ستلايت
زارنا وفد ياباني قبل 15 سنه وقتها كنا نمشي في منطقه سكنية وستغربوا الضيوف اليابانيين من شكل اطباق (الستلايت او الدش )..
اللي حاطينه فوق السطوج,
قال ليش كل هذي الاحمال حاطينها فوق سطوح بيتكم . رديت عليه بذكاء كالعاده
وكنت اظن بهذاك الوقت ما عندهم ستلايت ..
قلت لا جل نشوف العالم من الفضاء !>
وخيالي راح لابعد ونويت اصدر لليابانيين دشاتنا وصير وكيل لهم
قال الياباني (ادري ) تشوفون فيه محطات العالم , بس ليش ما تحطون شي اصغر ..بدل هالمناظر البشعه ومخربه جمال بيتوكم >> فعلا هو صادق لان الستلايت فوق بيوتنا صار محميات لطيور والحمام وقرفهن ..
رديت عليه
قلت فيه اصغر من هالشي ..
>هونت عن تجارة التصدير واالحين بصير مستورد ..
قال ايه انا عندي وايرلس بحجم القلم !
يجيب قنوات العالم لكها
بعد مرور اكثر15 سنه للحينن ما شفت احد عرض علينا مثل هالتكلنوجيا
..
عروس
باعراسنا تشوف الهوايل واشكال ربعنا تتحول كانهم من اهل الثراء الفاحش ..او اللي يسوون حفلات تنكريه
اشكلهن تتحول وياالله سترك من العواقب تتحول لباربيات والوان اشكالهن شيطانية لكن متمكيجه ..
اما اسعار ثيابهن .. فعدّ ولا حرج
ماكأن هذي اللي لابسه ثوب بالف دينار ابوها أو زوجها انسان علي قد حاله ..
وطاير من عرس لعرس قصب يلحق ويدفع العانيه ..
فعلا تلاقي تناقض فيه فاحشتنا وحياتنا الاقتصاديه ..
الزوجه حياتها كحياة الطغاه تلبس وتشتري ,, وزوجها مفلس يدور احد يسلفه ...
وياليت تشتري شي يفيدها مستقبلا او يفيد عيالها ..
مجرد خامه تلبسها مره وحده وثاني تنتهي صلاحيتها ..
سالفتي قد لا يكون لها شاهد ..او مناسبه
لكن عندي سببين خاصين
الاول
قبل رمضان كنت حاضر عرس ولسوء الحظ صدف سيارتي قريبه من الصاله القريبة من قسم الحريم ..
وهذا العرس الوحيد تاخرت فيه صدفه لان كنت اسولف مع قريب وخذتنا السوالف ..وتاخرنا ..
طلعت اركب سيارتي ,,
لقيت (العريس والعروس)ومعاهم عجايز اثنين ! يحاولون يركبون العروس
السياره ولا قادرين !!!
مو قادرين يدخلون العروس السياره
المنظر كان مضحك تخيلوا شلون يحاولون يحشرونها بالسياره ..وحده تدفع والثانيه ترفع
سبب العطال والموقف المضحك هو (ثوب العروس)
إنا متزوج من 26 سنه , وشي طبيعي هالامور اتسغرب منها> فعلا انا لليوم اكتشف اشياء مو مصدقها تصير
في اعراسنا
نرجع لسالفة الموقف المضحك ..
بصراحه العروس كانت لابسه خيمه !! موثوب عرس ..
الفرق اللي شفته في خيمه العروس هو الرواق كان شفاف..
نقول خلص الموقف وعدا علي خير ولما
رجعت للبيت سألت الحجيه زوجه عبدالواحد ..ثوب العروس اللي الليله لابسته كم قيمته ..
قالت ما ادري بالضبط ما سألتهم لكن اكيد بحدود 700 دينار كويتي
ما ابي اوصف الموقف بالضبط واقول لكم شلون ركبت العروس لاني بصراحه اضطريت
انتظر تخلص مشكلتهم بحكم القرابه معهم ..
فلان شافنا وخلانا> مقولة نسائية مشهورة
السبب اثاني ..
كثير ما اسمع من الكتاب ووو غيرهم حنا العرب كنا وصنعنا
وقتحمنا الاندلس وخترعنا البنادول واسسنا التاريخ وو
ومن الهكلام الفاضي اللي ما يودي ولا يجيب ..
ابي افهم ..
ستلايت اكبر من بيوتنا حطينه فوق السطح وبعضنا يمكن
للحين ما ركبه ولا يعرفه .
وحرمه تلبس خيمه وتقول عن نفسها عروس ...
بالله عليكم اي اندلس واسبانيا وحضاره تتكلمون عنها !!
..
فكرة الموضوع مشربكه شوي وستعجلت فيها (اذن المغرب) ,سامحوني
وتحياتي
رد مع اقتباس
المشاركة الأصلية كتبت بواسطة الجثري
المفضلات