لاتكثــر عتااب ..
كثر العتب يا صاحبي ما هوب زين
............. لان العتب يقطع حبال المودّه
جربت قبلك والبشر طبعهم شين
.............عوجان منطق للزعل مستعدّه
ما تعرف أن الحق ما يرضي إثنين
............. واللي يصارح يجمع الناس ضدّه
حتى حبيبك لو تعاتبه كل حين
.............ملّك وجازاك الجفا والمصدّه
اصبر وغض الطرف مره وثنتين
.............يمكن يفيق وطيب أصله يردّه
وإن زاد في غيّه وحرّك موازين
.............قلّه ولا تجرح ولا تكون ندّه
وإن ثار هدّي لا تزيد البلا طين
.............خله يفضفض لين ما يبيح سدّه
قرر بعدها دام عندك براهين
.............إما تكمّل معه وإلا تهدّه
وراي ٍ بنيته لا تخرّبه بعدين
.............ودامك مشيت أصحى تفكر بردّه
بيع الذي باعك ولو كان بالدين
............. وباب ٍ يجي منه الهوا قوم سدّه
والقلب يقسى وياخذ شوي ويلين
.............والجرح يبرى مير يحتاج مدّه
ما آظن به ناس ٍ من الهم خالين
.............وكل ٍ عطاه الله هم ٍ ع قده
وإن جيت تنشدني عن العيد بالعين
.............وش حيلة اللي نازح البعد حدّه
يا صاحبي عيد ٍ مع الأهل عيدين
.............وشيخ ٍ بلا ربع ٍ فلا به مسدّه
خلها على الله باكر تهون وتزين
............. وباب الفرج ما يفتحه غير شده
-------------------------------------
جازت لي ..ونقلتهاا
..... سلطان الرواد .....
رد مع اقتباس
المفضلات