انشغلت القبيله الله لا يشغلنا الا بطاعتوه بمشكلة الشيخ
عبدالله الجعيثن
وكلن يدور من جهه لعل وعسى يصيدون المجرم
وكان ريال الفسحه جالسن الصبح مع اموه يفطر
وهي تراعيلوه اموه روح حايل
قالت ياوليدي مادري ليه احس قلبي ناغزني واحس انك انت اللي
سويت هالعمل بالشيخ
وهو يراعيله
قال يمه انا لو سويت هالعمله بالشيخ اكون معي حق
لكن مهو انا اللي سويته
بالجهه الثانيه كان الحنشل جالسن عند الغدير ويقصد
ويتغزل
وهو يكتب على جدار الغدير هالبيت
(( لو وفيت وجيت يومن زرتني .. لو صدقت افنيت روحي في هواك ))
وهو يروح لبيتوه
وكان الشبث يراقبوه ويشوف وش يكتب
ويروح ركض لحيل حليل اللي كان للحين ما قعد من نومتوه
ويتسفت عليه بالفراش يمشي مليون
وهو يقمز حيل حليل ويلقط الرشاش ويحطوه على راس الشبث
قال علي بالحرام ان دخلت ثاني مره علي كذا اني لا اثور بك
ولا اخلي بك حي الا شراباتك سمعت يهالخسيس
وهو يقوم يهز راسوه الشبث ودموعوه بعيونوه << عليه وجه وهو ذال يقطع المطر
وهو يجلس حيل حليل
قال وش عندك اخلص
قال هذاك الزلابه الجديد
راح للغدير وكتب بيت شعر
يقول (( لو وفيت وجيت يومن زرتني ))
قال حيل حليل ايه اعرفوه اللي غناوه راشد الفارس
المهم انت وش سويت
قال ماسويت شين ابشوف وش تقولي
قال حيل حليل اذلف خرب عليه لا يسويلي فيها امروء القيس ابن ابان
وكل ماكتب خرب عليه
وهو يروح الشبث ويكتب عند كتابة الحنشل
(( تضحك علينا اصلا هالبيت مغنيه بشير حمد شنان يالهتلي ))
ومن باتسر وهو يجي الحنشل ويكتب بيت
(( تنشد عن الحال .. حالي كيف ماشفته ))
ويوم راح وهو يجي الشبث ويكتب
(( ياخي محد نشد عنك لا تصجنا يا مضحي الدوسري ))
وعلى هالحاله
العالم بلشانتن بمشكلة الشيخ عبدالله الجعيثن
وهذولا هواش
الشيخ عبدالله بهالوقت لا يقدر يتكلم ولا شي
بس جالس يراعي لهالرجال ويتلاوذن عيونوه
وبيوم من الايام وكالعاده كان الشبث يراقب الحنشل يبي يعقبوه
ويخرب عليه
ومن كثر ماهو منغث الحنشل من عمايل الشبث وهو يتغيب للشبث
ويوم راح الحنشل
وهو يجي الشبث ويكتب يالسلوقي ..
مادري الا هاللي غايلوه
قال الحنشل منهو السلوقي ياطوير الليل
قال الشبث هاااااااااه مهو انت
انا السلوقي
وهي تقبس بينهم
وعفيسي
وطرحي
وهو يغولوه الحنشل ويغر راسوه بالماء يبي يغرقوه
والشبث يرافس تقل طلي
وفجأه الا على مرة يوسف من جنب الغدير
وهو يجيهم ويفك الشبث ويفرقهم
وش العلم وشبلاكم
قال الشبث هذا هو اللي عمل بالشيخ كل هالعمايل
ويوم كشفتوه وهو يغولن يبي يذبحن علشان ما اكشفوه
قال يوسف شلون كشفتوه
قال الشبث شفتوه يرسل رسائل وسائط لخوين لوه يعلموه
وهم يمسكون الحنشل ويكتفونوه ويدخلون بوه بيت الشيخ
ويسدحونوه قدام الرجال
وهو يراعي ابو ضاري ليوسف
العلم يا يوسف
قال هذا البواق اللي احرق الشيخ عبدالله
وهي تطير عيون الموجودين
قال ابو ضاري ومنهو اللي يقول هالكلام
قال يوسف الشبث اللي يقولوه
ولقيت هالخسيس غايلن الشبث يبي يذبحوه عند الغدير
لان الشبث كشفوه
وياخذونوه ويحفرون لوه حفره ويسقطونوه به
ويحددون يوم علشان يحاكمونوه به مدام الشيخ ابو عارف موجود
ويروح الشبث لخويوه حيل حليل
بس هالمره يمشي شوي شوي ذالن يرميه حيل حليل
ويدخل على حليل
قال حليل هاااااااه العلم وشبلاك تقل معفوس
قال الشبث ايه عفسن السلوقي بس دهورتوه لك
