هكذا بدون مقدمات..
فقط..
متى تعودين يا أطـــلال..!؟
\
" أمه بشخص.. و واحدٍ عن ملايين"
:: ويبقى وجه ربك ذو الجلال والاكرام ::
أن تكون القياده بيد كيده ..
والرأى المؤثر يصدر عن قرارته ..
وتكون الأمه في كثير من منعطفاتها قد تعودت سماع صوته ..
والقضايا قد اعتادت وقفاته ..
فهذا يعني أن كل عروش القرار والحكمه .. أهتزت بغيبته .. وفقدت برحيله فهداً لايتكرر ..
اخوتي / اخواتي .. لا استطيع الا ان اقول احسن الله عزاء العالم في فهد ..
الملك .. والتاريخ .. والمجد .. والدين
......................... والعز .. والهيبه .. وأرض الرسالات
الخير .. والأمه .. وصوت المصليـن
......................... حجيج بيـت الله .. وضـو المنـارات
السلم .. والحكمه .. وأقصى فلسطيـن
......................... واللين .. والرحمه .. وصوت الاغاثات
يبكون غيبـة شيخنـا يـوم الاثنيـن
......................... القايـد الـلـي تفتـقـده القـيـادات
حبيـب شعبـه فـي بـلاد الحرميـن
......................... خسارتـه ماهيـب مثـل الخسـارات
القايد اللـي مـا أنخلـق منـه أثنيـن
......................... ( فهد ) رحيلـه مـن كبـار الملمـات
أُمه بشخص .. وواحـدٍ عـن ملاييـن
......................... وله فـي مياديـن الكرامـه بطـولات
ماهـو (فهـد ) الا فهـودٍ كثيـريـن
......................... عداد مالـه فـي ذرى المجـد وقفـات
سلطان علّـم مـن فعولـه سلاطيـن
......................... وتشهد له ملوك وشعـوب وحكومـات
اللـي تسـمـى خــادمٍ للشريفـيـن
......................... بالله وش ياصف فعوله من أبيـات ؟؟
حتـى شمالـه كنهـا خلقـت يمـيـن
......................... مـن كثـر مالـه للمساكيـن مـدات
كبر مقامـه فـي قلـوب المسلميـن..
......................... وثقل مكانه في مجـال السياسـات ..
قولوا معي آميـن .. آميـن .. آميـن
......................... يالله عسى روحـه برحمـه وجنـات
حبيـب شعبـه فـي بـلاد الحرميـن
......................... خسارتـه ماهيـب مثـل الخسـارات
القلـب يبكـي قبـل لاتـذرف العيـن
......................... والشعـب كلـه يبتهـل لـه بدعـوات
ولو ان صوته غاب في يـوم الاثنيـن
......................... يبقى بقلـب الشعـب للحيـن مامـات
اللهم تجاوز عنه .. وارحمه .. واجزه عن الاسلام والمسلمين خير الجزاء ..
اختكم .. أطــــلال
=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=
" عطرتي الغيم يا حايل.."
( حايل ) هكذا بلا تعاريف .. عباره بليغه جدا !!
فكيف .. اذا ماكان المطر مشتاق اليها ؟!
.
.
بنت الجبل .. واخت القصايد حايل ...... نفسي على حب ارضها مفطوره !!
مبطي وأنا شوقي غزير وسايل ..... وشلون لاصارت بعد ممطوره ؟!
وش انت بعده ياقصيدي قايل ...... تعطرت بالغيم فوق عطوره !!
.
.
ليست قصيده في حضرة " أخت القصيد " وانما حديث شوق اليها .. مع اخبار المطر الأخيره ..
ولا عزاء لمن لايراها الا زياره _ مثلي _ سوى أن يحاول ترجمة رائحة الشوق التي علِقت في ثياب روحه .. الى نص ينقصه أن يكون كذلك !!
( لاحظوا يحاول لا أكثر ) !!
.
.
ياحايل .. أنشدك بالله .. ريحة ترابك ..
=وشلون للحين عيت تترك ثيابي ؟!
انتِ من الغيم عطرك .. وأفخر أطيابك ..
=وأنا بطاريك .. عطري وأفخر أطيابي !!
ما قلتي لسيلك الي جاك .. وش جابك ؟!
=ماقال لك .. جيت أكفّر سالف غيابي ؟!
