ان ضــاق صدرك
ان ضاق صدرك ويش هي حيلتك فيه
.......................... مااشد من صدرٍ من الهم ضايق
تروح للدكتور تطلب يداويه
.......................... والا تعرض المشكله للخلايق ؟
والا تشمـّت بالقدر في بلاويه
.......................... وسب القدر هو والدهر غير لايق ؟
والا تحاول كتمة الهم تطـويـه
.......................... طيه على طيه سـواة اللزايق ؟
والا تهـلّ الدمع ياليـن صافيه
......................... يقضي وتجعل من سريبه لحايق ؟
والا تخـرّبها وتمشي مع التيه
............................ تطيع من قال : اشرب ترى الجوّ رايق ؟
والا يطول الدرب تتعب مماشيه
.......................... وانسدّت بوجهك جميع الطرايق ؟
وكلٍ تخلـّى مايودك تحاكيه
......................... وان كان هو حاكاك يخفي الحقايق ؟
والا تقول : الموت يارب ( تدعيه )
................................. أو تنتحر للنار تصبح حرايق ؟
كل الحلول السابقه ماتشافيه
.................................. تزيد ضيقك ضيق كلـّه عوايق
الحل واحد وانتبه لاتخلـّـيه
.............................. خلّ الذي غيره وخـل العلايق
الراحمين ارحمهم الله ناجيه
.................................... خلـّك توال الليل لله فايق
الكون والليّ فيه من هو مسـّـويه
............................... أفلاك ، مخلوقات ( جلّ ودقايق )؟
ماضاق ربك باوله مع تواليه
............................. يضيق بك من هو للارزاق سايق ؟
وان كنت منصف اسأل النفس قل : ليه
................................ وش قصتي يانفس انا ليه ضايق ؟
اما تقول :الله لك سنين عاصيه
.................................. خذا عليك العهد بس انت بايق
والا الذي كلٍ به الله موصـّيه
............................ اغضبتهم وارضيت باق الخلايق
والا دعى عليك من كنت موذيه
................................ له دعوةٍ تسبق سراع الطلايق
والا كتاب الله عسى مانت جافيه
............................. اشغلت نفسك بالعبث والطقايق
والا انت من لطـّـخ مواطيه ويديه
................................ باكل الحرام وفي يمينك لعايق
والا انت تسقي زرع مانته براعيه
................................. ومع شين فعلك تفتخر به تمايق
والا ان فرضك ماتداني تصلـّيـه
................................. مالك على الركعات شوق وشفايق
والا الحسد والكبر بالقلب ماليه
.......................................... والا لسانك للنمايم نطايق
والا لهفت اللي بك الله موليه
............................... مال اليتيم او من حلال الشقايق
او كل يومٍ ألف حلفٍ توديه
.............................. وتشهد شهايد زور ماهي حقايق
او تدعـّي بالدين والدين مخطيه
.............................. لك وجهةٍ لااحتجتها لك مهايق
اكيد بك شيٍ عن الخلق مخفيه
.............................. حطـّيت من فوقه نقوش ونمايق
تقبّـل القبله وصدرك ومافيه
................................. استسلم وسلّـم بليـّا ربايق
ثم اعترف بالله وكبـّر وناجيه
................................ انت اصغر ولكن غرورك سمايق
ايقف كما المرهون يلمس مخابيه
....................... واكتِـف كما المسجون سجنه سحايق
تعوّذ من اعدا العدا ثم عاديه
................,,,,........... وازبن على فلاّق سود المحايق
اخشع وكل العالم انسه ونحـّيه
................................. واركع وبعد الرفع اسجد دقايق
يارب .. انا المسكين مالي مشاريه
................................ ضاقت به الدنيا وصارت بنايق
ثم اعترف بالذنب والله محصيه
...............,,,............ اوكل به اللي فوق حدى العنايق
وليا انكسر قلبك لربك فهنـّـيه
.................,,,,............ ياما تصير دموع عينك غدايق
وليا انهشمت وولـّع الشوق حاديه
................,,,,................ لله لعلع كالبروق الشعايق
أدلج ترى ليلك تقـّدت مساريه
............................. واصبر على المسرى ولو به رهايق
واللّي مشى لله ترى اللــه ( ياتيه
............................... اسرع ) بقولٍ صححته الوثايق
والله هدى الانسان ماهو بمغويه
................................. مايغوي الا بليس راع الحنايق
اكبر عدوٌ للنفس واللي يجاريه
................................. يرديه ماله لو يحاول عتايق
الا الذي مع فطرة الحق هاديه
.............................يكشف حجاب الهجر بين العمايق
من بعدها مايسأل العبد يعطيه
................................. جزل العطايا لاعطاها بثايق
من بينها شرح الصدور المواليه
................................ مع الهدى هو التقى والتوايق
والعبد كان اللــه ماهو بمغنيه
................................. مايغتني لو ساعدوه الخلايق
رد مع اقتباس
المفضلات