يــوم من أيام العرب .,
,
يوم من أيام العرب ما ينسى , و تحديداً منتصف التسعينات ..
كنا حوالي تسع طعش بزر و متجمعين نلعب بـ الحديقه حول الشجر << حشى قرود
أخبر الناس هواياتهم جمع العملات , تسلق الجبال ...الخ أمـا تسلق الأشجار ما أدري وش كنا نحس بوه
و بهكاليوم قررنا قرار ماقس و هو إننا نبي نسوي كوخ على الشجره << الله من زين الأجواء
ما تحلى لنا الطلعه إلا ع الساعه 10 قمة الذروه و الحرررر ..
و هم يتشاورون الشله وشلون نبدا وش نسوي ؟
بـ الأول أهم شي نجيب خشب ..
و حنا نتوزع كلن على بيت أهلوه يجيب لنا شي لـ البناء << امحق مهندسين كل شغلهم تجميع و شحاذه
شوي إلا العمّال جايين و معاهم الأدوات .. الجود من المآجود
اللي جايب رجل سرير ..
و اللي جايب صندوق طماط خشبي ..
و اللي جايب درج كومدينو قديم ..
و اللي جايب ملعقة خشب .. تنفع وش دراكم يمكن نستخدمه مزلاج لـ الباب
و اللي جاي مكفخ و مطروووود ما معوه شي ..
و حنا نتشاور ( اخس مسوين مجلس شورى )
قرروا إني أنا اللي أصعد ع الشجره و ابدا بـ وضع حجر الأساس << طاحت هيبته
قلت لهم ابي اروح لـ البيت شوي و ارجع ..
اسمع ولد عمي يقول : تبي تنحاااااش والله تبي نتحاش
و هي تمسكن ( مهاجره ) مع غاربي : أقول ترجعين يعني ترجعين
و انا احلف لهم يالله تركوني ..
و ركض ع البيت ..
و ألبس بدلة أخوي الأرجنتين و ألبس كاب مكتوب عليه 95 << تسنه 2011 هكالوقت
و أجيهم طايره .. متحلف بي ولد عمي و ذاله ..
و أفرفر عندهم , شرآيكم ؟
و أخوي يخزن مهو عاجبوه , بس وش يسوون لهم مصلحه ..
هنا عاد ( دقت ساعة العمل , إلى الأمام )
بنت عمي دنقت و أنا أصير على ظهره و أصعد ع الشجره >> اصنصير
ترى الشجره عاليه .. و المنظر من فوق رهيييييييييب .. قزيت الحاره قز
و أشوف العصافير و الحمام يمرن من جنبي .. أكيد متهولات
و العمال تحت يتناقشون وشلون يصعدون لي الأغراض
يا ليل التسيب .. الحين يوم صعدت توهم يفكرون !!
و بعدين ؟
تعبت من الوقفه و أجلس اهبهب رجليني لين يشوفون لهم حل ..
قالوا : خلاص ما يصلح , صعبه
أنا تحطمت .. يعني بس تهزأت و تمشورت ع الفاضي
قالوا : خلاص إنزلي ..
و هي تجيني أم الركب و أحس شوي و أدوخ ..
المصيبه أكابر , قلت : لا مستانسه فوق أشوف كل شي
و هم يروحون كلهم يبون يتغدون ..
إمشي معنا , لا مالي نفس
يتراولي بـ الغداء و خصوصاً فخذ الدجاجه آآهـ
قلت لهم : جيبوا لي تفاحه إذا جيتوا
راحوا تغدوا و جوا يـ الله يمشون , شوي شوي , من هالرز اللي درعوا بوه
<< تقل حاقده عليهم
هآه مانتي نازله ؟؟
لا وش تبون خلوني بـ كيفي << امحق كيف
شوي و ألا نلمح سيارة عمي توه جاي من الدوام
و ويلناااااااا .. و هم يتناقزون وكلن يجدع اللي بيدوه و ركض عالبيت
بالضبط تقل مخلفات حجاج و شافوا البلديه
و أنا أطـــــب مابي بلا و أركض ألحقهم
,
و تهقون نتوب عقب هالسالفه ؟!
ابد من ثاني يوم غيرنا نشاطنا و قمنا نسوي حفريات<< يا صبر الأرض بس
.
.
رد مع اقتباس
المشاركة الأصلية كتبت بواسطة سالم الظفيري
المفضلات