بعيداً عن الرجال هاللي غثيتونا بهم :)
^
^
دبلتوا تسبودنا بهم
نبي نتنفس شوي هواء نقي
عاد تنفسوا معي بنقلكم لماضي طفولة الجازي !!
إيييييييييييييييييييه يازمان الفن <<<< أبو التعابير
برجع بالذاكرة لثلاثة وأربعين سنة وراء <<<<< عاد عليكم الحساب
كان عمري سبع سنين <<<< يادلبو
كنت مثال للطالبة المثالية الذكية المؤدبة المرتبة النظيفة <<<<<<< أول الهياط قطرة
وكانت أستاذة الرسم حجازية والحجز معروفين بحرارتهم
وكانت طالبة منا قائمة طلبات يعجز عن حملها كتفي الصغير
ألوان خشبية - ألوان مائية - صلصال - صمغ - ورق قص ولصق - كراسة - مقص - قلم - براية - مسّاحة (( محّاية )) - مسطرة
طبعاً كنت حريصة أجيب كل الأغراض مو من زود السنع والا الشطارة !!
بس لأن الأستاذة الفاضلة متوعدتنا بعصا طولها متر ونص في خمسطعش سنتي <<< عصا التفصيل والخياطة البنية !!
اللي بتنسى شيء واحد بتنضرب بالعصا !!
جهزت كل أغراضي وما بقى لي غير الألوان الخشبية
رحت لأبوي أطلب منه
قلت له :
بابا !! <<<< ماش ماتنبلع بس خلوني أهايط شوي
قال : هلا أبوي
قلت : بابا <<<< مصرة العمة تهايط
تقول الأبلا جيبوا ألوان خشبية
قال : أبشري يبه أجيبها لتس اليوم بس ذكريني !!
هالكلام الظهر على الغداء !!
يوم جاء العصر وأبوي مسنتر عند التلفزيون يتابع مباراة <<<< أبو الدقة اللي تعرفين
قلت له : بابا !! لاتنسى الألوان الخشبية
قال : خلاص وأنا ابوتس مهوب وقته الحين إذا خلصت المباراة رحت أجيب لتس ..
جاء المغرب
بابا الله يعافيك جب لي الألوان لازم أوديها بكرة معي<<<< أبو النشبة
طيب يابوي خلاص وأنا راجع من ربعي أجيبها لتس
وانتظر المغرب على العشاء وأتعشى وأنام وأنا كلي ثقة في بابا الحبيب !!!
يوم أصبحنا وركبت السيارة بروح للمدرسة وأنا اللي أطالع في بابا
قلت : بابا جبت لي الألوان !!؟
أوووووووووووووووووووووووووه وأنا أبوتس الله يقلع الشيطان نسيت يابوي
أنا توقف نبض قلبي ثلاث ثواني !!
وش أسوي !!؟
وش أقول لها !!
قلت : بابا بتضربني الأبلا
قال : تخسي وتعقب
قولي لها أبوي مشغول وما قدر يجيب لي الألوان <<< ماخذها بالساهل أبو الجازي
واستسلمت لمصيري المحتوم
ودخلت المدرسة وكأني داخلة قبري <<<< تسني عاد مجربتن دخلة القبر عساها عقب عمرن طويل راضي علي ربي
وجهي منلفع ومالي واهس للمشاركة <<<< خبركم دافورة
وأنا أشوف الدقايق تسنها أعشار الثواني في سرعتها
لما جت حصة الرسم !!
ونزلنا لمعمل الرسم
أنا أنزل وروحي تطلع <<<< أبو البلاغة ياشيخة
وطبعا بحكم المقاسات المختلفة في أطوال البنات وأعمارهم كنت من قرادة حظي سنفورة ولازم أرتز قدام
وتمنيت لو إني أطول شوي عشان أرجع ورا كودها ماتشوفني !!
المهم دخلت الأبلا وعلى طول (( يالله يابنات اللي ماجابت أغراضها توقف ))
تحرولت وتيبست ركبي ماعاد قويت أقوم !!
المهم البنات اللي ماجابوا وقفوا
قلت : أبلا !! أنا جايبة كل شيء بس ناقصني الألوان بابا كان مشغول !!
