( المشاركة الثانية )
+ الأسبوع الأول /
رغم الجروح ورغم طعنات الايام = ورغم السنين اللي خذت ذكرياتي
ورغم العنا والخوف ومصارع أوهام = بنهض وأقاوم ثم بجمع شتاتي
وبحيي أمل في داخل القلب منضام = وباعلمه إن بمماته مماتي
وبشهر سيوف الحق في وجه ظلاّم = كل همهم ... تدمير حلمي وذاتي
وابي ابتسم واضحك لأن بعض الأقزام = يبغي دموعي ويتحرى وفاتي
لإن ابتسامي بوجههم نصر واقدام = وإلا انكساري هو نهاية حياتي
وبعيش واقع ماني بعايش أحلام = واجعل من أخلاقي بقلبي غناتي
لأن الغنى ماهو غنى مال وأنعام = ومفاخر بزين الحذا والعباتي
إن الغنى أن أبني قصور وأهرام = في داخلي من طيبات الصفاتي
ومادام أنا حي ومعي حزمة أقلام = بنهض وأقاوم ثم بجمع شتاتي
+ الأسبوع الثاني /
- 1 -
على بحر الغرام اللي جمع مابيني وبينه = وقفت ولا لقيت أحد وقف جنبي يواسيني
أمانة يابحر خذني ووصلني عناوينه = أمانه يابحر قله بأنه ساكن بعيني
وأكّدله إذا عقبي حبيبي ضاعت سنينه = فأنا مثله بعد والله عقبه ضاعت سنيني
وإذا مرة سأل عنّي وقال صويحبي وينه = فأنا بنفس المكان اللي جمع مابينه وبيني
- 2 -
ياصغير شلون ماعندك أمل؟! = والله أعطالك جناحين وتطير
قوم حلق لايقعّدك الكسل = قوم حاول ... قوم حددلك مصير
ياتعيش بقمة العليا بطل = أو تموت بأسفل الحفرة حقير
كم صغير(ن) كبره حسن العمل = وكم كبير بماجنت ايده صغير
+ الأسبوع الثالث /
ياعبيد صب لي مايزيد انشراحي
فنجال صين وشوفته تزيد الأفراح
بأرض خضار وبارق الوسم لاحي
وريح النفل يطرب خفوقك اذا فاح
ياماحلا الجلسة بذيك النواحي
أنا اشهد إن الهم من عقبها راح
في دار قوم(ن) يخفضون الجناحي
ومنهم يعوّد ضايق الصدر مرتاح
( المشاركة الثالثة )
+ الأسبوع الأول /
أشد المعاقب بالهوى الصد والتطنيش
وأنا أدريك لو تزعل على الصد ماتقوى
ولاني بحاجة اسألك ماقويته ليش
لاني على صدك كذا أو بعد أسوا
بدونك كما عصفورٍ أمسى بليا ريش
بدونك يتيمٍ فوق يتمه بلا مأوى
بدونك كما المطلوب مقبل على التفتيش
وقوفه أو هروبه تحير وش الأشوى
بدونك عميل وانكشف في صفوف الجيش
على صيغة إعدامه تخالف هل الفتوى
بدونك غريقٍ بالبحر والرياح تجيش
به الموج يلعب به على غير مايهوى
بدونك فقيرٍ منيته بالحياة يعيش
والأضعف يشوفه غادين لقمة الأقوى
بدونك حياتي يالغضي كلها تشويش
ترفق باللي من حبكم ماقدر يروى
واذا ناويٍ ذبحي فأنا طالبك بشويش
وابي شوفة عيونك قبل صفحتي تطوى
+ الأسبوع الثاني /
- 1 -
الفرح غرقان في بحر الهموم .. وان لفى يوم الفرح لاتهمله
غض طرفك عن عواصيف السموم .. وابتسم ورد الخزامى ما أجمله
ابتسم لأن المصايب ماتدوم .. خل نفسك للفرح متأمله
- 2 -
ارتفع عن كل مايزريك فوق .. وارتفع بالجو كان الصدر ضاق
همي اللي ساقني للموت سوق .. ليت مثلك لي جناحين وساق
كان أعانق بالسما مزنٍ حقوق .. وارتفع عن من يبيع اغلى الرفاق
+ الأسبوع الثالث /
الله على ريم الفلا يوم لاحي .. أنا أشهد إن الضيق عن صدري انزاح
وأنا أشهد إنه بلسم للجراحي .. ومن دون وصله تقلب أفراحي أتراح
دونه كما غصنٍ بصلف الرياحي .. تلعب بي الأشواق مع كل مرواح
لا الليل ليل ولا صباحي صباحي .. ولاني عنه سالي ولاني بمرتاح
يالله عسى يرجع لذيك الضواحي .. ويرده الله بالسلامة ليا راح
( المشاركة الثانية عشر )
+ الأسبوع الأول /
وشلون.. جاني عدوّي مالقى بصدري
مـوطى قـدَم للجروح وطعنتـَه حـارت؟!
