يقول الشاعر
اثر البني فيهن تشاكيل والوان
فيهن جميله وفيهن الله سترها
وانا اقول
اثر البشر فيهم تشاكيل والوان
فيهم متسنع وفيهم اللي يقطع المطر وجهوه
كنا نجتمع يا عيال حارتنا كل يوم يا عند البقاله ولا بحدى هالدواعيس
وكل واحد اردى من الثاني بالواجهيه
وكلنا ولله الحمد راعي مشاكل وسوابق وسجلاتنا غبر
وبيوم من الايام نزل بحارتنا واحد جديد
وطبعاً اذا نزل جار جديد بالحاره نشوف هو عندوه عيال ولا لا
نبي نتعرف عليهم
وبيوم من الايام بالليل كنا جالسين عند البقاله
وهو يمرنا ولد يلمع من النظافه
ولابس بنطلون جنز وفانيله عليه صورة مدري وشو
يوم مر من قدامنا قال واحد من خوياي هيه صديق
ويلتفت الولد
قال سم
تقصدني
قال خويي وعليكم
قلنا لخوينا اخس تعرف ترد عليه
قال ايه هو ماقال السلام عليكم قال سم
قال خوينا للولد انت سعودي
قال الولد ايه
قال خوينا ياخي ما تشبهنا ليه ؟
قال الولد مدري
وكلنا نقزوه قز
انا مت من القهر من شعروه يتحرك بدون هوا
انا لازم تجي عجاجه علشان يتحرك شعري
وانا اقوم قلت السلام عليكم
وامد يدي لوه
ويراعي ليدي
قال وش هذا اللي على يدك
قلت لا هذي قزازه جرحت يدي
سلم انت مادن يدي لك لا ترد الرجال << مسوي فيها مرجله
قال لا تلوثني
ويديور من عندنا ويمشي
قال واحد من العيال شرايكم نضربوه << ماعندوه وقت
قلنا لا يبن الحلال ضعيف طاح عليه مكيف
وصار كل يوم ولا اثنين يمر من عندنا ويسولف معنا شوي ويمشي
ويمرن يومين
وثلاثه واربعه
وخوينا يمر من قدامنا ولا يسلم ولا شي
ويوم جا حدا هالايام وحنا نوقفوه
سلامات ليش ما تسولف معنا
قال امي تقولي لا تسولف معهم مروحين
ونرجع ونجلس بجلستنا
وكل واحد مننا يراعي لخويوه
اللي وجهوه بوه سواد من الطرحي على القار
واللي اظافروه سود من الوسخ
واللي برطموه مشقوق من بقسن جايوه
واللي لابس سروال بدون فانيله << طرزان الحاره
يعني ظروفنا قشرى
بصراحه كلاموه اثر علينا
عاد انا قررت اخاوي هالخكري وابيع العيال بجلخ بصله
وانتظروه عند باب بيتهم من الظهر ليما جاء المغرب << نفسوه طويل
يوم طلع وانا اصوت لوه
ويجي
قلت اسمع انا ابصير خويك
وماعاد امشي مع هالمروحين
اصلا انا كنت نظيف بس هم الاسبوع اللي طاف وسخوني
قال خلاص
بس ترى اذا شفتك معهم ما تصير صديقي
قلت طيب
بس ابي اسألك سؤال
قال سم
قلت وعليكم
ابي اعرف انت ليه دايم تلبس رياضه ؟
قال من قالك البس رياضه
قلت ياخوي لبسك هذا رياضه
ويطيح على الارض من الضحك
قال ياخي هذا جنز
قلت اهااا
يعني زي ما تقول ملابس داخليه
قال ملابس داخليه بعينك وين عايش انت
المهم تخاوينا انا وياه
قال بكرى تجي عندي بالبيت ابيك
قلت طيب
وانا ادوره دوره ابي اشوف بيتهم
وادخل بالبيت
وااااقردي
اشتمن جروحي من هالعطورات اللي بالبيت
حتى هو يحط معطر على فراشوه
حنا ما عرفناوه الا عقب العرس
واتغفلوه يوم راح داخل واخذ شينن جازلي واذوقوه
مانا حلو طعموه
اكتشفت بعدين انوه جل حق الشعر
الوكاد ويرفع فانيلتوه
قلت وش هالرسمه على كتفك
قال هذا وشم ماتعرفه
قلت حنا انا عندي وسم
وارفع ثوبي
وارفع فانيلتي واوريه المتساوي اللي بظهري
قال الله يقرفك
مو كذا
هذي رسمه فيها زخرفه
قلت حتى انا عندي زيك
وانا امد كراعي واوريه الوسخ اللي بعقوبي
وهو ينصفر ياحول
وانا اهرب قلت هالحين يبلوني بوه
ويوم جاء من باتسر ولا ابو الشباب واقف عند باب بيتهم عقب صلاة العشاء
وامره
قلت سم
قال وشو
قلت ياخي انت دايم تقوله ولا قلنا وشو
قال المهم وش تبي
قلت ابي اعزمك بكرى الصبح
قال مسوي لي حفله
قلت لا ياخوي مسوي لك عزيمه
قال طيب
ومن باتسر الفجور وانا افتر بالحاره اتحاروه
واطق باب بيتهم
واتقرط دريشتوه << حركاتي مع عيال الحاره
ويالله اقعدوه
واجيبوه معي للبيت
واقلط لوه مصالي وحليب بالزنجبيل وسمن
وياكل بأطراف اصابعوه
وتقل منقرف
ويخلص ويروح لبيتهم
ويجي العصر
والمغرب
والعشاء
ويوم
ويومين
ويجيني العلم انوه مرقد بالمستشفى
مسوين لوه غسيل معده
واقطع علاقتي بوه نهائي ذليت يموت من كثر مشيوه معي هالخكري
والناس اجنااااس
وتقلدوا تحيتي
رد مع اقتباس
المفضلات