ما أدري ليش ماعمري تحمست للحضور إلا هالمرة وهذه عادتي إذا تحمست لشيء حضر المانع عساه خير.
يعلم الله كنت ناوي الحضور 100% أبيها مفاجأه لمن لم يعرف أبو ناب ولم أحط رأسي على الوساده ليلة الخميس إلا البشت معلق والشماغ مكوي كل شيء مرتب لا ومفول الكابرس 2009 أرامكو لاتخبرون رئيسي الملقوف يقول لاتحرك سيارة أرامكو تراها من البيت للشغل فقط قلت إيه راجعنا حتى أبقيق في دائرة الشغل المهم يوم أصبحت يوم أمس الخميس متى يفتح الحلاق من الساعة 6:30 وانا عند بابه أثريه مايفتح إلا 8:30 الله يجيركم.
حضروا ثلاثة حلاقين سواء ولاعندهم زباين إلا أبو ناب والزين بالموضوع كلهم يعرفونن وكل واحد يبي يعمل الخدمة المطلوبة قلت ألا وحلولات لو إني معرس.
تخبرون الشايب حكيم ويحب يرضي خوياوه قلت لهم واحد منكم يحلق الدقن والثاني الرأس والثالث ينظف ويمصع من مالحنازيز بالخشم والجبهة يعني أول مرة أتمكيج.
كلهم على لسان واحد هزوا روؤسهم أتشاء أخذت راحتي عندهم ساعتين ونصف والجوال كان بالسيارة ماأبي إزعاج هالصبح ويوم خلصو ثلاثتهم قلت كم الحساب قال كبيرهم راجو 350 بابا قلت تم لنا الله ولا هالتمكيجة لو أنا المعرس ماسويت بنفسي هاللون ولكن كلها من معزتكم عندي يبي أحد يرجع له 350 هههههههههههههههه.
يوم جيت السيارة يمار 17 miss calls مكالمة من جوال واحد من الجماعة بالثقبة ياستار ياربي وقبل أن أشغل السيارة ترن ترن وغ وغ صوت الببغا مميز هذا هو خويي أبو سبعة عشر فنجال أقصد مكالمة هلو قبل يجاوبني قال هذا هو هذا هو لقيته كلموا عمي أبو رومي و أخوته بحايل علموهم إنه مابوه خلاف هوهذا على الخط..
هلو هلو وينك يا أبو عارف سلامات تعبنا وحنا نكلمك وخفنا عليك وكلمنا الوالد بالديرة وإخوانك قلنا يمكن إنك رحت يمهم ، كيف حالك الحمد الله على سلامتك قلت خير إن شاء الله كنت عند الحلاق عسى ماشر انا اقول : قال لا بس بناخيك فلان نسيب له وإبن عم له وحنا خواله روح علينا البارحة هو وعياله سياحه ولابغيت أكلمك البارح بالليل قلت الصبح عندنا عشاء الليلة بالمخيم ولازم تجي وتجيب العيال.
الثنين الضيف والمعزب حشام عندي ويشرهون علي لو ماجيت ويوم نكست للبيت كلهم هجوا يقولون منهو هالرجال الي درعم علينا مانعرفه من شيء عملوه هالحلاقين بي ولكن يوم تبسمت عرفوا نابي وقالو هذا أبونا صايرن ولد.
ويوم علمتهم وهم يتفرقون على هالمشاغل النسائية للتمكيج غاروا مني ويبون الرحة لربعنا هالي جايين من الديرة من بعد طول غياب والفين وثلاثماثه وخمسون ريال بسبب دعوة الجعيثن تكفي عن الحضور الله يوفقهم الوفق الطيب ويجمع بينهم بخير آمين.
ونقول خيره بغيره والجايات أكثر والحلاقين يبون فلوس يعني لو أنا معرس أشوالي.
وتلهلموا بتحيات أبو ناب
رد مع اقتباس
المشاركة الأصلية كتبت بواسطة ريوفـ
المفضلات