كنت جالس بالبيت اقرالي جريده بكل برائه
ودخل حضرة جناب الوالد
ويقوم يتلفت
قلت خير يبه امر وش بغيت
قال وين اخوانك
قلت طالعين برا
قال لاحووول وش هالحظ
وانا اقط الجريده واقوم
قلت افا بس يبه امر وش بغيت
قال لا ولا شي خلاص الشكوى لله
قلت افا عليك بس والله لتقول هالحين
وهو يراعيلي بعينن قشرى قال اصغر عيالك انا تحلف علي
يا حووول يهالشيبان بس هم يحلفون علينا واذا حلفنا عليهم جلدونا
قلت لا يبه بس ابي اعاونك
وهو يحط يدوه على كتفي
قال ياوليدي انا ابيكم تعاونوني
ابي اتاجر
قلت حلوووو
يعني اصير مثلي مثل ولد الراجحي والجميح
قال مهو لهالدرجه
قلت شلون يبه
قال انا شريت غنم
وابي قبل عيد الضحيه ابيعهن
بهالحتسي باقي على العيد ثلاث او اربع ايام
قلت يبه والمطلووب
قال ابيكم تعاونوني وخصوصا ليلة العيد
لاااازم واحد يصير عند الشبك علشان يبيع الغنم
وانا اصفق صدري هكا الصفقه
قلت عندي وانا ابو هندي
اصلاً انا تركيبتي تركيبة تاجر
بس تدهورت يوم شفت عيالك هذولا
قال اقول ابلع العافيه لا اصب هالدله على راسك
الوكاد يوم جاء يوم عرفه
يعني قبل العيد بيوم
ويلقطن ابوي من الظهر
ونروح لشبك الغنم
ونتكي هناك انا وياوه
ويا حليلنا
وكل شوي جاينا زبون
يوم جاء المغرب وهو يقوم يتحكحك
قلت وشفيك
قال ابروح اودي امك للسوق بس ...
قلت لا بس ولاهم يحزنون
رح واعتبر نفسك موجود
قال اكييييد
قلت هه هه << ضحكة ثقه
افا والله عليك يالعشير << قط الميانه
تقلع ورح لمرتك وازهل التجاره علي اذا ما خليتك تلـ ....وهو يغولن
ويلزق وجهي بالشبك
قال تقل ادبك مع ابوك ابيعك مع هالضحايا فهمت
قلت سم طال عمرك
ويروح الحبيب بعد ما ذكرن بالاسعار
وجالس لحالي عند هالهدايف لابس رياضه وطاقية زري
وكل ما جاني واحد وعلمتوه بالسعر ديور وقال غااالي
وفجأه
وانا احرك مخي <<تدهور
قلت ليه انا ما اسوي عروض ( سبشل اوفر )بمناسبة العيد << مسوي فيها العثيم ولا بنده
وانا ارقا على الشبك واقوم اصايح
قرررب على الطيب الرخيييص
قرررب ياولد الزين عندنا والشين عند هذا << يشر على اللي بجنبوه
ويجون الزباين
واقوم ابيع اللي بـ 600 اخليه بـ 500
وعلى هالحال
وفيه واحد نزلت لوه ميه وما رضي
قلت طيب بكم تبيه
قال بـ 300
قلت نصيبك
الوكاد يوم جاء ابوي ولا الشبك مابوه ولا نمله
حتى النمل بعتوه
واقوم افر الفلووس قداموه
وهو يتبوووسم
واعطيه الفلووس قلت خذ يالاطخم وخلك فاااكر هالمعروووف
وهو يطلع ميتين قال هذي لك
قلت خدامين للحلوين
وهو يقوم يحسب الفلوس وانا مرتكي على الشبك
شوي وهو يراعيلي
قال شبيثاااان
قلت يا عيووونوووه
قال طلع اللي معك
قلت الميتين
قال لااا
اللي معك
قلت معي ريالين كنت ابشري بهن جريدة باتسر بس ما يغلن عليك معي ميتين غيرهن
قال ترن ما استهبل معك
بكم بعت الضحايا
وانا ابتسم
قلت يبه هذي سر اللعبه
التجاره شطاااره
وانا سويت عروووض للخلق
وحنا نسووولف
وهو يدخل علينا جارنا بالشبوووك
ولوه صياح
حسبي الله عليك
حسبي الله عليك
قال ابوي وشبلاك
قال ولدك هالهديفه هذا
قال ابوي وشبلاوه
قال جارنا نزل الاسعار وسحب كل الزباين ولا بعنا شين
وهو يراعيلي ابوي
قال نزلت الاسعاااااار << معصب
قلت هاااه ايه ليه وشفيه ؟
وهو يراعي لجارنا
قال حدوه
وانواع الطردي بالشبك
ويمرسوني هكا المرسه
ليا ثالث عيد وريحتي ريحة غنم
وامقن هو وامقن مهو هو
وتقلدوا تحيتي
رد مع اقتباس
المفضلات