تزهين بالسيل .. والا السيل يزهابك ؟!
= يادار خال ٍ مثبت شعره أطنابي !!
أولى من الغيم با للي فيه .. وأولى بك ..
=وشوقي لريحة ثراك الغالي أولى بي !!
منهو يلومن وأنا في زاخر كتابك ..
=أقرى من العز ما يرفع .. ويرقى بي ؟!
يشتاق من مرك .. وشافك .. لترحابك ..
=وشلون أنا الي بك أصلي وأعرق انسابي ؟!
مبطي وانا الشوق واقف بي على بابك ..
=مبطي وروحي معه فيك .. يتمشى بي !!
قالوا مطِرتي .. وسال السيل بشعابك ..
=قلت المطر بالضلوع الحدب واشعابي !!
قالوا رويتي .. وغسّل سيلك أتعابك ..
=قلت الروى لي .. وأنا الي زالت أتعابي !!
كنّا مطرنا .. ما دام الراوي ترابك ..
=وشميت ريح المطر تحتي من ترابي !!
عطرتي الغيم .. يومه عطر ثيابك ..
=وأنا من العلم ريح الديم .. بثيابي !!
.
.
ولتعذرني " حائل " .. وذائقتكم !!
أطـلال
=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=
" المناديل"
لا جديد ..
غير همٍ يكتم أنفاس القصيد ..
.
.
عذرا للمساحات .. ولأرواحكم !!
.
.
وش مجـزعٍ عينـي إذا طـوّل الليـل
......................... وأمرح على أطـراف المناديـل كحلـه
:
دام البكـا منـوة جفـاف المنـاديـل
......................... من طيب خاطر جفنهـا ينفتـح لـه ..
:
يا روح له طبع مثـل نزعـة الخيـل
......................... مخلوقة من باب رحلـه .. لرحلـه ..
:
شحـت علـي بالحلـم كـف المقابيـل
......................... وش ذنبي ان كان القدر ما سمح لـه ..
:
أحلامنا مثل الشجر ..( والمحاصيـل )
......................... ( محدٍ يحقق حلمه اللي طمـح لـه !!)
:
خل الدموع تسيل .. وتسيل .. وتسيـل
......................... وتغسل كيانٍ ضمه .. وما صلح لـه !!
:
والله يـا دمـع عقـب هـدة الحـيـل
......................... ان صاحبه في وقتنـا ينفـرح لـه !!
:
ترى البكا نعمه .. مثل نعمـه السيـل
......................... ان جاك وإلا يا جفن انـت رح لـه !!
:
حقـق منـى منديـل .. دام المناديـل
......................... تستوعب الي بالخفـا ينشـرح لـه ..
:
وأنا ما عـاد اجـزع إذا طـول الليـل
......................... ولو طاب جرح من السهر بأنجرح له !!
.
.
شاكره سلفا لكل المارين ..
.
.
أطـلال
=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=
" توقيـــع"
تـوقيع !!
تستأذنكم .. فأعذورا قصر قامتها ..
وش باقي ٍ منا علـى روس الأطـلال
......................... ياغير كلمات .. وقصيد .. وتواقيع ؟؟
دام العمر لو طالـت سنينـه وطـال
......................... أيام .. وشهور .. وليالي .. وأسابيـع
والوقت مثل الما على قول مـن قـال
......................... من يمسكه لو ضم كل الأصابيـع ؟؟*
والقعده اللي غـادرت جـو الأطفـال
......................... في عمرها واحـد وعشريـن توقيـع
شابت من حروف القصايد والأمثـال
......................... جناتها حـرف .. وقصيـده مرابيـع
تشوف في وقته مـن النـاس أشكـال
......................... يبقـى بعضهـم والبقيـه ( فقاقيـع )
ولا له بدربك يالهـوى مقعـد ظـلال
......................... وتشوم عن خطو الحكي والمواضيـع
وشلون أجل يمه وأنـا بنـت رجّـال
......................... والطبـع ماتغلـب عليـه التطابـيـع
قلبي وطـن مايسكنـه كـل رحـال
......................... وعرقي عطِش لو هو بجـال الينابيـع
واللي ترك قلبـي مـن الهـم أطـلال
......................... ماهو مثـل كـل الألـم والمواجيـع
أترك عقـب عينـي للأيـام تمثـال
......................... تمـره أنسـام الـهـوا والذعـاذيـع
والا أروح وكـل ذكـراي تـنـزال
......................... ويحدر اسمي مـع دمـوع التواديـع
لكـن لعـل الوقـت لامـال .. ما مـال
......................... ميـلٍ يخلـي هالمبـادي مصـاريـع
ولعلها لاصارت " أطلال " .. أطلال..