اثر الطعون العزيزه جات من بـدري
غارت عليّ الأحبّه عقب ما غــارت
لو ما من عداي بسواهم معي عـذري
لكن رفيقي أخاف سواه .. ما صارت!
مخذول حُب وصداقه .. والعمر يسري
جار الصديق وهذيك الـغـاليه جـارت
ما اهتز غصني لجل ما اطيّر القمري
ورغم العطا والوفا واللى مضى طارت
خيّرتها وش تبي تختار من عمـري !
وذاقت عذوق ٍ رطيبه بس ما اختارت !
يا ماطره والسحاب يهلّ من حدري
وش حجّـتك يالعطـا للقاع لو بارت ؟!
لو بفقدك من فعولك ما نقـص قدري
الخوف كله على صورْتك لا انهارت !
علقت حلمي على الاحباب من صغري
والبندق اللي أمنت زنادهـا ثــارت !
ما عاد لك يا عدوّي جرح..أو تدري !
قرّب وقدّم طعون ايديــك لا حارت
+ الأسبوع الثاني /
- 1 -
يا طفلة الحلم لا ترجين معوادي !
قولي لخضر الاماني حيلتي شابت !
لا تحسبين الحزن في غيبتك عادي
دمعه تحاشا تذوب ودمعة ٍ ذابت
ما شلت همّ الوداع وحزني البادي!
خايف على هقوتك بالحب لا خابت!
مرّت سحابة هواي وعدّت الوادي
والوان الاحلام مثل الشمس لاغابت
ضايع بدونك ولا لـبّيت لمنادي !
وش يجذب النفس للاحباب لا طابت !
- 2 -
طاروا وخلوني وانا توي صْغير
طاروا بعيد لحلمهم وتركوني ..!
عطشان بس الروح ما حولها بير
يا ليتهم قبل القطاعـه سقوني !
النفس له عزه ولو ماهي بْخير
والدمع يغسل نظرة ٍ في عيوني!
+ الأسبوع الثالث /
سجّيت ادوّر بالفجوج ..ارتياحي
والهمّ ضيف ٍ والف الدار ما راح
واوقدت نار/ودلتي من قراحي
في ظلمة ٍ تستر عرا الدمع لاطاح
عامين اخفّي غصتي في مزاحي
واسرج خيول الصبر وآعنّ واجتاح
يتعب مع َ هالناس من كان صاحي
لا فاتت الكلمة على الغير/ لمّـاح !
ويرتاح من هو يمـّـته للصلاحي
ولاْ مرّت الزله ..من الطيب دمّاح!
( المشاركة الرابعة عشر )
+ الأسبوع الأول /
البارحـة ..ثـارت بقلـبـي لواهـيـب
من قمـت افتـش ذكريـات ٍ عجولـة !
كـن القهـر خاطـر../. يـدور معازيـب
أقبـل علـى قلبـي.. ونـوخ ..ذلـولـه!
صبيت من اقصى المحاني مكاتيب
وذبحت(فرحه)ضيفةٍ فـي وصولـه
الحزن طرقـي والقوافـي بهـا شيـب
وصدر الشمالي ..بالصحيـح اشهدولـه
ياصاحبي من خنـت ذيـك المواجيـب
والوقت مابـه ابـن نـاس وحمولـه
ذخرتك لـضيق ..وطريق..ومصاعيـب
وتركتني وسط المحيـط .. بسهولـه
آنا الذي من قبـل لا تصـوّت آجيـب
بنيت لك فـي ساحـة العـز ..دولـة
كم ليلـةٍ.. افـزع تقـل همهمـة ذيـب
وكم ضيقتٍ تفهق.. يمينـي ميولـه
الوقـت معطينـي شهـادة تجـاريـب
وعنوانهـا( يلزم ) عليـا .. اقولـه
الذيـب.. مايقلط على فضلة ..//.الذيـب
والمـال يفنـى ..//..والبـقـا للرجـولـة
+ الأسبوع الثاني /
- 1 -
وتعبت اجلس مع الذكرى واصبر خافقي واطريك
وانا من غيبة عيونك وقلبي (حالته حاله ) ..!!
