** سلة بوحي ** عبدالله الجعيثن

[عبدالله الجعيثن]

ياصاحبي مل الورق من قصيدي && اتعبت شعري فيك واتعبت الاقلام

ياما مليت من النوادر بريدي && ياما عسفت القاف من قبل لانام

ياما سهرت الليل لاجلك وحيدي && اخاف حسّادي تفتش بالاحلام

[عبدالله الجعيثن]

مال السهر بعيون الاحباب قيمه==الوقت يمضي والسوالف تجي همس

احلامهم فوق المجرات نيمه==وعيونهم تطفي على طلعة الشمس

[عبدالله الجعيثن]

مع السلامه كان طاري لك تروح && الله يسعد خاطرك وين مارحت

[عبدالله الجعيثن]

عاد الامل والقلب يلعب به الشوق && شهرين ناسيني وانا مانسيته

حبن حفر درب المدامع من الموق && ياما كتبت البيت فيه وبنيته

[عبدالله الجعيثن]

بيني وبين الخل صحبه وتدليل && اثنيننا والبوح همس الشفايف

اشعل بروس اصباع كفي قناديل && واسوق شعري فوق بيض الصحايف

ليا ابتسم ساقت يميني فناجيل && تشرق مابين الجمر ذيك الرهايف

[عبدالله الجعيثن]

انا رفيقك كان ضاق الفضا فيك && ادمح خطا غالين واسوق الاعذار

يكفيني اني كل ماحل طاريك && قلت ونعم انتم هل الطيب والكار

امدح جنابك واغضي الطرف عن ذيك && سترن لوجهي يوم نعرض على النار

[عبدالله الجعيثن]

مع السلامه روح يامتعب الروح && وانا لي الله وانت تابع مسيرك

[عبدالله الجعيثن]

ياملهمت شعري على احساس فكري && لاترحلين وجمر الاشواق صاحي

هاجوس فكري بين مد(ن) وجزري && اسأل خفوقي ليه يرحل صباحي

[عبدالله الجعيثن]

جتني تسوق خطاه وتسابق الريح && من قبل لا تاصل عبيره وصلني

استقبلتها عين من وده يصيح && صيحة فرح والشوق بعده قتلني

[عبدالله الجعيثن]

للعز بيت .. وللمراجل متاجر && وللشرذمه ياشرذمه سيف وجراب

وللطيب ساس .. وللخيانه خناجر && واللي تنكر للوطن ياكل تراب

واللي يطبل للخيانات فاجر && والا الغراب ليا نعق جاوب غراب