ياصاحبي وان كان هذي ميانه
احيان من بعض العتب تفتح ابواب
لايابعد سحر الكلام وبيانه
احساس قلبي سكر وداخلي ذاب
وش جابك لطار الغدر والخيانه
ياسيد احساسي تماديت بعتاب
من قال مالك في عيوني مكانه
مايعلم انك ساكنٍ خلف الاهداب
لاوالله الا لك حصون وحصانه
وجنودها ماتحسب لغيرك حساب
مخفيك عن اهل الحسد واللعـانه
بالمختصر من كل واشي وكذاب
ارموش عيني تحرسك بالامانــه
والجفن سقف البيت لك ستر وحجاب
والروح من دونك عن اهل الخيانه
سيفٍ مجهز دونك لقص الارقـاب
من يد من لا يتصـف بالجبانه
فيه الشجـــاعه ورث من كل الاقراب
لانك غناة العمـر بأول زمـانه
وحبك بقلبي مايعـلل بالاسباب
ولازلت باقي للعـمر يا كيانه
نوره وعطـــــرٍ للاحاسيس جذاب
انت اللذي اسهرت عيني عشانه
واحلام عمري فيك تحضـر بالاسراب
وانت اللذي خوفه يراود امانه
ان جيتني طمنت وأن غبت مرتاب
دنياي بحرٍ وانت فالبحر دانه
متربعه مابين وسطه والاجناب
اسرج لك احساسي من ارض الكنانه
واعيش مع ذكراك واهيم وانساب
واكتب لك اشعار الغلا بالرزانه
وأجر صوتي باللحن كل ماطاب
وياللي طرقت ابواب قلبي ميانه
اقلط غلا مابين جفني والاهداب
للشاعر:غازي العصيمي
رد مع اقتباس
المفضلات