

وانا وحده أقدامي دافيات صيف شتا ضحتس بتسا ..
ومن قمت وانا لابسه الجزمه يعني الجزمه موووولعه نار ..

جتن مهاجره يمار تقووول ريوف بالله ماتبادليني بالنعول قلت لا تكفين نعولتس كبار علي
قالت بلا سخافه اي كبار مقاسنا واحد انا وانتي << مو كأن السالفه غصب ..

المهم وانا انزل جزمتي وأعطيه إياه طبعا بدووون نفس ..
والله وهي تلبسه وماتشوفون إلا مهاجره تقامز وتركض من غرفه لغرفه اوتش اوتش ياويلي يلتسعن وتنط من مكان لمكان ..

وانا اتشفى به ..
تستاااهل

:
:

رحنا كل وحده لمدرسته والأكيد اننا متبادلات ..

:
:

يوم دق جرس الفسحه وانا يطير قلبي ابي آآآآكل ميته جوووووع ..

وانا اجهز ريالاتي واطلع للساحه ..

المقصف دريشته كبييييره حيل وعلى كبر الدريشه هم زحمه ..

المصيبه ما أنتظرت يما تخف الزحمه ودخلت
لا
لا غمضت ودخلت الزحمه عليش اغمض مدري ..

يوم دخلت اريد اوصل الدريشه مالي امل ..

يابنات هدو شوي الله يعافيكم ما احد يسمع

ياهوه ياعالم .

مافطنت إلا الموج يلفظن من بحر الزحمه هذي وأنا اطيح كسيره وبدون نعول هه وانا اتلمس رجليني يمار اي والله بس الجوارب شلوون شدعوى شصار ..

وانا اتفطن انهن وساع كله من مهاجره عاد صرت بمصيبتين الفشله بين البنات بدون نعول والثانيه تسني ضيعت نعول مهاجره وانا اجي على اختي اللي تدرس معي وانا اقوله وهي تنصرع من الضحك علي رفعت ضغط ضغطي انا وين وهي وين ..

آخرته يمار تقول لي راح ترجعين للبيت بدون نعول وتكفختس مهاجره وعيبون عليتس عيال جيراننا << مسخرتن العوبا

وانا اروح واجلس لحالي على درجات المسرح يما خفت الزحمه وانا اروح والقاهن يمار متعفطات من التدوس ..

وافلست من الفسحه
وقولوا لي ويش اسوي .... ♥

:
:

**مهاجرة باحساس** · 23-05-2011 17:30

الحين اغيب عن المنتدى وارجع عالى هالفضايح ... هذا موضوع ينكتب ,هذي سالفه تنسولف

.
.

8

بس بصراحه ضحكتيني وثانكس لك

**مشعل النماصي** · 23-05-2011 17:38

هههههههههههههههههههه

اهم شي انك لقيتي االنعول

مشكووره عالطرح الجميل

**بنت الجبل آخت القصيد** · 23-05-2011 18:32

ههههههههههه
استغفر الله
زين اختك ماتبرت منك بكاللحظه
ذكرتيني بوحدة من المضايف خذت جاكيتي
بالشتا تلبسه زين عليه بس ماتقدر تلف لايمين ولايسار
المهم بالامتحانات تقول ويطيح القلم وانا ابلش مقدر اخذه

الا لازم انبطح واعضه هههههههههه
حنا ليش كنا نسوي كذا

ونستي بالعافيه

**ريوف** · 23-05-2011 19:58

المشاركة الأصلية كتبت بواسطة مهاجرة باحساس

الحين اغيب عن المنتدى وارجع عالى هالفضايح ... هذا موضوع ينكتب ,هذي سالفه تنسولف

.
.

8

بس بصراحه ضحكتيني وثانكس لك

/

هذا الحال ياعقيده ..

:
:

دووووم يارب هالضحكه .... ♥

:

**سالم الظفيري** · 23-05-2011 21:33

يعطيك العافية اختي ريوف

كل من غاب جاب الغنايم وانتي جبتي الغنايم وعلومس غانمة

بس ودي اعرف انتي لافسحة ولا نعول

ومهاجرة وراك

اجل حالتك حالة

ضحك الله سنك

لك تحياتي