......................... يبقى لها في دفتـر النـاس توقيـع !!
.
.
* المقصود قول الشاعر العربي ..
ومن يأمن الدنيا يكن مثل قابضٍ ..... على الماء خانته فروج الأصابعِ !!
.
.
ودمتم ..
.
.
أطــلال
=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=
" جابوه بالطاري.. و أنا ما نسيته"
لهذه القصيده ساحل يمتد من الجرح الى الجرح .. فلا تسألوني بماذا كنت أجدف !!
.
.
لطاريك .. كانت القصيده ..
.
.
جابوه بالطاري وانا مانسيته
......................... واطرقت راسي عنهم قبل لا أقوم
واقفيت.. لو دمعي كشف ماكميته
......................... واللي فقد مثله فلا هوب مليوم
ياليتهم لاجابوا اسمه وصيته
......................... مايسمعوني قولة فلان مرحوم
لا والذي طهر من الشرك بيته
......................... الموت ماغيّب عزيزين وقروم
حيين بالسمعة والأجساد ميته
......................... باقين بالصورة لو الصوت معدوم
مرت سنه ياناس ولاسليته
......................... كن الخبر ماهو من العام .. اليوم
مهما كتبت بغيبته مارثيته
......................... ومالي سوى قولة مقدر ومقسوم
ياناس .. وش عذري اذا مابكيته
......................... حرٍ شلع من بيننا وأبعد الحوم
لايابعد حي القصايد وميته
......................... وحي اليتيم اللي من العطف محروم
كنه قصد نفسه بمعناة بيته
......................... (ياموت كنك ماخذ بروحته قوم )
عساك ياللي بالجزاير خذيته
......................... تسقيه في عدنك رحيق ومختوم
كتبت شعري احسب اني رثيته
......................... لا شك يلحقني على شعري اللوم
عقب القصيد اللي زهمني وجيته
......................... لقيت لي بيت ورى الحلق مكتوم
ياليتني قبل الخبر كنت ميته
......................... ولا سمعت اللي سمعته هكاليوم
.
.
رحمك الله .. وأسكنك فسيح جناتك ..
.
.
أطــــــــلال
=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=
" ذكرى الرحيل الخالد"
الغايب الي كل مـا نذكره فاح ..
..... ريح المطر.. والعشب .. والعود .. والهيل !!
سيلٍ مشى نبله .. وطيبه .. بالأرواح..
...... ولو جف عنها .. باقيٍ مجرف السيل !!
يعني بقى ماراح .. ماراح .. ماراح ..
....... و( ما راح ) هذي بعدها " هدة الحيل " !!
.
.
ليبقى الوفاء على ( قيده ) ..
لأنه وان لم يحضر هنا .. فلا حاجة في أن يحضر بعدها مطلقا !!
.
.
هذي ثلاث سنين .. من غاب .. ما غاب ..
........... فكوا رموز اللغز يا أهل الخطابه!!
ذكرى الرحيل الخالد .. أقلام وكتاب ..
.......تكتب سيَر .. وأقروا حروف الكتابه !!
" شوال " هذا ثالث العيد وش جاب؟! ..
.......نسأل حزن .. والدمع كل الاجابه !!
يوم بنى للحزن مرقى .. ومرقاب ..
...... لأرواحنا .. حتى خذاه ومشا به !!
طلاااال يا فوح العباير والأطياب ..
.........هذا حزن يوم الفراق وعذابه !!
يالي غيابك لاحشى ما هو غياب ..
.....وحتى الحزن بعدك كسيته مهابه !!
يا لابس غيم السما بشت وثياب ..
....– ويا قلّ من مثلك بياضه .. ثيابه !!- ..
من غيرك اليا فكوا لذكره أبواب ..
......تسبق (رحمه الله) قولة (هلا به )!!
طاريك يرفع روس .. ويبلل أهداب ..
..... ولو هي لغيرك .. كانت من الغرابه !!
أبشرك .. لو الجسد فرشه تراب ..
........ يا عل من فردوس ربي ترابه !!
