بسم الله الرحمن الرحيم
و السلام عليكم و رحمة الله و بركاته..
في سلسلة لتذكر شعراء اثروا مضائفهم بروائع الاشعار نبدأها بأحد شعرائنا الذي تزخر صفحات المضائف بقصائده.. بجانب دروس قدمها وقراءات نقديه جميله جدا
اخترنا لكم من روائعه..
ياسيدي
أن قلت لك بكاني البعد كذاب
.......................وكذاب انا لا قلت لك اقدر انساك
ودعتني ياسيدي وانقفل باب
.......................واذكر سواليف الضحى واتقهواك
قلبي سجد والبرد ف0 عروقه حراب
.......................ويومه خشع يبكي تقطع به شتاك
يلعن ابوها دمعةٍ بين الا هداب
.......................تحجرت في وسط عيني خطاياك
والقلب صار من الجفى عشب وتراب
.......................والدلو جاب الطين وشلون أبرواك
عقب القراح القلب00 بس طين واعشاب
.......................شدوا00 نسوا00 هاك السوالف على ماك
شدوا وخلوا لك سواليف واطناب
.......................شفت الزمن ياخافقي وين وداك
قلبي يبس ياسيدي والنخل شاب
.......................والغيم00 كنك ماخذ الغيم وياك
لولا المراره كان ماهالعسل طاب
.......................ولو لا الشخانب يالجبل كيف نرقاك
ولولا العواذل كان ماصارت اقراب
.......................ولولا الزعل ماذقت انا لذة رضاك
فينا يبين الشوق لو القمر غاب
.......................وانت بغيابك وبحضورك فقدناك
دام المسافه ضحكتك00 قلبي ركاب
.......................لا اتعب لك الخفاق وان مات يفداك
ياسيدي لا اغزل لك دموعي ثياب
.......................يلعن ابوه العمر وشهو بلياك
ياللي سرقت الخمر من فم الا عناب
.......................وياللي عطيت الشمس للغيبه شفاك
وياللي لبست عيوننا عقد واعجاب
.......................يالعنبوك ليا تبسمت محلا ك
شفني كما طفلٍ ربى وسط الا جناب
.......................صاحي يهوجس بك ولا نام طراك
شفني كما ذيبٍ عوى براس مرقاب
.......................صوته قطع عرق الصحارى وناداك
فتق صداه ليا عوى قبر ونصاب
.......................ياذيب قطعت المعاليق وش جاك
حتى الجبل لا من سمعك تعوي ذاب
.......................في ذمتي حتى الحجر حن لعواك
ياسيدي والطاوله وازرق الناب
.......................والخنجر بأول وأخر هداياك
أقسم برب الكون ماعقبك احباب
.......................واقسم بأن الشعر لا مت أحياك
لا أخلدك بالشعر في قلبي كتاب
.......................واكتبك ثم اكتبك واكتبك واقراك
ياسيدي لو قلت اببكيك كذاب
.......................ودي ولكن يبس العين فرقاك
=-=-=-=-=-=-=-=-=-=-=-=-=-
لن أقبل العزاء أبدا
ماكل من روّح يسمى فقيده
.......................ولا كل من يبست عروقه بقى فيّ
ولا كل لحظاتٍ تسمى شديده
.......................ولا كل طائي ينحسب قرم من طيّ
قالو طلال يموت 000 والله بعيده
.......................يمكن يموت 00شلون 00 لا يابعد حيّ
لا يا ذرى من فرعت يوم عيده
.......................صاح الصياح وشقت الثوب من غيّ
الشعر عزانا وعزى بسيده
.......................من عقبه الوديان مابلها ميّ
لا والذي يخلق ويرحم عبيده
.......................ماهي بسيطه موتته00 ماهي شوي
مد العزى يدّه ورديت أيده
.......................دام البقى في راس كل عتمه وضيّ
تدري
تدري
تدري عزانا بموتتك يا الوليده
.......................مامت وسط قلوبنا باقيٍ حيّ
نقراك ثم نقراك في كل قصيده
.......................ونحس بك (والله ووالله) بكل شيّ
ماكل من روّح يسمى فقيده
.......................الا طلال (وباقيٍ باقيٍ) فيّ
=-=-=-=-=-=-=-=-=-=-=-=-=-=-=-=
سهران
مشت خطواتها عجله
.......................ورملٍ داسته خجلا ن
على سيف البحر رجله
.......................يناظرها البحر ولهان
ويمي تلتفت وجله
.......................واناظرها بحيا شفقان
عسفت البوح انا لا جله
.......................وعسفني لا جلها التحنان
عذوبة دمها الدجله
.......................ولفراقه بحر زعلا ن
وموجاته ترد خجله
.......................اجل وش عاد بالا نسان
سهرت الليل انا لا جله
.......................وشعري ماغفى سهران
=-=-=-=-=-=-=-=-=-=-=-=-=-=
شتقول فيني
ياصاحبي مليت منك00وبعدين
.......................ياصاحبي زهقتني في سؤالك
مليت من 00 شتقول فيني 00 من سنين
.......................شتقول 00 والله كرهتني وصالك
البارحه شفتك وشفتك انا الحين
.......................نفس السؤال الحين00 ادري فبالك
وشهو تغير نفسها هذي العين
.......................نفس الشعر نفس انحناءة هلا لك
هذي خدودك عدها 00 واحد اثنين
.......................نفس الهدب نفسه غنجك ودلالك
ياصاحبي وشهو 00 بتنبت لك ايدين
.......................عصب00 وقلت الله 00 ياحلو شالك
اليوم شكلك مختلف00 قال لي زين
.......................شتقول فيني00 قلت واعزتالك
ياصاحبي جملت في حسنك الطين
.......................تدري بأنك أيــةٍفي جمالك
وتدري بأن الخوخ والتوت والتين
.......................ضيعتهم 000 بس المهم كيف حالك
=-=-=-=-=-=-=-=-=-=-=-=-=-=
رقص النخيل
للجريد الرقص لاأهتز النخيل
.....................وللهبوب أشلاء مذبوح الورق
لوطعنت بهمتي سفحٍ طويل
.....................أقتل الرهبه ويبكيها العرق
ليه أبرضى والزمن مده بخيل
.....................ليه أبجلس والمراكي من أرق
غايتي من دونها صرت القتيل
.....................حكمة الرحمن في خلقه فرق
شخص مايطمح ويرضيه القليل
.....................مثل غيمٍ(جا وروح ) مابرق
من سرج ياسيدي مهرٍ اصيل
.....................الطموح اعجاب كل عينٍ سرق
الهدف موجود بس وين السبيل
.....................وكل دربٍ مرني00 قبلي انطرق
ماغرزت السيف في متن البديل
.....................ومن شرب كاس المنايا ماشرق
انسجن في داخل الصاحي عليل
.....................وش يفيد الشعر والحلم انسرق
مايرد الروح للميت العويل
.....................كيف أضم البيت والعجز افترق
لا تسب بدون علمٍ ياهبيل
.....................كل جنٍ انقذف يوم استرق
وش تبي بالعيب في صدر الشليل
.....................ماكفاك الليل بالشمس احترق
كم شجاعٍ حاول وعود ذليل
.....................والبحر حتى البحر فيني غرق
والضمى فيني نعاه السلسبيل
.....................ريح انا يامعاتبي وانت الورق
فيصل اللويش.. متى تعود؟
رد مع اقتباس
المفضلات