مستشفى المضايف

[ســـعود]

ريال قرب المايك

لاهنت يا جدي

س1/ هل سبق ان سويت عمليه ؟ اذكرها ؟


يارب لك الحمد والشكر الى الان لا


س2/ موقف محرج او مضحك او محزن حصل لك داخل المستشفى أذكره لنا .؟!

الموقف اللي ابي اذكرة اختلطة بة مشاعري

مرة رحت ازور ابو خويي وكان مصابة جلطة دماغية عسى ربي يبعدكم عنها وكان لة كم يوم طالع من العناية المركزة وعيالة مستانسين انة تعدى مرحلة الخطر

المهم كنا جالسين عنده وهو مضيع يا الله يعرف اللي يجية شوي جاء موعد الاكل للمرضى وجت الممرضة وحطت الاكل لة وكان مع الاكل لبن وهو يفتح البن ويشرب منوه جغمة وهو يضرب الممرضة با البن با الوجة ويقول ابعدو ها الياهودية عني

هنا انا غمضت عيوني وتسني ما شفت شي

س3/ تحب تروح للمستشفى أول ماتتعب أو تجلس تتحمل .؟!


ما اروح لحد ما اكون طايح مرة وحدة ولا بعد لازم يسعفن احد او ما اروح
اكرة المستشفيات

س4/ متى آخر مره مرضت ؟وش نوع المرض.؟؟!!


العام صخونة وزكمة

س5 / متى آخر مره رحت للمستشفى ؟!



قبل كم يوم ابي ازور الشبث يوم انه مرقد وبغا يموت انا والجثري لقيناوه منحاش
س6/ هل سبق وان تبرعت بدمك ؟ ولماذا ؟

نعم مرة لصديق مسوي حادث ويبون يسون لة عملية ومرة يوم طلعت رخصتي غصبوني غصب اتبرع يا اتبرع با الدم او مافية رخصة






س7/ علاقتك مع دكتور الاسنان ..؟؟

ولا عمري شفتوة


س8/ هل تمنيت يوم أن تصبح دكتور ؟ اي تخصص ؟!

لا

س9/ كلمه لكل مريض .!
عسى ربي يشفيه واحرص على تناول الدواء بنتضام وتأكد من دوائك قبل لا تاكلة

والسلام عليكم ورحمة الله وبركاتة

[ســـعود]

واذا لحد الان ماشين في الموضوع ولا استضفتو الجثري خلوة يحضر هنا

[أحمد]

مرحبا
انا آسف على تاخيري
شكراً ابو رهف
شكراً كبرياء انثى
شكراً صلفيق


س1/ هل سبق ان سويت عمليه ؟ اذكرها ؟

والله ماكان ودي يجيني هالسؤال
لاني بين ثلاث خيارات
اقول لا ويعرف البعض اني ماقلت الصدق
اقول ايه بس مابي اقول وش العمليه وتبداء التساؤلات ليه مايبي يقول يمكن مخجلة او في مناطق مايبي يذكرها
او اني اقول الصدق وانا مابي
بس تدرون

انا سويت ثلاث عمليات



1- جراحة في الرئة بسبب حادثة قبل 15 سنه
2- نفس العملية اعيدت بعد اسبوع بسبب خطاء في خياطة الجرح بعد العملية الاولى
3- عملية تبرع بالكلى (تكللت بالنجاح ولله الحمد) قبل ثلاث سنوات تقريباً
وهذي الثالثة اللي ماكان ودي اسولف فيها

س2/ موقف محرج او مضحك او محزن حصل لك داخل المستشفى أذكره لنا .؟!

هو موقف يجعل الانسان يستحظر قدرة الخالق سبحانه
كنت مرافق في المستشفى لمدة اكثر من اسبوع
وكان احد المرضى بالفشل الكلوي تجاوز الستين من العمر
كان يذهب للغسيل بمساعدة ابنه على العربه
وفي احد المرات اثناء الغسيل تبين للمختصين بان المريض لم يكن بحاجة الى الغسيل هذا اليوم
بعد ان راجعو سجل مواعيده للغسيل استغربوا لما تاكدو بان هذا اليوم هو اليوم الموافق اللغسيل
فاعيدت له بعض الفحوصات التي بينت بان الكلى اصبحت تعمل بشكل طبيعي
الصوره اللي ماراح تغادر ذهني هي التغير الكامل لوجه هذا الرجل بعد اقل من ساعه على سماعه خبر بانه لم يعد بحاجة الى غسيل كلى
والله ياجماعة الخير عادت الحياة لوجه هذا الرجل بشكل عجيب

سبحانك يارب

س3/ تحب تروح للمستشفى أول ماتتعب أو تجلس تتحمل .؟!

