ســـــــــــؤال ,وأتمنى أنكم تجاوبونه ..

**الجمعاوي** · 25-03-2011 21:13

أبي أسأل عن البيتين :

يمي خوين من خويه تبرى
حطيت للسيف الاجرب خوين لي

1- لمن ؟؟؟
2-وأريد قصيدتها كامله >> { لو ما عليكم أمر } <<
3-وماهي قصتها؟؟؟

وأشكر كل من يفيدني بهذا الموضوع

الــمــســعــودي

**صلفيق** · 25-03-2011 22:01

حياك الله يالجمعاوي

مدري يالغالي .. أشوف كأن في البيت كسر !
لكن ننتظر ابو فهد والأخوان الذين لديهم معرفة بالقصيدة والبيت لعلهم يفيدونا

لك احترامي،،،

**شمـ حايل ـرية** · 25-03-2011 22:04

طار الكرى..عن موق عيني..وفرّا * قزيت من نومي..طرى لي طواري

وابديت من جـاش الحشا..مـاتـدرّا * واسهّرت من حولي..بكثر الهذاري

خطٍ لفـانـــي..زاد قـلـبـــي بــحرّا * من شاكيٍ..ضيم النيا والعزازي

سر ياقـلــم..واكـتـب..على ماتورّا * أزكى سلام ٍ..لابن عمي..مشاري

شيخٍ..على درب الشجاعة..مضرّا * من لابةٍ..يوم الملاقى..ضـواري

ياحيف..ياخطو الشجاع المضرّا * في (مصر)..مملوكٍ..لحمر العتاري

من الزاد..غادٍ له..سنامٍ وسرّا * من الذل شبعانٍ..ومن العـز عاري

وش عاد.. لو تلبس حريرٍ يجرّا * ومـتـوجٍ..تـاج الـذهـب..بالزراري

دنـيـاك.. يابن العم.. هذي مغرّا * ولاخيــر في دنـيـا.. تورّي النكاري

تسقيك حلوٍ.. ثـم تـسقـيك مرّا * ولـذاتــها..بـيـن الـبـرايا.. عواري

إكـفـخ بجـنـحان السعـد.. لاتدرّا * العـمـر.. ماياقاه.. كـثـر المداري

ما في يـد المخلـوق.. نفعٍ وضرّا * ما قدر الباري.. على العبد جاري

إسلم..وسلم لي..على من تورّا * واذكر لهم حالي.. وماكان جاري

وإن سايلوا عني.. فـحالي تسرّا * قبقب شراع العز.. لو كنت داري

يـوم إن كلٍ..من خـويه.. تـبـرّا * حطّيت الأجرب..لي خويٍ مباري

نـعم الرفيق..إليا سطا..ثم جرّا * يودع مناعير النشامى..حباري

رمـيـت عنــي..بـرقع الـذل..برّا * ولاخـير فيمن..لايدوس المحاري

يـبـقى الفخر..وآنا بـقبـري معرّا * وأفعال تـركي..مثل شمس النهاري

أحصنت نجد ٍ..عقب ماهي تطرّا * مصيونة ٍ..عن حـر نـفح المذاري

نزلتها غصبٍ..بـخيـرٍ..وشـرّا * وجمعت شملٍ..بـالقرايا وقــاري

الشرع فيها..قد مشى واستمرّا * يقرا بنا درس الضحى..كل قاري

زال الهوى..والغي..عنها وفرّا * ويقضي بها القاضي..بليا مصاري

من غاص غبات البحر..جاب درّا * ويحمد مصابيح السرى كل ساري

وانا احمد اللي..جاب لي ماتحرّا * واذهب غبار الذل عني..وطـاري

وصلاة ربي..عد ماخـط..قــرّا * على النبي..ماطاف بالبيت..عاري

اعتقد انك تقصد هاذي واذا كنت تقصدها فهي لـ ياسر التويجري واذا تبي القصة انا حاضر

**عبدالله الجعيثن** · 25-03-2011 22:05

يوم ان كلن من خويه تبرأ // حطيت الاجرب لي خوي (ن) مباري

والاجرب هو سيفه

اما تكملت القصيده والسالفه فأتركها لذوي الاختصاص

**راعي الوقيد** · 25-03-2011 22:11

^
^

القصيدة للإمام / تركي بن عبدالله بن محمد بن سعود اّل سعود

وماهي لياسر التويجري .؟

لكم التحية

**شمـ حايل ـرية** · 25-03-2011 22:13

مشكور راعي الوقيد

**وافي الزنيدي** · 25-03-2011 23:18

السلام عليكم
اخوي شمري حايل تستهبل والا من جدك (ياسر التويجري)
القصيده طال عمرك لـ( تركي بن عبدالله وتركي هذا له ولد اسمه فيصل وفيصل له ولد اسمه عبدالرحمن وعبدالرحمن له ولد اسمه عبدالعزيز اللي هو مؤسس الدوله السعوديه الثالثه) .
اما مناسبة القصيده فهي انه عندما كانت الجيوش التركيه والمصريه في جزيرة العرب كانت اعظم المشاكل تاتيهم من ال سعود وال الشيخ فقاموا بأسر جميع افراد هؤلاء العائلتين وذهبوا بهم الى مصر وكان تركي صاحب القصيده مختبىء بكهف(مغاره)قرب مدينة الخرج وعندما ذهبت الجيوش التركيه والمصريه عاد تركي واستعاد الحكم في نجد وارسل له مشاري ابن عمه رساله يسأل عن احواله واحوال نجد فرد عليه تركي بهالقصيده ولم يعلم تركي ان هذه القصيده سوف تقتله .
لان مشاري بعد ماوصلته القصيده هرب من مصر وعاد الى نجد واقام عند ابن عمه تركي فتره ثم قتله عن طريق عبده (حمزه) ان كنت قد سمعت بالمثل الشعبي (فرد حمزه ثاير ثاير)
هذا ما اعرفه وارجو ان أكون قد افدتك .

**أبو فهد** · 26-03-2011 10:33

أشكر جميع من شارك معنا

شكر خاص لابو فيصل (راعي الوقيد) و الأخ المحترم وافي الزنيدي

اعتقد أن الأخوان ما تركوا لي مجال ،، جاوبوا على كل الأسئلة

الأخ وافي أتي لنا بمختصر القصة و المفيد منها

دمتم بخير

---------------
أبو فهد الهمزاني

**الجمعاوي** · 26-03-2011 10:58

المشاركة الأصلية كتبت بواسطة صلفيق

حياك الله يالجمعاوي

مدري يالغالي .. أشوف كأن في البيت كسر !
لكن ننتظر ابو فهد والأخوان الذين لديهم معرفة بالقصيدة والبيت لعلهم يفيدونا

لك احترامي،،،

أشكرك لمرورك وأهتمامك