بسم الله الرحمن الرحيم
.
.
مارس هواياتك على الكيف مارس
____ لكن حذاري لا تجي هامتك ذيل !!
ما زاد عن حده .. تحول عطى رس
____ لا تاخذك من بخسته طفحة الكيل
ما يُظهر الرجال كثر المتارس ..
____ كم من فقير ٍ قدرته الرجاجيل ..
(الذنب) باب الضيق و(الشوم) حارس
____ وكل ٍ يحذّر حارسه يقبل الميل ..
و(النفس) مثل الخيل و(الدين) فارس
____ والفارس اليا طاح وش قيمة الخيل !؟
.
.
.
يا الاهي ما بقى لي غير رحمتك الوسيعه
_____ وانت تعلم بالخفايا جل شانك يا الاهي
ما طرى لي غير جودك بالمواقيف الشنيعه
_____ وانت جودك لا استضاقت يا عويني حيل راهي
ليه أدور عند غيرك طشة الوسم وربيعه !!
_____ وانت عوني وازدهاري وانتصاراتي وجاهي !!
ما بكيت الا لوجهك لا تنصّتني فجيعه ..
_____ ولا دعيت الا جلالك والشهود الصم كاهي ,,
ما آتباهى غير فيك وفي شريعتك المنيعه
_____ يوم غيري ضاع عمره .. ماعرف معنى التباهي
جل ذكرك يا مسيّر كل ما في هالطبيعه
_____ تعلم بيومي متاه .. وتعلم الساعه متى هي ..!
يا الاهي لا تكلني شي كايد ما أستطيعه
_____ واغفر ذنوبي وأعذني من مقاربة النواهي
وآتعوّذ فيك ربي من لياليك الفضيعه ,,
_____ و التضاهي و المنادي للتعالي و التضاهي
وأكفني شر الحسود وشر نفسي بالطليعه
_____ والرفيق اللي رفيقي .. بس بأوقات الملاهي
وأكفني أخذ العطيه لا غدت ( منّه ) وضيعه
_____ وأكفني شر الحيايا و العقارب و الدواهي
وأكفني شر الفشيله و الخديعه و الخريعه ..
_____ والنفوس المبتليّه و البلاوي و المشاهي
يا الاهي جب دعائي و أقبل النفس المطيعه
_____ ما يجيب الا جلالك .. جل شانك .. يا الاهي !!
.
.
محبكم
عبدالمجيد بن عابد
رد مع اقتباس
المفضلات