ياما صعد من بين سجده ومحراب ..
..... دعوة .. ودعوة .. علها مستجابه !!
وأبشرك .. ياكثر مالك من أحباب ..
......وأسمك يا كثر الي رعى واعتنابه !!
تقولها من مر عيده بلا خضاب ..
....وقفة وفا .. عيت بنقشة خضابه !!
يالله .. لا تحرم هكالوجه من باب ..
.....جنتك .. يالي ما بقى غير بابه !!
هذي ثلاث سنين .. لو غاب ما غاب ..
....تافي له قلوب .. وعيون .. وكتابه !!
ولا تلحقونا شرهه .. ولوم .. و عتاب ..
.......لو زاد دمع عيوننا في غيابه !!
لأنه لبس غيم السما بشت وثياب ..
.....وأقفى .. وفك الما زرار السحابة !!
.
.
وللجرح بقية ..
=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=
" ذكرى وفاتك"
:: بسم الذي حللت ضيفا عنده وهو أكرم الأكرمين ::
قصائد رثائه تبقى في مسوداتها .. لأنه بياض أينما يحل ..
وهي قد تحضر متأخره ومتأخره جدا.. لكن ربما هو الأوحد الذي تصلح جميع الأوقات لرثائه ..
هذا ان كان من أحد استطاع الوصول الى ذلك ..
هو لي متى بعدين..بعدين..بعدين
......................... والبيت هذا طالعٍ من شفاتك
"طلال ..لو مرت على موتك سنين
......................... ماينطوي حبل العزى في مماتك"
الصمت قطع مابقى من شرايين
......................... وأنتي مغير البوح لحظة صلاتك
يامزنة من غاب وأنتي تسيلين
......................... هلي علي ..الله يطول حياتك
أبي أقول لـ " طلته " لاتغيبين
......................... وياجرح لاتحلم بحزة سباتك
أوااااااااااه.. يالعزوه .. وطولت عامين
......................... ماهيب لك عاده .. ولامن سماتك
العيد فات .. ولاسمعت المهنين
......................... كلن يقول العيد يابنت فاتك
العيد وين .. ومن فقد طلتك وين
......................... العيد روّح يوم لفوا عباتك
وشلون والله ماخلق منك أثنين
......................... في هيبتك .. ولا بنادر صفاتك
ماكان لي قلبٍ .. أنا ليّ قلبين
......................... واحد توفى نفس ساعة وفاتك
والثاني اللي شايلك بالشرايين
......................... كنك موصيه ويداري وصاتك
رحت بجسد يالشمري قبل عامين
......................... وللحين صوتك مايغلبه سكاتك
انت الوفا.. منك عرفناه.. والحين
......................... وشلون مانوفي لذكرى وفاتك؟؟
.
.
أطلااااااااال
=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=
" غيمه.. و دفتر"
الاكارم في المضايف ..
السلام عليكم ورحمة الله وبركاته ..
أرجوا قبول هذه المتواضعه ..و لكم الشكر ..
أستمطر الذكرى على قاع دفتر
......................... وألبس الأوراق عقد وقلاده
وأفتح يديني لابغى الجو يمطر
......................... ويهل ملحٍ ما كرهت ازدياده
من طاريٍ بين المحاديب يقهر
......................... كثّر على عد الخفوق ارتياده
خبري شداد القلب ماهوب يكسر
......................... واليوم أهون مايكسّر شداده
وش فيه وجهك يالزمن صاير أقشر
......................... ما عاد فينا للزوابع جلاده ..
وريتنا من خافي العلم .. أكثر
......................... وأرويتنا من مر كاسك زياده
نحرث أراضينا ونسقي ونبذر
......................... ونموت ماطلنا بيادر حصاده
واصل البنادم عمره يزيد .. يقصر
......................... يجيه يومه ماتحقق مراده
لا تحتري في هالزمن من بيشكر
ر......................... سلامتك من( شر) (خيرك ) شهاده
لو كل حمال على الحمل يقدر
......................... ما شفتلك دينٍ يدور سداده
حتى أيش لو فعل الأواديم يقهر
......................... خالق عباده ما سلم من عباده
وأنا بتال الوقت مادامه أسمر
......................... جنبت عن نارٍ كثيرٍ رماده
عل البكا من ذنب الاحزان يطهر
......................... دام السبب يغلب بياضه سواده
أفتح يديني وأدعي الجو يمطر
......................... أبطى جفافي مستبيح السياده
ومادام جود الملح غيمه ودفتر
......................... الله لا يقطع للأجواد عاده
=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=
" قصة جفاف"
أحوج من الأرض وعطاشى شجرها = للغيث أرواحٍ مهي بـ مغسوله !!
