قبل طعشات السنين
كنا بوسط حاره من الحواري >> بداء يموه الولد
وكنا ايام المراهقه نموت بشي اسموه هوشه
ونتبع طريقة حرب الشوارع اللي ابتكروها الصينيين ضد اليابانيين
واليوم غازينن على الحاره الفلانيه
وباتسر الحاره العلانيه طابتن علينا فجأه
وهاللون
وحنا نجتمع يا اعضاء جيش حارتنا
واتفقنا اننا نغزي حاره قريبه لنا
اغلب عيالهم اصغر مننا
طبعاً علشان نكمخهم ونمشيهم على السراط المستقيم بكل يسر وسهوله
يوم جاء حول الساعه 8 عقب العشاء وحنا نجتمع
بهكا اللحظه كنت لابسن شورت وفانيله علاقي حقت لاعبين السله
وكانوا عيال الحاره يسموني شبيثان الفشقه من سرعتي الخارقه
قالوا العيال يالله يا شبيثان رح حدهم علينا ونبي نوريك بهم
قلت حصل
واروح انا وواحدن من الزقرت ( حفاظاً على كرامتوه تم الاحتفاظ بأسمه )
يوم دخلنا حارتهم
ليمار المنظر اللي ما يسر العين
اثريهم دارينن اننا نبي نغزيهم
ومعلمينن اخوانهم الكبار
ومجتمعين بعدتهم وعتادهم
يوم شافونا وهم يهجمون علينا
قال خويي الراي يا شبيثان >> هاقين بي المقرود
قلت الراي اطلق ساقيك الى الريح
وحنا نهرب يم خويانا
يوم شافونا خويانا وهم يقومون يتنبطوننا يحسبوننا منهم ( خبول ما عرفوا كرعاني )
وانا اعطيهم مجنب وادوووس
بعض الشله اللي تلحقنا ركضوا وراي وبعضهم هجم على خوياي
وبما اني هاقين بروحي ما انطرح وانا اخلي حارتي على اليمنى وادعس
>> خبيل ماعينت من الله خير ورحت للبيت ( بس زغواني الملعون )
الزقرت خوياي حصلهم تعجين سريع سريع
وهجم باقي الجيش علي انا
ومن القرد وانا اصير بوسط سهله لا حولي ولا حواليي << يعنني سبوق
مافطنت الا راع الشاص يوم جاني موحف
وانا اقوم اروغ تقل سلوقي
وهم يقومون يدزلبوني يمين ويسار
وعندك عندك
وعندك عندك
ليما فتر حيلي
وانا استسلم للامر الواقع
وانا اقعد بوسط السهله واقوم ابتسي << ابي غديهم يرحموني
الله يجيركم ما سألوني وشبلاك تبتسي
وهو يصفقن اولهم بنعله ( اعزكم الله ) بالوجه
احس خشمي صار بهامتي من قو الصفقه
وانا اسوي روحي منصفر
وهم يتكومون علي
حتى مواطيي عليهن ثلاثه يهمزونهن
وفخوذي عليهن اثنين يعضونهن
وبطني واحد حسبي الله عليه يبقسوه << للحين بطني معفط منوه
عاد الواجهيه
خمسطعش واحد عليه تقل فريق طبي يسوون له عملية تجميل
وفيه واحد ماسكن شوشتي يجره كل قوتوه
شلع طرف مخي معوه الخبل
وانا بوسط هالمعمعه لفت نظري واحد عاضن كتفي
كان نفسي اسألوه وشوله تعض كتفي بس يالله اسمه اللي زرقت من عرضهن
ولا خلوني الا عقب ما شوهوا جثة الضحيه ياااااويلهم من الله
وهم يقومون ويمشون
وانا انقلب على جنبي تقل ودي اخذ غطه
يوم صحصحت شوين ليمار والله ماحولي الوالي
وانا اقوم قومتن تخرع من قشره
ويالله اصل البيت
واطق الباب ( حدا اخواني معي بالهوشه ومن الخرعه مجودن صكت الباب )
وهو يطلع لي ابوي
قلت يبه انا شبيثان ممكن ادخل
وهو يراعيلي زين
قال وشبلا وجهك تقل مصفوقن بشوزل
طبعاً ماعندي لوه اجابه مقنعه
وش اقول
اقول اني تلقفت وصارلي هاللون
ولا اقول تهاوشت مع واحد كبير
بس الواحد ما يسوي هاللون
طيب اقول اني متهاوشن مع بس
بس باقي جسمي منهو اللي معجنوه
والبس مهو مشلعن اظافر رجليني
الوكاد وانا ابتسي واخم ابوي في منظر اذهل عشاق الكره << شطح الخبل
تبون ابوي لان قلبوه وبادلني الخمه بحنان
الله يجيركم وهو يرفسن هكا الرفسه ليمار انا منبطح بالشارع
واراعيلوه بقهر قلت ليه يبه هاللون وانا احسبك احن البشر علي
قال اقول الفقه لا اجي اطبع الرصيف على صابرك
قلت ابشر طال عمرك
ويالله يرحمن واتسفت بالبيت
وياااااااااعله ما عادة
وتقلدوا تحيتي
المفضلات