يا متعب الخطوة
يا متعب الخطوة على الدرب، لاهنت
وشلون تحزن والشمال بجهاتك
جرب تمارس ضحكتك وين ما كنت
واحزان عمرك سترها في عباتك
الريح قامت وانحنت وانت ما قمت
يا حي لا تنهار قاوم وفاتك
تبي ترد الريح وتبعثر الصمت
ان ما لقت بك روح شالت رفاتك
ياكبرها لا صاح داعيك، وين انت؟
جاينتخيك ولا لقى الا عصاتك!
أدري وصلت آخر مدى الصبر وتعبت
ما به نكد في رحلة الهم فاتك
وانا بعد... خاويت الايام وندمت
الله كم تشبه حياتي حياتك
هذا زمان الفقر والهم والكبت
ما هو زمن: سم، وتدلل، وجاتك
أما انت في واقعك سلمت وامنت
والا اعترضت وعشت في ذكرياتك
يا متعب الخطوة بوجهك تمعنت
لونك بهرني وأدهشتني صفاتك
لو المرايا منصفة ما تلونت
كنت أبيض من مولدك لي مماتك
بعض المرايا تعكسك مثل ما انت
والا بعضها ما يوريك ذاتك
---------------------
صباح النور
هربت من الصباح اللي يسمونه صباح النور
وزبنتك يا الظلام وستر مجروح الزمن ثوبه
لفيتك ما سمعت هل النصايح والعتب والشور
على زين النهار اللي لقيت اشتقت لغروبه
تجاهلت الشموس ولا التفت لنورها المنثور
وتلقيت الطريق المظلمه دوب القدم دوبه
حسبت اخطاي وعيوني مداها للعصا والسور
صحيح الشوف لكني خذيت من العمى اسلوبه
أنا لي بالعمر مبدأ ثبت بي والسنين تدور
ملبسني لباس المنتصر والنفس مغلوبه
يجملني بضحكه في صداها خاطر مكسور
يغني في شماله والدموع تهل بجنوبه
أنا خصمي زمن وأقوى سلاحي حظي المعثور
اسوق به الركاب محمله وترد مسلوبه
يعاند غيرة فيني ربت صدق وثقة وغرور
تسامت في زمان يفرش الهامات بدروبه
ادور بالوجيه المقبله وجه حياه يثور
أبي منه احتجاج على الزمان المر وعيوبه
تهجيت الملامح والسطور اللي قريت سطور
طليق ودخلتني في قيود الذنب والتوبه
تصدد بي عيوني من حياها والدروب سفور
توريني وجيه في زوايا الذنب مصلوبه
تقلبها اليدين العابثة كن الوجيه صخور
عليها ذكريات مؤلمة بالدمع مكتوبه
أنا وشلون ابا استوطن رحابك يا صباح النور
وانا فيني وطن ينزف قبايل دين وعروبه.
مما راق لي لمهدي بن سعيد.
رد مع اقتباس
المفضلات