مراهيش نوك ماتبل الورق ياهنّ
لها اليوم تاسع يوم تبرق ولا سالت
يقولون لا ضاقت عليك الوسيعه غنّ
وانا اقول شفت مقرد الخلق وش قالت
انا البارحة من يوم غابت الين اذنّ
تحلوى عيوني للكرى مير ما احتالت
يثوع النعاس من ارمد الجفن يوم تعنّ
سراميد غيضٍ بالحشا حبلها فالت
ماغير اتدرق باسمر الليل لا لجنّ
هجوسٍ تخطرت هيبة الجرح و اختالت
هجوسٍ ليا قامت تكرب وقمت آونّ
تصرم معاليق الحنايا ليا انهالت
ذلول الهجاد اللي نبت في جماها سنّ
من العام تثعى في ضلوعي ولا زالت
حلال الذهاب الى استشاطت لبسها جنّ
يا كيف آتجوّد في نحرها ليا مالت
و انا يوم امسّ بطانها ما عليّه منّ
يدين الهوان ان حطت اللوم وان شالت
ابازم نفسي عن طمان هواه مصنّ
واعدي لجفني و ارقب العين وش خالت
عليها الملام ولاعليها السلام ابدنّ
يدينٍ تبي قصرة يديني ولا طالت
بعد مانفضت غبار صدري ولد ياهنّ
بعد ماروّت روحي من الغيض و اكتالت
يقولون لا ضاقت عليك الوسيعه غنّ
و انا اقول شفت مقرد الخلق وش قالت
مساعد الرشيدي
رد مع اقتباس
المفضلات