فرصة للمتتنين
على جية رمضان يالربع أبوصيكم وصاة تكفون لأخواني المدخنيين و المدخنات
أنا داري فيه حريم يتتنن و الظاهر أنه شرهة
شرهة تصدقين أحسبك ولد أول لين شفت ردودك مع الشباب و طلعتي بنت
مدري ليه أحس أنك تتنين
الوكاديالربع هذي فرصة
بس المشكلة حلاة الزجارة من تهجم على الفطور و تلهط الشوربة و أربع سمبوسات
2 سمبوسة جبن و 2 لحم يمار عثورة الدخان ما بين عيونك
و ألي يزيد الطين بلة شربة التانج
ابد تقل ما تقوا تسوي شي لين تعمر هالزجارة
مرة برمضان قبل كنت أدخن و أبوي ما يدري بي أتتن بالدس
و من أفطرت أول يوم برمضان و أنا دايخ أبي لي زجارة
و أشوف بيني و بين أبوي ضباب و أسمع صدى بصوت أبوي
و ودي أشرب زجارة قبل طاش ماطاش
علشان ما يفوتن
و أنا أقمز و هو ينط بحلقي أبوي
قال لي : وين تبي ؟ تقل دارين بي
قلت أبروح أصلي
و أدور مكان أندس به بعيد عن أبوي و عن أخواني الدبس علشان ما يعلمون علي
قلت مالي ألا أروح برا عند الباب و أتتن
و أنا أجي و أدخن و يوم مزيت الزجارة يمار أحس أني أعبى أنسان بالعالم
جتني فواهة و بواهة من الدرجة الثالثة
أحس لو تقول لي شسمك أقول مركى و لا نبيطة المهم أقعد أصرف بأي شي
وأنا في قمة النشوة ومنعنش ما دريت ألا مكافحة المخدرات طابين على
بقيادة النقيب أبوي و الرقيب أخوي الكبير و العريف و الجندي أخواني الصغار
رايحين للصلاة بالمسجد و أنا أركز يا مار هذي شوارب أبوي و سكسوكته البيضاء
و أجي أبزبن يمار رجليني يتراعدن من الخوف و البواهة
و هو ينط الرقيب أخوي الكبير و يمسكن مع بطني خمن خم تقل كورة قدم أمريكية
و الوغدان الصغار ألي ماسكن رجل و ألي ماسكن يد
حرام تقل طابن على بيتهم
و يوم أقبل أبوي حفظه الله و هو ينزل العقال و يمشي ببطء تقل فلم أمريكي
وجاين يمي ما وعيت ألا أخوي مشابطن مع بطني و ملقي ظهري لأبوي
و يمار لسبة العقال حسه تقل رعيدة مزن و أنا أعوي أكالعواة تقل بس حاشرينه وغدان بزاوية الحوش
و أنا أترجى ابوي يمار لله كل مال حقده يزود و أنخى أخوي تكفى فكني و هو يقول خلك يا ***
تستاهل و الوغدان الصغار مستانسين حاقدين على من كثر ما أرسلهم للبقالة و المغسلة و كم كف أذا تأخروا
و أنا بالمعمعه و هو يجي جارنا أشوا جزاه الله خير و هو يمسك يد أبوي
و يقول لا يا أبو فلان عين خير شبلاك على الولد
و أبوي يقول هالسربوت لقيته يتتن
عاد تدرون ان جارنا هذا مطوع و راعي دين
أنا قلت خلاص رحت فيها
ما بين مطرقة أبي و سندان جارنا المطوع
لكن الظاهر أمي بالحوش تسمع الهوشة و تدعي لي
أشوا و هو يجي جارنا و يفكن من هالعصابة و عقال أبوي
و هو يسأل جارنا المطوع أبوي
عاد وش مسوي هو علشان تضربه هالضرب ؟كل هذا علشان أنه يتتن ؟
و هو يمسكن و قال لي ما عليك تعال معي و أنشاءالله ما يجيك أبوك
قال لي جارنا يله أمش معي للمسجد نبي نصلي و سألني عليك وضو ؟؟
قلت لا معليش نقضته
و أنا اروح للمسجد و اتوضا و أصلي و عقب الصلاة جا جارنا و وصي أبوي و قال لا تقوله شي
و قعدت بالبيت و انا أزبن عند أمي و هي تسكر على بغرفة البنات
لأن العيال حاقدين علي كلهم و قعدت حتى طاش ما طاش ما شفته
و منها كرهت الدخان بس أني ما قطعته للحين
و أنشاء الله هالمرة ناوي أقطعه
هاه شباب و أنتي يا شرهة شرايكم نقطع الدخان برمضان
و الله فرصة و جت لنا
أول شي نرضي الله و ثاني شي نحافظ على صحتنا و أعمارنا
يله أصملوا
رد مع اقتباس
المشاركة الأصلية كتبت بواسطة تحت المجهر
المفضلات