اليـــن هــان .. و بــسسسس ..!!
بسم الله الرحمن الرحيم
صباحكم / مسائكم .. ورد وطاعه وغفران ..!
عذرا ً على الغياب ..
.
.
.
.
لو الزمن هذا على هيئة انسان ؟!
_____ والله لأغوله غووووول وآطى بخده
مليت أدوّر لي مع الناس خلان
_____ والناس .. ما تبغى زحازيح شده !!
أقول : زان الوقت .. والوقت ما زان
_____ وقت ٍ على المظلوم يركي بحده
ما عادني طايق معانات وأحزان
_____ ولا عاد حولي سور .. والجور هدّه !!
أحاول أدله و أنظم بحور وأوزان ..
_____ وأثر العداوه : من قصيدي و عدّه ..!
ما كنت أحسب اني ليا قلت قيفان
_____ أشعل حرايق في مخاليق عِدّه ..
غريبه الدنيا به أشكال و ألوااااان
_____ ما يدري المضيوم بأوصاف نده ,,
دب الحسد ولسان موذي له لسان
_____ والحق .. ضايع بين روحه و رده
تحسن مع العالم رغم هيك تنهان
_____ تاقف مع الانسان يحسبك ضده !!
(( سهله تهد بعيّد العرق لا شان
_____ لكن قريب العرق وشلون هدّه ؟! ))
أيّست من دنيا ً بها طير حوران
_____ ما عاد له بالقنص ناس ٍ مودّه ..
رزّوا بدل شقر القرانيس غربان
_____ والتيس الأربد صار ما أحد ٍ يحده
طوقان صار بعالي الحيد له شان
_____ والذيب مخمر جاير الوقت كده
ضاعوا هل الطولات ذبّاحة الضان
_____ والهيس لابس ثوب ما هو بقده
الين هان .. وبس .. ياشر الازمان
_____ يا مورّد الضامي على غير عدّه
أعرف مالك ذنب والحق ما بان
_____ دام الأجلّه فيك تشري اعقدّه
الحظ شح .. وضايع الحظ بلشان
_____ ياكل من صدوف الليالي بيدّه
أزرى يكن دموع وهموم و أحزان
_____ واليوم بيّح كامي الهم سدّه
أنا الرهيف .. اللي مع الوقت ما لان
_____ وأنا الضعيف .. اللي يقويه صدّه
وأنا الشجاع .. اللي ليا ثار دندان
_____ وأنا الذراع .. اللي ردى الحال قدّه
لاااا يا زمن ماني بحيى الله انسان
_____ حلق الغشيم بفعل الأبطال سدّه
ماني بمن يفخر بأقارب وجدّان ..
_____ أنا الذي يفخر به ان عاش جدّه !!
.
.
.
كل التحايا المتواتره
محبكم
عبدالمجيد
رد مع اقتباس
المفضلات