السلام عليكم ورحمة الله وبركاته
مسالخير كلكم و كلكن يا زقرت و صبايا حارة فلة حجاج
و شلونكم و وشلونكن
يالربع و يجي أكاليوم وينخانا حدا العيال أمه سوت قطبة من خياش الشعير الخضر
يامار أمه ( ياني حدقت عليها عقب ) قايلتولوه ابي ياوليدي تحطب لي
و حنا أكلحين بالشتا برفحا و ألي ما يعرف شتا رفحا ينشد الشبث أحد الناجيين
من برد رفحا عام 1421 هـ
حرام ياوجه الشبث منعفط تقل ملكوم بقس من تايسون و هو زعلان خسران بالبلوت
يا حليله و الله استانسنا من راح
قصدي زعلنا من راح
الوكاد نرجع لموضوعنا و هو يجي خوينا يفزعنا علشان نحطب لأمه
و نروح ددسنين محملة كل ددسن به 4 حبرتيه
لا والله ددسن وجلنت مهو ددسنين
و حنا نقلع من رفحا للنفود ورا لينة و كنا برمضان و الجو شتا موت برد
و الله ما تدفا لو تغطى بدب قطبي و هو حي بعد
الوكاد جا القائد ( الفاشل ) حق الرحلة و قال
نبي نلز لطعس و نحط سياراتنا على شكل حرف V الرجال متاثر أكلحين بالأفلام الأمريكية
عاد قالوه حدا العيال ليه ما قلت على شكل رقم 7 بالعربي
قال لا شكل حرف V افهم للكل يا مار 3 منا ما معهم ألا سادس
و هم يقبسون معه
إي و الله صاج و ليه ماتقول رقم 7 بالعربي
الوكاد هكاليلة وهم خناق و أنا ذابحن البرد
و أتخيل هلي و هم ملتفين حول المدفأة
و بريق الحليب بالجنبليز فوقها
و أخوي يقط الفروة وبقول : يووووووووووه أحتريت
أحس إن دمعتي نزلت لين وصلت نص الشدوق
عجزت تنزل جمدت بنص الخط
خمشت فراشي و أنا أنجضع بجنب النار
و أتفل عليهم بقلبي
و اقول في نفسي شلون باتسر نفطر و وشو نتسحر الليلة
الوكاد شربت لي لبن مراعي و كليت يسكوت أولكر التركي أبو قرطاسة حمرا
و أحط راسي و أنام
و أنا اقعد يمار و الله يالربع المضرب ألي متغطي به فوقيه كلوه ثلج
و أراعي يمار خوياي بعد هلون و والله يالربع الطعوس ألي حولنا
كله هلون . قلت أنا بحلم و لا علم ألظاهر أني أحلم إني بروسيا
و أقرص رجل خويي يمار صحيح
و أنا أقعد خوياي و أقولهم يله خلونا نحطب
و حنا نتوزع بمجموعتين و و احد قعد يسوي لنا فطور
و أنا أروح أحطب من الظهر لين قبل المغرب
و يوم جينا نبي نمشي و أنا أروح للسيارة و أنا بوجهي و أشوف
أكلرطاة ألي توقد به أبسوع كامل و لا تخلص
و أنا أنوي إجتثاثها من جذورها
الوكاد و أنا أضريه بالفاس و لله ما صار به شين
و أضرب و أضرب و اضرب وكمان أضرب و أضرب و لله مامن فود
الرجاء منك عزيزي القارئ تجسيد المشهد القادم بتخيلك أياه
و إضافة موسيقى تصويرية من النوع الحزين جدا ألي يعور القلب
و أنا أخذ نفس و أكتمه و أغمض و أنا أرفع الفاس حما حيلي
و أضرب به كما لو كانت ضربة الفأس بديتار
و أنا أنزله أقوى ما عندي مع نحطة تقل زوير ددسن 82 خط
و أنا أسكت لي شوين و حسيت بلي كهرب 220 فولت
مشى برجلي قلت أكيد أنا واهم معقولة أطا سلك كهرب مكشوف
و أنا بالنفود ؟ مامن كهرب بهاذا
و انا أفتح عيوني و أراعي لرجلي أشوف وش بلاه ؟؟
يمار به أكالمسطا بعقبي مدري وشو ؟؟
و انا أفكر و أفكر و أحلل الموقف
( كهرب 220 فولت + مسطا بعقبي + فاس )
بديهيا = أني و بكل غباء ضربت رجلي بالفاس و الدليل المسطا ألي بعقبي
و الكهرب ألي مشى برجلي
و أنا أقمز بالربع و أقوم أحوص بالطعس تقل جيب ربع مرهمين مكينته بدبي
و لي صياح تقل ( واحد مبشرينه بسلفية بيته نزلت )
و أنا أبرك بالقاع و لي جعير و نحيط
و أومي لخوياي و هم يقولون وش بلاك ؟؟
الوكاد جا القائد الفاشل و هو يركض يمي و أنا أمسح دموعي بطرف ردني
و هو يضحك علي ليما بغت تنقز عينه
الوكاد و هو يسند لي ليما وصلت السيارة
و يدوني للمكان و أنا أنجضع و أخانقهم ودوني للبيت
و لا الشيف رمزي هو و وجهه مسوي شوربة
و يقول خلنا ليما نفطر ونرشف هالشوربةو عقبه نمشي
و نتظر ليما عقب الفطور و حنا نتحاشر بالسيارة أربعتنا و كل شوين لاطمين رجلي
و خذيت لي حول 3 أسابيع و أنا أظلع منه
و البلشة كل من نشدن ليه تظلع أستحي أقولوه
نوب أقول كورة و نوب أقول زلقت بالحوش
بس المشكلة أني شمر ي و شمر معروفين يموتون على الشماتة و الشفاية
الوكاد إنفضحت بين العربان
و كل ما أروح للغدير يضحكن علي البنات
و شكــــــــــــــــــــــــــــرا
رد مع اقتباس
المفضلات