بلخير علومكم.....
تذكرت لي سويلفه مبطيه قلت بقوله لكم
هذا مرتن من المرات سيرنا لجدي بالديره وكانت بعارينه غاديات بكالوقت وهو كل صبح يملا الجركل ماء
ويركب الشاص ويروح يدورهن
هو كان حاطهن بلهن شبك
قريب من الديره وكل صبح وعصر يروح لهن بس له
يوم نسى الشبك مفتوح وعاد جفلن وهجن وجدي يقول الابل
لاهجت ماتلتفت وراه ولاتوقف ابد الابعد ثلاثين
او اربعين كيلو<زعلتهن قشرا هالمروحات
المهم اكاليوم قلت لجدي بخاويك باتسر لارحت تدورالابل قال ميخالف بس قومي بدري الفجر
ويوم جاء الصبح وانا افز على الصلاه واصلي والبس عباتي والبرقع مجهزتهن خصيصا لهالرحله
واولم الشنطه واحط به جوالين قلت احتياط اماتخربنا السياره ويخلص الشحن
يصير معي احتياط واحط بالشنطه بطاطس كرك كراك وفطيره جبن
مؤونه لانموت جوع واسرق حدى شراشف خالاتي
عشان البسه بالبر تسني بنت الصحراء
وانا اتسحب مابي يدرن بنات خالتي وخواتي ويرحن معي
عاد هن تقل نمل من كثرهن ومالهن مكان بالجيب
ولاشافهن جدي طردنا كلنا
وانا اركب بجنب جدي مستانسه وهويجي هو وجركله
ماليه ماء ودربيله وهويركب
ويشغل الشاص<انا اصلا كل روحتي عشان يخليني اسوق الشاص يازين سواقته بس
تحسين نفستس اميره او قناصه المهم شي كشخه
وحنا نتوكل على الله ونمشي ويمر جدي البقاله
ويشتري بسكوت شوكو وعصير وننطلق في داخل الصحراء ندور هالجرب
ومن راس طعس لراس طعس مره ينزل جدي يقص الاثر
ومره يركب بالحوض يدربل ومره القاه فوق التنده 
ومره يوقف يحطب ولاشاف له خشبه يابسه قال حولي ياوليدي
هاتيه تصلح نشب به النار
وبس نمشي وجدي كل شوي كولي ياوليدي
من ها البسكوت منا زينه واكل وافتح له بسكوته ياكله
وانا شبعت وجدي معلق كولي من هالبسكوت
وانا افك له واعطيه وعقب عرفتله لاقال كولي فكيت وعطيته عرفت انه يلمح
وجاء الظهر والحر عاد انا وحدتن لاشميت ريحه الحر
اوالشمس صكن راسي وقمت افدع بالي حولي
وانا التفت على جدي قلت اقول مهي طلابه من الفجر
وحنا نستدير وكل ماشفنا بعارين قلت لا مهن بعاريني
ماعليهن وسمنا ياخي خل نمسكهن وناسمهن بوسمك
وخذهن للشبك مهي حلا السالفه انا مت حر
ولاسقت الشاص ولاشي بس شغلتي افك لك من هالبسكوت
وهويقرط جدي الدربيل بحظني قال يالله اركبي
فوق التنده ودربلي تشوفيهن انا من الحر والتعب
والقهر قلت رضمه قال تدق نهستس
<والله يالربع للحين
مدري وشي نهستي بس احس انه شينن بالوجه الوكاد
ان جدي عصب وانا اذل وانا اتعلق بالتنده
واتربع واقوم ادربل يمين يسار ماحولي ولانقطه بعير
وانا اشوف لي رجال مغرزين ويحفرون وحالتهم حاله
واقعد اتفرج عليهم بالدربيل وتحمست مع سالفتهم
احس كاني مخرج معي كمره
مادريت الاجدي شغل ومشى وانا اطيح بحوض
الجيب الله ستر بغيت اطيح من التنده وتنكسر رقبتي قلت
ياجدو ليه ماتقولي بنمشي بغيت اطيح قال تشوفي البعارين بس
وانا بالحوض اشوف ظلاله بالغماره ياكل بسكوت
قلت ايه يصرفن يبي ياكل
المهم اننا رجعنا بعدصلاه الظهر وانا هلكااااااانه
ولالقينا البل ولاشي واول مادخلت البيت نمـــــــــت
وماقعدت الا من بكرى الصبح
ومن بكرى قال جدي تخاويني ندور الاباعر
قلت انا مستعده اوسم نفسي واصير بعير لك
بس ماااروح معك ماعووووده
رد مع اقتباس
المشاركة الأصلية كتبت بواسطة ابو ضاري
المفضلات