تعرفون حنا يالرعيل الأول أقصد قداما المحاربين ليس عندنا شهادات ميلاد ووضع لنا تواريخ ميلات حادي بادي وحبيت أن أتأكد من عمري الحقيقي عن طريق سؤال الوالد الله يحفظه ودار بيننا الحوار التالي:
يبه تعرف تعرف كم عمري الآن ؟ تلاحظون السؤال بدون هل لإن الوالد مايحبها لذلك ماقلت هل تعرف
قال ايبالله الله الله أعرف كيف ما اعرف واضاف أنت ولدت يوم حنا نازلين في ستار برأس جبل أجا الله يجعله للسيل ، قلت نعم كلامك صحيح يقولون إني مولود بستار الله يسيله لكن عام كم؟ قال عام الجراد الحمر ، قلت وشي سنة الجراد الحمر
قال سنة نضحي بالدقاقة ، قلت وشي الدقاقة هذي ؟ قال عنز حقبا مثل الجمسة حايل ماتلد وضحينا به بهكا المراح.
قلت طيب أبيك تعد من هكالسنة إلى سنتنا هذه كم سنة.
قال أعدهم لكن أنت ليش تسأل ؟ قلت يبيي أحس بشيء يمشي مع عظامي وخايف إنها الشيخوخة ضحك ههههههههههه قال أويلي بلاكم والله من هالعجين الي تأكلونه وهالقواطي الي تشربونهن وماتدرون ويش بداخلهن وتقولون معجنات وحمضيات وعصائر وإلا أنت وغد مافات لك شين .
هذا كلام أبوي وأنتك وتقولون لي يالشايب.
قلت صدقت يبه بس أبيك تحسبلي كم سنه من يوم أولد في ستار الله يعمره بالصاقعه إلى اليوم يخي وهو يلتمس الشايب قال تصقع رأس الي مهو عندنا إن شاء الله أيوالله وليش تقول هالقول على مسقط رأسك إستغفر ربك ياولدي قبل تكتب عليك.
قلت إستغفر الله العظيم قبل تكتب علي.
قال لاحول ولاقوة إلا بالله هالحين نعود لسالفتنا كمعمرك
طيب قلنا سلمك الله يوم نضحي بالدقاقة سنة الجراد الحمر وسنة ضربة حسين وسنة يوم جمل زايد يأكل عمك سعدي وسنة إضناة فواز وسنة أمصع قرن نزال وسنة العجاج وسنة الربيع الطيب وسنة الكسوف وسنة أشتري ظبيان وسنة الثلوج وسنة العطشة وسنة يوم إشتغل في الخرج هنا قلت وقف يبه حسب ماسمعت إنك إشتغلت بالخرج قبل تأخذ أمي قال نعم قبلها مامن بطا يمكن بثلاث سنين فقط. قلت خلاص عافاك الله أجل الي بعد أخذتك لمي أنا أعرفهم كلهم شكراً لك يبه.
ماتبي تنام قال إلا والله بس أنت أبلشتن بهالسالفة وراح ينام .
ما ادري كم عمري للساع
رد مع اقتباس
المشاركة الأصلية كتبت بواسطة ابو عارف
المفضلات