ياباشة الغيد زينك بس منهوله
والناس بعيونك النجلا سواسيه
هانت شوارب قبل تلفين مفتوله
وماتت مراجل تشوف العز قدسيه
لاصرتِ مع حسنك الجذاب مكفوله
ومن الجواهر وزين اللبس مكسيه
وش لك سؤال الشعوب وليه مخذوله
وليه النتائج تجينا دوم عكسيه
خلي سيوف الغنج لليل مسلوله
لاصار جن التخاذل بيد انسيه
كل ماتميع انثناءة خصرك سيوله
مطامع المجتمع تزداد خسيه
فديت فتنة جديلك لانثنى طوله
في ليلةً من لياليه الرومانسيه
ايزعزع امن المواطن داخل الدوله
اويرهب من الحلا ضباط الامسيه
رمشك حكمنا فقيرً ابسط فعوله
يهزم فخامة حكومتنا الرئاسيه
مشاكل اوطاننا بيديك محلوله
منجم خياناتنا شيكات ماسيه
ليل الوطن لو بكى من ظلمك زحوله
يسلب بقايا مطالبنا الاساسيه
جيشً غزا دولتك لو ماحدً حوله
شجاعته تفتقد ارضً حماسيه
ماينفعه لو حفت من شانك رجوله
مواطيً سيرها بدروب رجسيه
جف الكفر والضنون البيض مبلوله
اسلامها ماتبع دين المجوسيه
يسري بنا ذل حاضرنا ومفعوله
ايرتب اوراق خيبتنا السياسيه
غابت مواري سؤالً فاقت ذهوله
تربة وطن ماسقاها وسم جنسيه
قانون لعبه كسب من دمنا جوله
جرحً نزفنا غثاه اوجاع حسيه
قصة تراب الوطن واحلام مقتوله
يشبه قهرها نهاية حب (عبسيه )
تفاهة الركض ماتعطيك بسهوله
مجدً لقى بالامل اخر مراسيه
ارباب فكرً يديهم شبه مشلوله
من بطش منهو تجود في كراسيه
ماتصلح الحال يدًّ منه مغلوله
حرية اوطاننا لليوم منسيه
لو كان لاصواتنا اسماع مسؤوله
ماصابنا من مرار الوقت نفسيه
رد مع اقتباس
المفضلات