تعال وابعد الضيقه عن اللي دايم ٍ تبكــيك ..
لساني مابقى شين عن غيابك ولآ ... قاااله ..!!
وحيده ..اجلس لحالي ..كأني في لقاك ارجيك..
اسوق الغيم من عيني .. عسى يسقيك هماله
- 2 -
ان كان ذنبي شموخ وللسما.. اقرب
عسا حياتي حديثن للسن الساحه
لاتقول شكلي غريب وانت مستغرب !!
بعض الخلايق لسانه (صدز مذباحه)
ان ضاقت القاع عندي السماء (مهرب )
ما يمنعن بالسماء (غيمه) ولا رياحه..
+ الأسبوع الثالث /
لاضاق بي وسع السما والمراحي
قريت لي (نجر ٍ) من الهيل صيَاح
حسه يجيب اللي من الهم طاحي
يسلى به وعقب النواكيد يرتاح
ولا شفت ريحان الغرانيق فاحي
صفيته ولون الذهب داخله ناح
ماهو كثير بهار ولاهو شحاحي
موزون مثل المدح بلسان مداح
( المشاركة الخامسة عشر )
+ الأسبوع الأول /
جيت المضايف مقصدي أكسب الفوز=شاعر ولي بين الشواعير عازه
هنا أبعلنها تحدي بلا عوز=واللي تحدى يكتب الشعر طازه
نويت أبحرق من تتن شعري كروز=لين أنفثه فوق الورق في ركازه
أصيد والشاعر له الصيد مخزوز=يهد والهدّه تحقق مرازه
إما يجيب اللي بالأعماق مكنوز=ولاّ يصيد اللي ربى بالمحازه
شعري نسيمه يشبه لديرة اللوز=وإذا عبر ماهو بحاجة جوازه
لي بيرق في قمة سهيل مركوز=بإسمي ينادي فوق ذيك العزازه
يازين وإن كانك تبي تعرف الفوز=الفوز ماهو بالدراهم مفازه
الفوز بقلوب الأجاويد ياروز=هذاك فوزٍ مختلف في طرازه
أقولها وماني على القول ملزوز=شاعر ولي بين الشواعير عازه
+ الأسبوع الثاني /
- 1 -
هنا على ميناء حزني لقيتك
وهنا توادعنا والأبواب ظلما
وهنا أبرجي طلّتك يافديتك
وهنا أبكتب لك رساله على الماء
ميّ البحر من كثر مانا بكيتك
هاج وخطف منّي نداءات بلما
في كل لحظه للغروب إحتريتك
واقول ماحن لسواليف سلمى؟!!!
- 2 -
يمّه انا بين البشر لاتروحين
ماتعرفين إن البشر قاسية قلب؟ّ
ماهمّهم يمّه ظروف المساكين
وانا هنا مسكين ..لا أُم لا أب
في سلمهم ماعاش غير القويين
أموت عادي..كيف لو أقترف ذنب؟!
لاصار توّي ماطلع لي جناحين
وزني خفيف ولكن أثقلني الحُب
إن كان ماجيتي وشلتيني الحين
مالي سوى رحمه تجيني من الرب
+ الأسبوع الثالث /
ياماحلا المسراح عند الصباحي=في ديرة ٍ يطرب لها كل سرّاح
فيها الرواما ترتقص بالبطاحي=تشبه عذارى الملعبه يوم الأفراح
وياماحلا هدّة رفيع الجناحي=في خايعن ماداج به راعي سلاح
مضراب مخلابه سوات الرماحي=من كف أخو نوره إذا صاح صيّاح
ياشيخ هذي رغبتي وإنشراحي=ولا غرّني من يقصد الغرب سوّاح
يتبع . . .
المفضلات