قال حليل شلون دهورتوه
قال الشبث اتهمتوه انوه هو اللي محرقن الشيخ
وهالحين حافرينن لوه حفره ومسقطينوه به
وهو يقرب لوه حليل
قال كفو يا شبيثان كذا تعجبني
وهالحين وش تبي اعطيك
قال الشبث ابي عنز
قال حليل الا على طاري العنز انت وشلونك
وراحت الايام والمسكين الحنشل بحفرتوه
وكل يوم يمروه الشبث ويقط عليه زقاره ولا يرفسوه
وبيوم المحاكمه
وهم يجيبون المتهم الحنشل
ويجتمعون اهل القبيله كلهم
رجالهم وحريمهم ووغدانهم
قال القاضي ابو عارف حطوا المتهم قدامي
وهم يجيبون الحنشل قداموه
قال قل والله العظيم اقول الصحيح
قال الحنشل والله العظيم وياعلي اموت ان ماقلت الصحيح
قال الشيخ انت اللي سويت بالشيخ هالعمل
قال الحنشل لا والله يا شيخ مهو انا ويعلم الله
قال ابو عارف
منهو اللي مسك الحنشل
قال الشبث انا
قال وجعة انا تعال قدامي
وهو يجي الشبث
قال وش دليلك انوه هو المجرم
قال الشبث شفتوه يرسل رسائل وساط لخوياوه يعلمهم
ويوم شافن مسح الرسائل
وهو يلتفت ابو عارف للحنشل
قال صحيح هالكلام
قال الحنشل اسمع ياشيخ
انا جيت لهالقبيله لاني مكروش من كذا قبيلة قبل
ورجالن احب الومنسيه ومالي بالمشاكل
وكلام هالمروح يوم يقول وسائط وما وسائط
اصلا انا جوالي الرهيب ولا يرسل وسائط
شفت شلون يتسذب يا شيخ
وهو يراعي ابو عارف للشبث
وهو يرتبك شبيثان كالعاده
قال الشبث مهو انا اللي قلتوه يوسف اللي يقول << انكب
وهن يطرن عيون يوسف للشبث
ويقمز عليه
وتقبس بينهم
ويالله يتدخلون اهل الخير ويفكون الشبث من براثن يوسف
وبينما << حلوه
وبينما هم على هالحاله وهي تدخل عليهم شرهه ومعه سناعيسو
قالت ياشيخ سناعيسو يبي يقول كلام
قال يالله يا سناعيسو تكلم
وهو يقوم يراعي سناعيسو لشرهه
قالت يالله احتس واعطيك سيكل
قال ايه هو سخن الماء وصبوه على الشيخ
قال ابو عارف منهو هو
قال ايه هو
قال الشيخ منهو
قال ريال
انا شفتوه صخن الماء وراح لبيت الشيخ وانا اراعيلوه لان الشيخ ملعون خذا جوالي
بس احسن خلوه
وهن يكبرن عيون ريال الفسحه
قال والله اني ادري من زماااان ان نهايتي على يدك يا اخو الفلس
ويوم جاء يبي يهرب وهم يتكومون عليه الزقرت ويربطونوه برجلينوه ويعلدزونوه
قال سناعيسو يالله يا شرهه عطيني السيكل
قالت اعطيك رضمه تدق حنوكك انت واخوك
ويطلب ابو عارف انهم يفكون ريال الفسحه ويجيبونوه لوه
يوم جاوه قال هاه يا ريال ليه عملت هالعمل بالشيخ
قال يا شيخ
هذا شيخن ظالم وكل شينن عندنا ياخذوه بحق وبدون حق
وانا جبت جوال جديد لاخوي وخذاوه غصبن عننا
وعلشان كذا خذيت حقي بيدي
قال ابو عارف هالحين نتغدى وعقب الغداء الحكم
يوم جاء عقب الغداء وهم يجتمعون مره ثانيه
قال القاضي ابو عارف
حكمنا على الشبث بالحبس ثلاث شهور ما يشوف ادمي
وحكمنا على الحنشل يطلع من هالقبيله ويدور قبيلتن ثانيه
وحكمنا على الشيخ عبدالله الجعيثن تنزيل من الشيخه وتعطى ابو ضاري
وحكمنا على ريال فسحه يودي الشيخ عبدالله يسوي لوه عملية تجميل عند
احسن حكيم بالعربان كله
والى حين اعداد هذا الخبر وبصري يدور بالبران يدور الزقرت
ولا علم ولا بينه
وجيتك منهم مدري عنهم
مع الاعتذار للجميع عن ادراج اسمائهم بهذه الشخصيات
والى مسلسل قادم بعون الله
والمعذره عن التقصير في الردود بالاجزاء السابقه
ولكم كل التقدير والاحترام جميعاً
وتقلدوا تحيتي
رد مع اقتباس
المفضلات