اجلس اتحمل

عندي عقدة من الابره
والله ان مشرط العمليه اهون من الابره
المشرط ماياصلك الا وانت بعالم ثاني
بس الابره تاصلك وانت تتفرج


س4/ متى آخر مره مرضت ؟وش نوع المرض.؟؟!!

تصخنت الشتاء الماضي
مادري عاد الصخنة تعدونه مرض ولا لا


اللهم لك الحمد على كل شي


س5 / متى آخر مره رحت للمستشفى ؟!

الاسبوع الماضي لمراجعة اوراق ادارية تحديث بيانات الوالده في المستشفى


س6/ هل سبق وان تبرعت بدمك ؟ ولماذا ؟


نعم تبرعت
بس لماذا انا اقولكم امثله
1- احد اقاربك بحاجة الى دم لاجراء عمليه
2- اصدقائك قررو التبرع وانت معهم بالسياره
3- يقوم المستشفى يوزع منشورات لتحفيز العسكريين اللي انا واحد منهم للتبرع بالدم وتكون هالمنشورات تحمل صور لممرضات منقبات ياخذن العقل هن اللي يقومن بسحب الدم من العسكر
اكيد ماتدري عن نفسك يالواحد الا وانت على السرير تتبرع بكل روح رياضيه


ياربي تقبل صالح اعمالنا






س7/ علاقتك مع دكتور الاسنان ..؟؟

والله الدكاتره كلهم ماودي اشوفهم وقت دوامهم



س8/ هل تمنيت يوم أن تصبح دكتور ؟ اي تخصص ؟!
الصدق
لا
لاني دريت اني ماني وجه طب من يوم نجحت باولى ابتدائي بتقدير جيد

س9/ كلمه لكل مريض .!

أسأل الله الحي القيوم ان يمن عليك بالشفاء العاجل
وعليك ان لاتحزن اخي لان الله اختارك انت ليبتليك
فكل ماأصابنا من الله خير لنا

تري مكاسي

[أحمد]

نسيت

اختار بعدي صديقي المشرف العام

<<<< ادعس يالواثق

واذا ابو سلطان مشغول فالخيار لصاحبة الموضوع او مشرف القسم

وتري مكاسي

[صلفيق]

^
^
يامرحبا وهلا بالجثري
وحيّاك الله بالمضيف الطبي
شرّفت وآنست يالعزوة ..
وكل هالموضوع بركة اللي جابك

>>> الغالي الجثري..
أنا ومجموعتي هنا نعيش الديموقراطية الحقّة ,,, وطالما انك طلبت صديقك أبو سلطان
ههههههههه مجهّز طلب لالأنتربول ، لالقاء القبض على المشرف العام في حال اعتذاره بالأنشغال..

غالي وطلبك مجاب !!
نبي نشوف ابو سلطان وشو مسوي من عمليات !!



كل الشكر لك،،،

[المشرف العام]

س1/ هل سبق ان سويت عمليه ؟ اذكرها ؟

ج1/ الله يكفينا شر العمليات ، قبل كم سنه شلت المرارة ، وبعد ماشالوها مالقوا فيها حصى ، عاد ام سلطان حاستهم حوووس ، وانا مادريت بالسالفه إلا بعد ماصحيت ثاني يوم


/


س2/ موقف محرج او مضحك او محزن حصل لك داخل المستشفى أذكره لنا .؟!

ج2/ ماغير سالفة حصى المرارة وغرفة العمليات اللي حاستها ام سلطان الله يحفظها لي . . تبي حلق اللي سوى لي عمليه ومالقى حصى خخخخخخخخخخ


/


س3/ تحب تروح للمستشفى أول ماتتعب أو تجلس تتحمل .؟!
ج3/ اول مااحب اروح له ، بس من تالي لو اعطس اكثر من مرّة يمكن خطير اروح لهم

/


س4/ متى آخر مره مرضت ؟وش نوع المرض.؟؟!!
ج4/ اللهم ادمها نعمه واحفظها من الزوال

/

س5 / متى آخر مره رحت للمستشفى ؟!
ج5/ من فتره ، اتبرع بالدم

/

س6/ هل سبق وان تبرعت بدمك ؟ ولماذا ؟
ج6 / كثير ، تجديد الدم اشوف انه عامل صحّي

/

س7/ علاقتك مع دكتور الاسنان ..؟؟
ج7/ مالي علاقه مع دكتور اسنان ، انا اغلب علاقاتي مع دكتورات الاسنان <<<< يمزح

