وش أسوي ...!

**ليلى بنت عبدالعزيز** · 01-10-2009 03:08

ياكليب شب النار ياكليب شبـــــه
عليك شبه والحطب لك يجابي

وعلي أنا ياكليب هيله وحبــــــــــه
وعليك تقليط الدلال العذابـــــــي

صباح الخير ياربع والربعات جميعكم

عندي مشكله عضويه الاو هي تهيج بالمعده وجرثومه وقولون كل ابو اوجاع البطن الله يشفيني يارب
المهم رايحه جايه لدكتور محمد العنزي والحاله بتحسن ولله الحمد
بس مازال الالم يغولنن فجاءة واخر زياره له
التفت علي قال هاااه خليتي القهوة >> تراه يخوف اذا نزل راسه وعطاك نظره حاده ودك تبتسي
قلت : أأأأأ بحاول >> ميته خوف
قال لي: لاتراجعيني الا انتي تاركتها >> طرده مؤدبه

بصراحه بيني وبين نفسي مستحيل لاني اعشقها
لو ماتقهوى اتغلق واتعومس وياويل احد يكلمني
من اشم ريحتها وهي تطبخ اتبوسم
شوي الا اتدخن فيها من حبها
ومتى مااستانست ولا تضايقت شبيت عليها وكثرت الهيل والزعفران وهات ياشرب الين اموت حرقان من المعده

قولو لي وش اسوي ...!!! ابي اقلع عنها >> شيشه مو قهوه

يا مـا حلا الفنجـال مـع سيحة ii البـال
فــي مـجلسن ما فيــه نفسه ii ثقيـله

**بنت الجبل آخت القصيد** · 01-10-2009 03:32

ليوووله

من قريت الابيات دريت ان السالفه بالقهوه

اختي مثلك ممنوعه عنه وماتصبر عنه
صديقته مصريه تقول لاختي دانتو مدمنين عليه
مسميته بتاع شمر
ومع طول الوقت ... آدمنت المصريه وصارت 24 ساعه تفنجل
وانتقل الادمان لرجله بعد
اشربي فنجآن وآحد باليوووم ويكفي

مالتس الا الدعاء

.
.
الله يشفيك ياربي

**ليلى بنت عبدالعزيز** · 01-10-2009 14:58

جزاك الله خير
دعوه من قلب طيب

**صلفيق** · 01-10-2009 21:18

أنـا لقيت الصـبـر يازيـن غـبـه ... يرقيك روس مشمرخات الهضابي

من لاصـبر ياكلـيب في حـكم ربـه ... هـذاك يوم البعـث مــالـه ثوابـي

أسأل الله ان يشفيك أختي الدزحويان "شرهه اللي تقول تسذا"
ومادام انك مستمرة مع هذا الدكتور ، والتحسن موجود .. الحمد لله
استمري كما أنتي . المهم ابتعدي عن القهوة والبهارات .
حنا مجتمع تحكمه العاطفة والتقاليد .. لذلك ابتعدي عن التجمعات
التي تلزمك بشرب القهوة احتراما للتقاليد، حتى تشعري بالشفاء التام.
والحريم بصراحة الأيام هذي >>> صارن مدمنات للقهوة أكثر من الرجال..!

شافاك الله أختي الأقحوان
وشكرا لمجيئك
ولا تجاملين أحد على حساب صحتك !

احترامات لك

**ابو فارس** · 01-10-2009 21:28

الله يشفيك ويعافيك
انا عندي لي بديل عن القهوة
لكن مدري ينفع مع كل المدمنين اولا

جربي تشربين قهوة الشعير

ايه قهوة الشعير
اذكر واحدن عندنا كان يمنع نفسه من شرب القهوة احتياطا
وكان يضبط فنجال من قهوة الشعير
اللي ماهو شريب قهوة مايفرقها عن القهوة
بس ما اعرف الخلطة وش هي
اظن كان يحط فيها مسمار وهذا شئ حلو لمثل حالتك
واشيا ء اخرى مدري وش هي
بس والله تضبط معه

انتبهي مو اي شعير
شوفي الشعير اللي مابه كيماوي
تلقينه عند العطارين
وايضا كثري من شرب الحليب
لان الحليب يعطي قناع للمعدة ولمجرى الاكل
---------
ومع هذا لو استشرتي طبيبك بالوصفةهذه يكون احسن

وش بقى بعد؟؟
في الحلقة التالية اذا لزم

طهور لا بأس
دمت بصحة

**القناصه** · 01-10-2009 21:35

ماتشوفين شر والله يشافيك انشالله صراحه قويه انا بدون قهوه ينقلب مزاااااااجي وقبل اداوم افضي دله كامله

الله يكون بعونك

تحيــــــــــاتي,,,,,,,

**شام** · 01-10-2009 21:50

كل الاطباء ينصحون بـ خمس فناجين قهوة فقط .. واذا أقل افضل
أما تناولها كالإدمان
فهذا له محاذير طبية كثيرة ..
فترة من الفترات شربت القهوة بكثرة فأصبت بتوتر عصبي كاد يؤثر على العصب البصري
لذلك كان العلاج التوقوف فوراً عن تناول القهوة و تخفيض الكمية الى فنجان واحد بس
اتمنى لك صحة جيدة وبلا مشاكل أختي الاقحوان
و سلامتك ألف سلامة يارب

**بنت الجبل آخت القصيد** · 01-10-2009 22:38

قهوة الشعير
تلقينه جآهزه عند محلآت التمور
بس تغلينه بماء واذا تحين تضيفين عليه عود

.
.

**عبدالله المهيني** · 02-10-2009 00:24

مع عدم قناعتي التامه بالدكتور المذكور

.
.
.

أسأل الله لكي الشفاء أختي

دمتي بخير

**ليلى بنت عبدالعزيز** · 02-10-2009 01:28

المشاركة الأصلية كتبت بواسطة صلفيق

أنـا لقيت الصـبـر يازيـن غـبـه ... يرقيك روس مشمرخات الهضابي

من لاصـبر ياكلـيب في حـكم ربـه ... هـذاك يوم البعـث مــالـه ثوابـي

الله الله يادكتور >> تهيضت

جيبوا القهوة ههههههههه

أسأل الله ان يشفيك أختي الدزحويان "شرهه اللي تقول تسذا"

شكلي بغير المعرف وارجع لحصه ابرك

ومادام انك مستمرة مع هذا الدكتور ، والتحسن موجود .. الحمد لله
استمري كما أنتي . المهم ابتعدي عن القهوة والبهارات .
حنا مجتمع تحكمه العاطفة والتقاليد .. لذلك ابتعدي عن التجمعات
التي تلزمك بشرب القهوة احتراما للتقاليد، حتى تشعري بالشفاء التام.

اقولك يادكتور انا اشربها لحالي رحت ولاجيت
قمه الرواقه عليها واشربها بانواعها
الروقان الاوكيه على التركيه
وربي الحين فنجال قهوة تركيه بيدي >>> رايقه

والحريم بصراحة الأيام هذي >>> صارن مدمنات للقهوة أكثر من الرجال..!

شافاك الله أختي الأقحوان
وشكرا لمجيئك
ولا تجاملين أحد على حساب صحتك !

احترامات لك

حياك الله
وجزاك الله خير على الدعوه