اللهم أغثنا ..
وأغسلنا بالماء والثلج والبرد . ونقّنا "منّا " واحينا بعد اليبس !!
ياناشد غيوم السما عن مطرها
......................... هو ليه مافاضت علينا سيوله ؟
لاتنشده .. ربي بعذره عذرها
......................... ماعندها من شي يمكن تقوله
يوم الضماير طولت في سفرها
......................... وشحت مشاهدة الوجية الخجوله
جرد الأراضي صيحت من قهرها
......................... قصة جفاف وجففتنا فصوله
وش ذنبها الا عمايل بشرها
......................... وش جرمها الا الربا والعموله
وش أثمها الا قبورٍ حفرها
......................... عدو ربي والعرب صفقوا له ؟؟
الناس خبره بالطهر في صغرها
......................... كبرت وخلت طهرها بالطفوله
وأسمى الأنوثة في تمايل صورها
......................... عشان نعرف وين ثقل الرجوله
كثر الفساد ببرها وببحرها
......................... حتى حرمنا الله نعمة نزوله
وياناشد غيوم المطر من عذرها
......................... على ضلوع القاع تمشي سيوله
ربك أمرها .. ليه ربك أمرها ؟
......................... من ساكن الدنيا وهافي فعوله
قصة جفاف ومن خبرها خبرها
......................... وأكثر من اللي قيل شيٍ نقوله؟؟
لكن لعل السحب لاجا مطرها
......................... مايخطي أنصاف الضماير هطوله
أحوج من الأرض وعطاشى شجرها
......................... للغيث أرواحٍ مهي بمغسوله!!
أمّنوا ..
" اللهم اغثنا "
=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=
" لي المهابة من مهابة جروحي !! "
وش فيك ياحزنٍ سكن داخل الروح
......................... تطـري رحـيلك عن مـدارات روحي ؟؟
قربك معودني على صادق البوح
......................... ولو غبت .. مايقوى على الصمت بوحي
أبيـك لــو قربك معانـاة وجروح
......................... أصلاً أنا - منهي - بليّــا جروحـي ؟؟
بعض الفـرح يمـرك أحيان ويروح
......................... بس الحزن لأستوطنك .. مايروحي
تبقى رفيق الجرح والدمع والنوح
......................... يا أصدق اللي عاش دمعـي ونوحي
انت الرفيق اليا غدا الصوت مبحوح
......................... لاشح بالدنيا الرفيــق السموحي
خل الفرح يكثر غيابه .. ومسموح
......................... بس انت - تكفى - خلك بجنب روحي
لو كان قربـك كله آلام وجــروح
......................... لي المـهابه من مـهابة جـروحي !!
=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=
" مرّ.. و هذا الاثر"
:: عبره ::
وشلون للحين ما نقوى على العبره ؟! ........ وشلون للحين ما تسكت قصايدنا ؟!
وشلون ساكت وله بأسماعنا نبره ؟! ........ وشلون راحل وهو توه معايدنا ؟؟
وشلون ننسى كبير .. غيبته كبره ....... وحنا الوفا صار شي من عوايدنا ؟؟
من قال اسمه "طلال" الي على خبره ....... ما أسمه إلا " طلال أغلى فقايدنا "
اسم لهالحين ما ينطق بلا عبره ....... اسم لهالحين تشرق به قصايدنا !!
لازلنا نقرأك ..
فقد كنت رجلا " تقول لمن بعدك مررت وهذا الأثر " ..
وأي أثر كـ " طلال " ..
الحقيقة أننا نفتش عن أرواحنا في آثارك .. أيها السامي حضورا و ... حضورا أيضا !!
.
.
رحلة في أثر المرور لـ غائبنا الحاضر .. أبحثوا عنكم فيها أما هو .. " فموجود كأطهر صور الوجود" !!
في الوحدة نقاء لم أجده في الاجتماع بالناس ، ووحدتي عيب أعتز به كثيرا !!
.
.
