هلوســـــه ( توجد حكمه في الداخل )
مساكم توووت
قاطفته حدى طخوم صيدا
ياعيب الشوم علي
صرت من تالي ما استحي على وجهي
مدري وش بي
احس اني فاهم الذرابه غلط
ذاك اليوم واقف عند الأشاره انتظرها تفتح
وقف جنبي خال من قو السواد اللي فيه قالب كحلي
اشر لي بيده
وفتحت الدريشه قلت له امر ياجدي
قال لو سمحت خط الرياض وينه
قلت له مع الكبري يسار ودز بوووجهك
قال الله يعطيك العافيه
قلت ماعملنا شي يابعد روحي
انا قلتها ولا ماقلتها
طق بريك وقام يتبوسم لي ملعووون الرقبه
شكله خق مع الفرقه اللي مسويها بشعري
ولا مادري وش وضعه بالضبط
سحبت عليه
ووليت ساقي الى الريح
ورحت لمطعم اجيب لي عشاء
عاد وقتها لاعب بحسبتي زويان <<< الجوع لمن لايتحدثون الفرنسيه
والله واجي عند الكاشير
واقوله عطني الوجبه الفلانيه اذا تكرمت
قال هات 15
انا قفلت معي وقلت ياحيوووان
ورى ماتقول لو سمحت
قال لاتجلس تسوي قرقر فوق مخي
قلت الا ابسووويه بوجهك يا ملعوون الجدف
بغيته وقته لكن الله هداني
ولا كان للحين تلقوني اعجن فرررته <<< مهوب عاقل ظلال تايسون
عفت العشاء وقتها
وقلت لابوك لابو من يجيك مره ثانيه
نكست لبيتنا وجلست افكر بالوضع اللي صار
قلت مابدهاش يابو راس ( اسم الشهره)
لابد من التغيير
والله والبس المقوصر حقي
وادق فنيله علاقي
والبس ثوبي اللي لو يدخلون عشره معي ماعندهم اي مشكله
مسوي ذكي انا وراسي مفصله وسيع
بزعمي ادور البراد
والبس شماغ برتقالي
واعطيها بنت البكار
قسم بالله لو تشوفني من بعيد
تقول سبحان من يحيي العظام وهي رميم
والله واركب سيارتي
وأشلع لشارع عندنا كله ملحس
اعقل واحد فيهم تلقى عليه جنحه أخلاقيه
وأجلس افرفر عندهم
ورافع الصوت على اخر شي
من قو صوت السماعات ربطت حزام الامان
خفت اطلع مع الفتحه حقت السياره
واجلس اطامر بمحلي
قسم بالله حسيت اني راكب خيل مو سياره
<<< اعنبوك والنصبه
وانا الفلف وخاش جو مع الصريخ
وحاط يدي على راسي يعني شوفوني حززززين
شوي الا يوقفني واحد
شبهه مثلي
قلت خير يابو الشباب
قال لي
ماحوووولك شي
قلت حولي كل خير
امر بس
قال ابي اي شي
ينسيني الضيم والقهر اللي فيني
قلت الا القهر والضيم يبون ينسونك
انت ابليس وهو ابليس يخاف منك
يقول مالها داعي ادشر على يد انسان
قال وش تقول
قلت لا ولاشي
بس والله مافي الا بنادول
زين تراه يفك الصداع اللي بمخك
<< على نياته
قال
الا غيررره مافيه
قلت
فيه بايسون جربه
يقولون يعطيك جوانح
خذاه مني وصبه فوق راسي
قال اشوفك توطوط هينا
العن ابو الطيب اللي فيك
اعنبوا شكله
من قو الشر اللي فيه
الخشم اللي عنده مشيوووول
ومحطوط مكانه ظفرررر
حتى عقب سألت عنه
وقالوا لي انه اذا طفش يلعب أكس أو بوجهه
بس السؤال اللي حيرني
كيف يتنفس وهو ماله خشم؟
الظاهر انه مرهم لعمره خياشيم يتنفس معها
عاد ان يوم انتبهت لشكله زين
ويوم سمعت التهديد والوعيد << لزوم السجع
اللي صرح فيه
قمطت العافيه وحطيت رجلي
من قو القمطه اللي فيني ماردني الا مكه
الظاهران وقتها عقلي الباطن هو اللي يتحكم فيني
ولا لو علي انا كان صافقتني ام الركب ومتحرووول بمحلي
عاد يوم انتبهت لعمررري
الا انا على مشارف مكه
وداقتني النفاضه
انا احسبه من الخوووف هالنفاضه اللي فيني
بس للأسف اكتشفت انه مو خوف
وياليتني ما اكتشفت هالشي
لاني بصراحه طحت من عين نفسي عقبها
مريت محل ملابس
واشتريت لي ملابس داخليه وثوب نوم
لان ملابسي توصخت من البايسون
ومن بعض الرواسب اللتي نتجت من القمطه
لانه من جد ماينفع تسوق وملابسك كلها سوائل
يلعب بحسبتك البرررد
هذا غير الروايح اللي تفحفح
وربي لو راكب معي اعمى وقتها
ان يرجع له نظره من قو الصنان
رجعت البيت
ومن زين الحظ لقيت الزقرت متجمعين عندنا
عاد خذلك ياشماته
انا وثوب النوم اللي لابسه
قسم بالله كاني طالع من عنبر
واحد من العيال مسوي فيها الولد الكفيت
قام يتشمشني
الظاهر انه يحسبني معطبها ولا مدري وش سالفته
لان بصراحه شكلي وقتها يأهل اكون راعي مخندرات والعياذ بالله
الدبشه مايدري
ان الناس مخابر مو مناظر
^
^
هذي زبدة الموضوع والحكمه اللي بغيت اوصلها لكم
ياخي
ماودك الواحد ينعطى وجه وهو مواصل
يقوم يعجنهن ويقط خيط وخيط
رد مع اقتباس
المفضلات