صدناك ياالسنجاري
وانت تقول أناماأقصد بالحريم
احبابي وزملائي وزائري هذا المنتدى
تحية من الأعماق
واستأذنكم
بهذه المقالة وهي عن السنجاري
اللي قالو لي انه مايقصد بالحريم ابد.ابد
لا.ولا يلتفت لهن
وانا أصلا ماصدقت هالكلام وشلون بني آدم
ولا يقصد بالحريم ولا يلتفت لهن
واللي عاد مطينها معي هو ان كل الحريم
مايصدقون يشوفونه الا ويلاحقونه علشان يقصد
فيه
المهم انا وصلت عندي
وقلت والله انا مهمتي كصحفي"كثر منها لا.صحفي ولا
شي"اني اكشف الحقيقة للقراء والا ليش يقولون
الصحافة مهنة المتاعب وقلت لازم ادور عليه
وامس من فضل ربك رحت للملز والله وامر مكتبة جرير
وخذ نسف من هالكتب
والله ويوم التفت على يميني
ياهالوجه اللي ماهو غريبن علي
وهو يقوم يصدد عني ، والله ووراه ووراه وهو ينزل
مع الدرج وانزل معاه
وربك واصيده عند المحاسبة
ويوم طلعنا برى
وانا اتمسك فيه واحلف عليه ال يقلط معي للبيت
وهو يقوم يحالف انه مشغول ولا يقدر؟؟
قلت له شف والله لتقلط معي لو ياصل شرها
السماء
نعنبوا دارك ماخليت ديرة ورجال ماسألته عنك
تعال معي بس تعال نبي علومك
المهم قلطنا للبيت والله واسويله هاكاالفنجال
اللي ماسواه ابن عبيكة ( الله يرحم الميت منهم ويحفظ
الحي)
وخذ تحايا وترحيب.
ويوم خلصت التحايا سكتنا ولا أدري من وين ابدأ
قلت عاد ابسأله "دايركتلي"عن الغزل والبنات
واقوم ابدا بنفسي لعله يجي منه شي
وخذ تخبيص ن هالسوالف
ياوالله الرجال ماهو يمي
وياكنه مستنقدني
قال ماعندك غير هالسواليف شي
قلت بلى وش تبي
آمرني أمر
قال نبي سواليف الأولين والمغازي اللي تطرب البال
قلت الله واكبر عاد قايلينن لك اني غازين مع جيش ابو
حنيك ؟؟؟
والله وهو يضحك هاكالضحكة اللي دمعة عيونه منها
والله وابرد بمكاني ماادري وش السالفة
قال لا.لا.يوم صارت علومك هالون
خلك على سوالفك الأوله
قلت السوالف عندك اجل وحظيتك ياطويل العمر؟؟
لكن عاد هالحين ابألك عن هاللي انا اسمع؟
هو صحيح انك ماتقصد بالمزاين ابد.ابد
وانك ماتعطيهن وجه
وهن يلاحقنك من حدة لحدة
وانك تتهرب منهن
قال ومن قالك هالكلام
قلت بس عطني العلم اللي يجمد على الشارب تكفى
ابيه ياخوك سبق صحفي اتنومس به عند ربعي ؟؟
قال ياأبو يزيد تكفى لاتحرجني
وتفضحني عند عباد الله
ولا فيه داعي لهاالسواليف
قلت مافيها شي ياطويل العمر
خذ راحتك وعطني علومك
قال والله مااردك وانت عازمني ابشر؟؟
نعم …صحيح الكلام اللي يقول اني اأعشق المزايين
ولا أقصدبهن ،ماهو والله ماهو كرهن بهن لكن والله
ماعندي وقت وبعدين انا والله حاشمن حريمنا
ونسوانا
وخواتنا ؟؟؟؟
قلت لا يبعد حيي وميتي هذا العلم السنع لايبعد
بصري الوضيحي وطقته ؟؟؟
هاللي الواحد منهم ماينومن على حريم جاره؟؟
اويلي والله يالسنجاري
كثرلي من هالحكي؟
قال لاتستعجل يابو يزيد ترى المسأله ماهي خالية
قلت وشلون
قال والله يابو يزيد خله على الله
انا والله تراني خالفت كلامي مرتين بس
قلت افا …افا 11111
وشلون!
قال انا اعلمك
تكفى يابو يزيد لايدري احد ولو ماهو انت كان والله
ماقلت شي ولا علمت
قلت ابشر ""سرك في بير ""
قال هذي وحدتن يقاله بنت ابن فضيل ومشهورتن
بالزين
لا يابو يزيد111
وشايفتن نفسه ومع ذلك مزوح ولعوب
قلت وشلونه ياخوي مثل ليلى علوي
ولا باسكال مشعلانية
لا عاد انا مااعرف الا هالثنتين اللي ماني بقايل؟؟؟
والله وهو يجر هاكالونة وهو يتنهزرن ويقول لي
كيف يابويزيد تقارن هلشرموطات ببنات الحمايل
والله انك ماتستحي على دمك وهو يفز يبي يقوم
والله واقوم احب على راسه قلت لاتشره علينا حنا
ياعيال هالوقت لعبن بنا هالفضائيات والله ماغير
مقابلين هالدشوش ياما يذن الفجر
لا.عاد ليتنا نصلي بالمسجد زين ان صلينا بالبيت
"استغفر الله"
المهم حلفت عليه وجلس
وقال ابرجع لبنت ابن فضيل اللي تعرضت لي وانا عند
غنمي والله واعترضتني ويوم شفته وانا اقوم اروغ عنها
لكن مافيه فايدة؟
المرة شكله باليتني والله وهي توقفني واتقوم مازحني
ياوالله هاللبس اللي يحير وهالقرون اللي الى المحزم
ورابطتهن بلهن مقرونة ،ومبينتن صدره ومفاتنه
وياوالله مامنها فكة وحنا نتواقف نسولف
وخذ من هاالكلام المعسول ياما غابت الشمس
حتى غنمي والله ماادري وين راحت؟
والله ويوم شافت انها لعبتبي وهي تقفي من عندي
وياوالله اني مولي ماني رفيقك الأول
المهم والله وانا اقصد بها هالكالقصيدة وانا ارسلها لها
واقول فيها:
والله يالولا باقي الناس لا شير****واخاف من ناسن
اتنثر اقشوشه
ل اقول عجو بالبني الغنادير****وياويل من له عشقتن مايحوشه
الردف شط حويرن مابعد ذير****امه جضوض وراعيه ماينوشه
والا يشادي نابيات الحمارير****بعد الهبوب كاربته الرشوشه
المهم اني ياطويل العمر عرفت انها بس تبي تهيضني
علشان بس اقصد بها .