الشعر بالنسبة لي هو الصديق الوفي الذي لا يخون إلا عندما تكون الخيانة وفاء .
.
.
أنا كشاعر أخاف ألف شيء وشيء .. وكانسان لا أخاف إلا الله !!
.
.
باختصار أنا أسعى ليكون لي "حرف" يشبه همي ، ويشرب هموم الآخرين !!
.
.
المرأة تمتلك الحس بصورة أقوى وأعمق وأصدق من الرجل ، أقولها بكل صدق ، وأظن أن كتابة المرأة ، واعطائها فرصة لا يخل بأي عرف .
.
.
عندما يتحقق هدف مكاشفة الجرح لا يهمني أن أتهم نفسي أم لا .. مادام الهدف ساميا .
.
.
الشاعر ليس مصورا فوتوغرافيا يحتاج الزمان والمكان ليصور مشهدا أو حدثا .
.
.
قد تصل الى ظمأ يغري السراب أن يبحث فيك عن الماء .
.
.
كلمة إنسان .. كلمة مضيئة عندما تظلم كل الأسماء ، لو حظيت بها استغنيت عن كل الأسماء.
.
.
الفرح .. أقل المشاعر خلوداً
.
.
:: عبره في المنتصف ::
ما كتبت الشعر يا روح الجزاله ..
الا من هزة خبر يوم الرحيل ..
يا أصيل .. حتى في موته أصالة ..
صار دمع العين من بعدك أصيل ..
يذرف اليا حل طاريّك لحاله ..
كن محدٍ علمه قبلك يسيل !!
حتى دمع عيوننا لك به جماله ..
بس يا بعدك على رد الجميل !!
(ويح) عين فارقت شوفة " طلاله " ..
وآه من حزن نعرف انه طويل ..
كثر ما في قومت الميت استحاله ..
صارت السلوى لمثله تستحيل ..
شمري ٍ .. ما نسى ميلة عقاله ..
حتى في مد الحزن ما هو بخيل !!
أدري انه راح .. وأخبر ارتحاله ..
وأذكر الي صار في يوم الرحيل ..
بس دمعي حير عيوني سؤاله ..
هو رحل .. وشلون بنرد الجميل ؟!
.
.
شليلي بالعفاف أبيض .. على حالته يومه نسج ...... تدور الناس والدنيا وأموت وورثي حرامي!!
.
.
اصعب شعور .. موادع انسان لانسان ......... منه العيون تشبه الدمع بالما !!
.
.
أصدق الصدق دمعٍ يسبقك للجواب ..... قال كل الكلام .. وشق مهجة علومي !!
.
.
حياة الانسان الحساس صعبة لأنه يتعدى حدود الأشياء فتصعب عليه العودة.
.
.
أو تخال أنك تحب ولم تفارق بعد ؟
انا راحل ..
وتارك كل شي ..
:: وعبراااااات ::
بعض البشر يلغي مواجع غيابه ..... كثر العزا في غيبته من حضوره
إلا "طلال" .. اللي رحل في ثيابه ...... وخلى لنا ..حرفه ..وفعله.. ونوره
الي فقد حسه .. دموعه زهابه ...... والي فقد وجهه .. يعزي سروره
يالله وسع له .. ويسر حسابه ..... وبشره برضاك .. وجنانك ..وحوره
وثقل موازينه .. ويمن كتابه ...... وأمّنه يوم الناس تنفض قبوره
الحاضر الي ما بغينا غيابه ...... الغايب الي .. ما فقدنا حضوره !!
يتمنى البعض عودة الغائبين .. لأن غيابهم مؤلم ..
وأتمنى عودتك لهذا السبب .. ولسبب آخر أكثر إلحاحا ..
لا أستطيع البوح به .. لأني لا أعرفه .. إلا حال عودتك ..
لهذا فمن استحالة العودة .. يستحيل أن أدرك لماذا الي هذا الوقت أختص بهذا السبب ..
العجيب يا طلال .. أنه يزداد الحاحا .. والأعجب أن هذا لا يقلقني !!
.
.
لم ألمس في حياتي .. رحيلا أسخى من رحيلٍ استدعى بعضك وأجتثني كاملة !!
ولازلت أتسائل لماذا ؟؟
:: وللجرح بقيه ::
.
.
أطلالها !!
أطـــلال متى تعودين !؟
\
رد مع اقتباس
المفضلات