السلام عليكم ورحمة الله وبركاته
في هذا المكان الجميل بكم وبقلوبكم الطاهره
تشرّفت بأول حرف لي على مستوى الشبكة العنكبوتية
قبل عشر سنوات تقريباً , وهذا المكان هو الذي أحتضنني لفترة طويلة
ومنه أنطلقت وهذا شرف لي .
وكان الفضل لله اولاً ثم لدعم المشرف العام أبو سلطان وجميع الأخوة
الاداريين والمشرفين والأعضاء الأفاضل .
لذلك هو بيتي الأول والأخير على مستوى النت , من هذا المنطلق
أتشرف بالتواصل مع الأحبّه هنا جميعاً من جديد .
.
كل الجروح اليوم صارت تشابه
نفس الوجع ياصاحبي والمواري !!
بس أنت جرحك عاد كلٍ درابه
حاولت أداري بس مقدر أداري !!
له في عيوني غيمتين وسحابه
وله في خفوقي ألف طاري و طاري !!
مثل السؤال اللي يدور إجابه
مثل السنين المقبله وأنتظاري !!
علّمني وش معنى الألم والرتابه
وعلّمني وش موت الأمل وأنتحاري !!
علّمته أصبر واْن تمادى عذابه
وآخذ من وجيه الليالي سماري !!
لولاه ماكان أرتديت الكتابه
وأصبحت بعيون المخاليق عاري !!
كريم ربٍ لي من سنين جابه
خيره ولو أنّه مهو بأختياري !!
أقلّها : يلقى بصدري رحابه
وألقى معه صبري ويلقى وقاري !!
وألقى به أعظم ماحظيت وحظى به
نبض الوفا اللّي بين بايع وشاري !!
قلبي هو الثاني بعد كم لقابه
صحبة عمر وأنسان جداً حضاري !!
وإذا قفل من دوني الليل بابه :
عشان أضيّع فيه باقي نهاري !!
ياما بكيت أول ويا للغرابه
أوّل أفكّر كيف أرد أعتباري !!
والحين أقول الله يخلّي شبابه
ماكنّه اللي في يديه أنكساري !!
الجرح عمره مايسبب كآبه
بالعكس كان أكبر سبب بـ أنتصاري !!
وشلون دام الجرح منك ؟ هلابه ..
أجرح يبو غمّازتين وخزاري !!
أجرح وجرحك لاتفكّر أهابه
رمشك قبل أوشك يسبّب دماري !!
ومادامها بعض الدعاوي مجابه :
الله يخلّي جرحك اليوم داري !!
.
رد مع اقتباس
المفضلات