/

س8/ هل تمنيت يوم أن تصبح دكتور ؟ اي تخصص ؟!
ج8/ لا والله ماعمري تمنيت

/

س9/ كلمه لكل مريض .!
ج9 / ما أصابك ماكان ليخطيك ، وما اخطاك ما كان ليصيبك ، فأحتسب اجر الصبر على الإبتلاء


تسلم يالغالي صلفيق على التذكير ، وهيّن احفرلك يالجثري لك يوم ويجيبك الله

/

الاختيار من عند اخوي صلفيق ، انا الصلاة قربت ولا ادري من شارك قبلي

كان لازم ، اصبروا باتسر او عقبوه

[صلفيق]

مشكور الغالي ابو سلطان
وبارك الله فيك استاذي القدير
ويعطيك ألف عافية
حقيقي عاجزين عن الشكر والتقدير لشخصك ولكل من شارك هنا
وجودكم هو مبلغ سعادتنا جميعا
ولا أنسى الشكر والتقدير للأخت كبرياء أنثى {صاحبة الموضوع}..

طالما ان مشرفنا العام ترك الأختيار لي..
من قدّي هالحين !!!

وأظن مانعرف شي مشرفتنا الرياضية [أو مدير كرة المضايف] بسمة العز
وأظن من حقنا نشوف صحتها ونتطمّن عليها..!
بسمة العز .. أهلا بك هنا

[صلفيق]

تم حتى الآن استضافة..

صلفيق ،،، ايثار ،،، الشبث ،،، راع الجمرية ،،، شموخ شمالية ،،، بعد ملي ،،،
عبدالرحمن ،،، ليالي نـ ج ـد ،،، عبدالله الجعيثن ،،، الشيخ عبدالله الواكد ،،،
ريال الفسحة ،،، سعود ،،، الجثري ،،، ابو سلطان.

شكرا لكل من شارك
وشكرا لكل من مر من هنا..

[بسمة العز]

اولا احب اشكر اختي كبريا على الموضوع المميــز
واشكــر دكتــورنـآ على الدعـوه كلك ذوق
واتطمـن صحتـي OK دآمني اهلاويه <<شدخل الاهلي


الاسئله:-






س1/ هل سبق ان سويت عمليه ؟ اذكرها ؟


لا الحمدلله..


س2/ موقف محرج او مضحك او محزن حصل لك داخل المستشفى أذكره لنا .؟!

مايحضرني مواقف.. لان بالعاده قليل زياراتي للمستشفى الحمدلله
واذا رحت بتكون عاديه..
احس المواقف بتكون اكثر مع الناس الملاقيف هع
بس حلوه حياتهم ع الاقل فيها اكشن هههههه


س3/ تحب تروح للمستشفى أول ماتتعب أو تجلس تتحمل .؟!

لا بصراحه انا ابد ماحب المستشفيات ولا أحب ريحتها
وحتى لو كنت تعبانه مااروح لاني لو رحت احس ان المرض الي فيني يزيد بس
من ريحة المستشفى
يعني ماحب اروح الا اذا مرآ موقادره اتحمل..


س4/ متى آخر مره مرضت ؟وش نوع المرض.؟؟!!



قبل فترا حراره عشان الاجواء متقلبه

س5 / متى آخر مره رحت للمستشفى ؟!




آممممممم قبل يومين رحت مع اختي كان ولدها تعبان شوي



س6/ هل سبق وان تبرعت بدمك ؟ ولماذا ؟

لا ..لاني مااحب الابره






س7/ علاقتك مع دكتور الاسنان ..؟؟


مالي ايت علاقه.. بس عشوقه تقولي لازم تروحي حتى لو محافظه
على اسنانك روحي كل 6شهور


س8/ هل تمنيت يوم أن تصبح دكتور ؟ اي تخصص ؟!

لا ..لاني ماحب اشوف احد مريض قدآمي
الله يعين اللي يشتغلون بالمستشفيات..



س9/ كلمه لكل مريض .!

الله يشفيــكم ويبعد عنكم كل مكــرووه












اممم آختــآر هند القاضي.. لو كـآنت مشغوله برضو اترك لك الاختيار دكتورنـآ الله يعينك علينـا^_^






اشكــرك مرآ آخرى دكـتورنـآ .. موفـّـق





احتــراامي لك

[صلفيق]

شكرا لك أختي بسمة العز
وان شاءالله يفوز الأهلي... >>> اطلع برا ـ من عرفك ياصلفيق للكورة !


وبانتظار ادارية المضايف المتخصصة "هند القاضي"..



كثيريييين أجمعوا أنهم لايحبون رائحة المستشفيات..

أحد يعرف ماهي تلك الرائحة التي نشمها أول ماندخل المستشفى ؟




كل احترامي،،،