*-ضفره قبلة حايل بعد ماخسرت عنزه قمعه حسوا بالضيم وقالوا حتى حريمنا ماسلمن وبيوتنا ودلالنا ودبشنا خذوه كله شمر وبدوا يعدون العده لضفره وأرسلوا لجميع عنزه وحضروا من ينبع ومن خيبر مثل أبن مريخان والايدى والفقير والمرتعد بالأضافه للعواجيه ويوم علمت شمر بهذي الامور أتفق عدوان الطواله ومسلط التمياط وأقطعوا الرأي على أنهم يخلون السوادين ويهوشون هوش ساقه يما يطبون العراق وهم ينزلون على مفتاح الغيثي يبون يقنعونه بهذا الامر وقال لهم مفتاح يالربع حنا يامننا جينا العراق يمار قدامنا رجال مالكين الديره وماهم والله معطيننا ديرتهم وحنا تاركين ديرتنا وهذا نخلنا هاللي يويق علينا.. ديرتنا والله ماحنا مخلينه قالوا مابه مهاش يابن الحلال هذا حنا ذبح الجوع حلالنا وذبحه العطش والخوى والدهر وعنزه هاللي كل يوم نازل عليهم عرب وحلالهم وراهم ويامننا تكيلنا من العراق وتقوينا يمكن أننا ننخا شمر هالعراق يجون معنا ونستعيد ديرتنا مره ثانيه مثل ماأستعدناه بالتيم ..عدوان ومسلط يوم جاء تالي الليل وهم يشيلون يوم شال النزل الاول والثاني يوم راعوا يمار نزل الدغيرات بمكانه وهم ينهجون يم مفتاح يمار كبار الدغيرات هكا اليوم عند مفتاح ويوم أقبلوا على بيت مفتاح قال مفتاح للي عنده يالربع تروهم يبون يقولون والله مانرحل الا أنتم قبلنا لكن حنا نبي نحتج بأننا منشرين بقلنا وماحنا دافقين لبنا وهو يلوذ ورى الذرى وهم يحولون ويقولون وش علمكم مقيمين جلي ماحنا
معطينكم الخبر من أمس قال مبيريك والله الشيخ مفتاح أشوفه ماوده وحنا مابنا تقاسيم قالوا له أرحلوا والله مانخليكم وهو يحط مفتاح على شواربه ولحيته من رغوه البقل ويقول أنا أخو سلمى أنتم جيتوا وأنا أرغى قالوا وش ترغى قال حنا نبقل قالوا كيف تبقل وحنا قشنا على البل ومخلين السمارين نبي يزول لعنزه غديهم مايفزعون علينا بسرعه قال يامنكم جيتوا الجربا وشمر بالجزيره علموهم كان لهم رغبه بديرتهم وحنا ألى حول هالليله على هالهودات وحنا هذا نخلنا اللي يويق علينا مع هالتلاع وعنزه مخلين نخيلهم بخيبر وجايين صولتن علينا يبون ياخذون ديرتنا حنا هالحين نترامى وياهم وأنتطارد على ظهور الخيل وعقب نرد للسلاح الابيض وهمن بالعصيان والحصى وبعدين نتقاضب الشوش وعقبه بالسنون وأنتم مثل ماقلتلكم ياجيتوا شمر بالجزيره علموهم باللي قلت لكم وهم يتلافتون لبعض يمار عدوان ومسلط واحدٍ شيخ الاسلم والثاني شيخ التومان ويقول مسلط هالحين يبينا نهج ونعلم هل الجزيره يفزعون له وحنا عنده قال عدوان وش الراي قال الراي كلن ينزل مكانه واللي يصير يصير وهم يعارضون الجهامه وكلن ينزل بيته ويوم جاء النهار وهم يرجعون لمفتاح قالوا عنزه عندهم بوارديه وحنا ماعندنا اللي يكفينا وأمدهم بالبوارديه ويحفرون شمر متاريسهم ويصير المناخ وينذبح فريح ولدك يامبيريك توغل يم بيوت عنزه ويرمونه بهكا البندق وطاح من فوق فرسه وعلى هكاالطيحه ويستمر المناخ وتنهزم عنزه ويقول دايس الهقاز من حسين المجلا قصيدته اللي ماعجبت بعض شمر لأنه يوم يقوله وهو زعلان على بعضهم ويقول :
يادار ابو سميـط خلاتـس ياحيـف
فرز الوغى ذبـاح عجفـا سنامـي
اقفـى ولا خلـى بنجـد تحاسيـف
وابـوه وجـده مخربيـن الطعامـي
يامزنة غـرا نشـت لـه رفاريـف
تمطر على ظفرة مطرها انهشامـي
زبيديها روس المهـار المزاغيـف
وعشبه قـرون مسيحيـن الايدامـي
ونهجت اسر جموعهـم بالتواقيـف
يامـار وجـه جموعهـم بنخدامـي
ونحرت ربعي عايزين التواصيـف
يمـار بالزهـام والجمـع زامــي
اولاد على ذربت الحرب أهل كيف
حريبـهـم مايهتـنـي بالمنـامـي
ياقل ميـر قشوشهـن والتطاريـف
ردوا لنصـل مصقـلات اللجامـي
وانشهد ان أقلوبهم صمـع ياخليـف
يردون حوض الموت ورد الضوامي
وضرب بعيدان البلنـزي وتنجيـف
ياما أدبروا عنا خـروق الجلامـي
نطعن ونطعن دون هاك الحناجيـف
سلمى ورمان واجـاء والعصامـي
وياما ذبحنا بيـن الاثمـار وهييـف
تسعـرت دونـه عمـارٍ تسامـي
*-مليحه (كحله)وتصير كحله بين الدغيرات والعواجيه وهي أن عنزه قالوا يوم صاروا الدغيرات لحالهم نبي ناخذ الخاوه عليهم ويقول مبيريك التبيناوي
كـان خيـال الشقـاح التـلادي
قفى فحنا اللي نعيي على الـدار
مع غلمتن ماهولسـوا بالقيـادي
الا مايلفظـن عـدلات الاقـدار
أولاد علـي ناقليـن العـيـادي
فطايرن مايقبلن كـود الابكـار
لهادتـن للـي يــدور اللهادي
بنزل من المثلوث كان الدخن ثار
ويصبحونهم الدغيرات وتنهزم عنزه.
*-زبار وريك وهي المعركه التي قادها هايس القعيط من الجزيره وقتل بها فريس عنزه عقاب وحجاب والمرتعد ومزعل وغيرهم من فرسان عنزه الاشداء وبهذه المعركه تطوى صفحه من صفحات التاريخ الحافل للقبيلتين
****************************************
منقول ليعلم العواجي عن بعض تاريخ الشيخ مفتاح فقط والا تاريخ شمر محفوظ والاخوة في المضيف أعلم مني وان كان للاخوة في المضيف تعليق فالموضوع لكم.
رد مع اقتباس
المفضلات