وثاريها بعد تلعب علي حاطتن حق مع حريم القطين
يوم قالن لها ان خلف ابو زويد مايقصد بالحريم قالت
لهن انا والله الا اخليه يقصد بالحريم من ورى
خشمه.
وهذا اللي صار.
لا والثانية ابعلمك به يابو يزيد:
هذيبنت الغيثي يوم نزلنا هاكاالسنة على لنا خبرا ماء
ووردت الغنم ابيها تشرب وانت تعرف الخبرا مجمع
سيل وصافية ويوم وردت الغنم تشرب وياوالله
اكاالمزيونة اللي ماشافت عيني مثلها ويوم قربت
للخبراء وهي ترفع ثيابها عن السيقان وهي تدش
بوسط الماء
والله اني اشوف فوقي افخوذه 111
والله واقوم اصدد وراك يابنت وراك يابنت خضيتي
الخبراء على الغنم
وياوالله ماترد علي .
وهي تنصاني ويوم قربتلي قالت السلام عليك يابعد
حيي وميتي ياابو زويد؟؟
انا ل مدة اسأل عنك ومشتاقتن لشوفتك ياعزوتي؟؟
وانت هالحين تقابلني بهالكلام وتقولي وراك لاتجين
وراك ،هذا والله من شين حظي،،،،،،
والله يابو يزيد وهي ترجع مع اثره واسمعها تحسف
وتتويل؟؟؟
وانا هالحين والله ماادري منهي هالمزيونة ولا شفته
مرة ثانية؟؟
والله وبعد عدة اشهر نشت "جفت" الخبراء والله وحنا
نرحل ،وانا تحسفت ليه ماسألتها منهي بنتله .
ماهي عليك طويلة ضيعتني هالمزيونه اللي مااعرف
اسمها ويوم من الأيام توافقت انا ولي واحدن جاين
طراش قاي بالله يابو زويد وشقلت بفلانه بنت الغيثي
اللي قطعت عليك الخبراء؟؟
قلت الله يعقل عليك والله اني انشد عنها ولولاك
ماعرفتها ولكن قلت فيها هالقصيدة وصلها لهم :
ياراكب اللي كن تدرا من ايده***حمرا على السندا ضرومن بشوعي
ركابها يوصل كلامي امكيده!****حبه امخلي بالضماير امزوعي
كلن نهار العيد يلبس جديده****وانا نهار العيد عيدي دموعي
ياناس هنيت القلوب البليدة****ماولعنه زاهيات الردوعي
جون جمع من كل سموا بديدة****وجانا البلا من ذيهبان النجوعي
الراس ذيلاللي تلوج ابحديده****شقراء اترادي من هواها الفزوعي
والله وبعد ايام وانا اطبق على ابوها خطيب بعد
ماارسلتله قصيدتن ثانيه؟
تقهويت عنده وقال وش عندك يابو زويد؟
قلت ماعندي الا سلامتك .
جاين اخطب بنتك "فلانه"
قال ابشر والله وتستاهله من عندي
لكن اصبر شوي؟
وهو يصوت لها من وري المحجر ؟
وهي ترد سم،سم…… يايبه
قال لها يابنتي هذا خلف ابوزويد السنجاري جاين
يخطبك وانتي تعرفينه شاعر
واخاف ان رديناه يقصد بنا وانتي بالخيار ؟
قالت يايي والله هو مايصلح لي زوج ولكن حسب
مدحك له وعنوته لنا لكم مني يتزوجني ثلاث ايام حق
الضيف وبعدها ماتلزموني عليه ؟
قالي وش رايك يابو زويد؟
قلت موافق ؟
والله وادخل عليها ثلاثة ايام؟
ويوم كملتهن قلت لاأبوها ان كان هي ماحملت ترا
طلاقها بيدك وان حملت فهي زوجتي؟
وانا اودعهم واسافر ولكنها
حملت وهالحين هي ام عيالي؟
احبائي وزملائي اعضاء المنتدى
وزواره
شكرا لإكمال هذا المقال
واسمحو لي بهذه الأسطر التالية:
نحن نكتب لنجاح الشبكة
nالغالية علينا
وكم نحن بحاجة الى النقد الهادف
سواء مع او ضد الكاتب
وبدون النقد لن نتطور
وانا كلي امل بان ارى
وجهة نظر كل من يقرأهذا المقال
سواء معي او ضدي فهو حتما سيفيدني
وسلامتكم؟
وعلى المحبة نلتقي
رد مع اقتباس
المفضلات