ترا مو بس أنتن اللي تعرفن الطبخ ،، وتحسبون الرجال يموتون من الجوع لو ماطبختوا !!
وانتم ياللي متكشخين لياطلعتوا للبر تقل الواحد رايح عرس!!
إذا طلعت بأهلك للبر .. أعط الزوجة إجازة من الطبخ هذاك اليوم ، وتعال فسّر عن ذرعانك وسو هالطبخة ..
طريقة عمل المظبي على الملح
المقادير
كيس او اثنان ملح خشن
لحمه هرفي صغير طازجه......اودجاجه للناس اللي مايحبون اللحم
بهارات لتكشين اللحم بشكل خفيف جداً غير ملاحظ ..
ملح ناعم خفيف
بصل
طماطم
فلفل بلدي
زيت طبخ أو تاخذ من شحم الهرفي افضل
ورق الغار لزوم الكبسة عشان تطلع نثرية وبها نكهه الرز الزربيان العدني ذو النكهه المميزه ..
حبات هيل توضع مع الارز
عويدي او مسمار يوضع مع الارز
رز ابو كاس حسب عدد الاشخاص (طريقة الليلة لثلاثة اشخاص تكفي اربعه)
الطريقة
1
أولا ناخذ الملح ونحطه بالقدر حتى يملأ اقل من ثلثه او ربعه تقريبا بدون ماء ولا شئ .. الكيس يكفي اذا كان حجم القدر صغير .. واذا كان القدر كبير كيسان الى كيس ونص ..
نشعل النار على القدر ثم نكب الملح ساده وسطه ولا تخاف ما راح يميع او يحترق من الحراره ابدا ابدا ..
2
يترك على نار هادئة لمدة عشر دقائق حتى يسخن الملح وتأكد من ذلك بلمس الملح باصبعك ..
بعد ذلك اخلط اللحم مع البهارات بشكل خفيف جداً وكذلك اضافة قليل جداً من الملح لأن اللحم سيتشرب بجزء من بخار الملح ..لأن سبحان الله هالملح كله ماراح يمتصه اللحم ابد الا ان كان ذايب لكن الملح الخشن استخدامه في هالطبخه راح يكون بديل مناسب عن الحصى او الحجر اللي يشوون عليه حقين المندي وبالعكس انظف من الحصى ويطهر الللحم من اي جراثيم فيه عموما
الان بعد ما تبلنا اللحم .. الملح وسط القدر اصبح يصدر صوت خفيف طقطقه من اثر الحراراه .. ناخذ اللحم ونضعه بكل هدوء فوق الملح قطعه قطعه .. ولا تحرك القطع من مكانها بعد اول مره تضعها فوق الملح .. تمام ..يعني لاحطيت اللحمه خلاص لا عاد تحرك يمين ولا يسار انت وحظك حطيتها خلاص بلا لقافه كل شوي محركها عشان الملح ما يلتصق فيها
3
الان بعد ما صفيت اللحم فوق الملح لا تخاف عليه ابد .. كل المطلوب منك ان تضع القصديرعلى فوهة القدر بشكل جيد لفه مره او مرتين واتركه لمدة ساعة اذا كان اللحم صغير طازج .. ولا ترفع عنه القصدير ابداً .. وستبهرك رائحة اللحم المظبي بعد نص ساعه من وضعه داخل القدر .. لذلك لا تنزعج كثيراً ما دام النار هادئة ..على فكره اللي يبي يقلب الطبخه حنيذ يجيب له عشب يسمونه اللبخ يحطه فوق الملح ويحط اللحم عليه وان مالقى اللبخ يجيب له كم خوصة خضراء من خوص النخل ويحطه فوق الملح ويحط عليه اللحم يطلع نكهه فيه
4
على بال ما ينضج اللحم ضع البصل والطماط واحمسهم مع الفلفل وضع الهيل والعويدي .. وخل شغلك على رواقه لان امامك متسع من الوقت على بال ما ينضج اللحم ..
5
ضع الماء في القدر وخله لين يسخن ثم ضع رز ابو كاس ومعه ورق الغار وطبق على قدر الرز لين يستوي وخله على نار هادئة .. حتى ينضج هكذا .
6
شيل القصدير بعد ساعه لان اللحم قرب يستوي ويطلع شكله غير محمر ولا اروع ولونه ورائحته تاخذك الى عالم آخر من الخيال .. بشويش حاول تاخذ اللحم من فوق الملح بدون ما تحركها كثير يعني تشيلها بحرفنه وهي راح تجي معك ..
7
الارز يكون استوى واللحم كذلك وبكذا تضع اللحم فوق الرز وهذي هي صورة اللحم على الرز من قريب
وبالصحه والعافيه
رد مع اقتباس
المشاركة الأصلية كتبت بواسطة ندووو
المفضلات