قلت : أوقفي أوقفي
المهم صفينا طابور وبدا العقاب
ومع كل صوت سطرة ينسطر قلبي
لما جاء دوري قالت : افتحي يدينك عشان مرة ثانية ماتنسين
وأطالع في يديني البريئة الزعنطوطة حرام والله تنضرب !! وأقول في نفسي : آه من يجيب يدين أبوي عشان مرة ثانية ماينسى
وأفتح يديني وعينكم ماتشوف إلا النور
أخبر راحة يدي غضة بضة
بقدرة قادر صرت أشوف رية (( رئة )) كل شيء أحمر
طبعاً لو تنتفني ما أصيح مسوية فيها أم عنتر <<< زوجة أبو عنتر
وأرجع لمكاني وأنا ما أقدر أصك يدي من الوجع جعلها الوجع هالأبلا
خلصت الحصة وعلى طول عالبرادة
أطفي حرارة الضربة
وانتهى اليوم ورجعت البيت
وأعلم أبوي بالسالفة
قال ليه ماقلتي لها إني مشغول <<< بالله !!
المهم مالكم بالطويلة ,, شبيت في أبوي أبيه يتدارك الموضوع ويجيب لي الألوان لايجي الأسبوع الثاني وأنا مامعي !!
ونفس السيناريو يتكرر :: بابا جب ,, طيب يابوي
لما جت حصة الرسم الثانية
وأنا ماجاب لي هالبابا ألوان خشبية !!
لااااااااااااااااااااااااااااااااااااااا ااااااا
دخلت الفصل ووجهي أسود ونزلت المعمل ووجهي مفحم من الروعة
ماقدرت أجلس قدام
رجعت ورا عند الشماحيط<<< طبعا كانت أعمارهم أكبر منا <<< تخبرون الجيل القديم وتفاوت الأعمار في الدراسة
وجلست جنب وحده إلى الآن وصورتها محفورة في ذاكرتي !!
اسمها موزة <<< ياجعلها بعد الموز كله واللي زرعه واللي زرطه
قالت : ريم روحي قدام !!
قلت : لا خايفة تضربني الأبلا ماجبت ألواني !!
قالت : خذي ألواني وروحي قدام !!
!!!؟؟؟؟؟؟؟؟؟؟؟
قلت لا بعدين بتضربك أنتي
قالت مايخالف أنتي مرة وأنا مرة <<<<<<<< ببتسي حسبي الله عليكم ذكرتوني بهالموقف تسني أعيشه مرة ثانية
وتلزم علي وأنا أعيي <<< مسوية فيها شمرية <<< روحي مناك بس
عاد بحكم فارق السن والطول طعتها من باب احترام الكبير <<< بالله
وآخذ ألوانها وأروح قدام
وتجي السعلوة
قالت : من اللي ماجابت أغراضها توقف
وأطالع في موزة وهي واقفة وينعصر قلبي
وش ذنبها تتحمل عني ألم المسطرة !!
ضربتها الأبلا وكأنها والله تضربني
والمصيبة قامت الأبلا تمدحني لأن أغراضي كاملة وقالت لهم يصفقون لي جعلها تتصفق !!
بصراحة كان الألم النفسي أشد علي من وجع المسطرة <<< الله من الصدز
موزة فديتها ما أدري وين أرضها من سماها الحين
عسى ربي يسعدها ويوفقها في الدنيا والآخرة
رجعت البيت وأنا حاقدة على أبوي
قلت له : حرام عليك يابابا <<<< تسني مصختها بالهياط بس خلاص قضيت أبشركم من سالفتي
وأعلمه بالسالفة عاد مدري هو تأثر ,, هو شرى لي ألوان على طول ,, هو أنا تسطرت مرة ثانية
شريط الذكريات وقف هنا ماعاد أذكر شيء
كل اللي أذكره
إن فيه ناس يملكونك بمعروفهم مهما كان بسيط
لكنك تظل أسير لأخلاقهم وجمايلهم وأفضالهم عليك
موزة زميلة فصل ماكانت من ضمن صديقاتي
لكن معروفها خلاني أعتبرها أشد من أخواتي
وذاكرتي اللي طبت الفيضة نست كل شيء إلا موزة !!
حتى معلمة الرسم نسيتها ونسيت اسمها لكن مانسيت موقفها الإجرامي من بنات صغار في عمر الزهور<<< تكفين ياستار صغار
وبس
خلصت السالفة
أبيكم لاهنتوا تدعون لغاليتي موزة هذا أقل شيء أقدر أقدمه لها عقب هالعمر كله <<< وهم وش دخلهم بتس أنتي وموزتتس
أنتم كريمين وأنا أستاهل
ادعوا لها وبيقول لكم الملك ولكم بمثله
الله يسعدك ياموزة ويوفقك
بالله هالمذكرات التاريخية ماهيب أحسن من مواضيعكم عن الرجل والزوج
رد مع اقتباس
المشاركة الأصلية كتبت بواسطة هنـ alqadi ــد
المفضلات