يقولون اذا كبر ولدك خاووه
ويقولون لاطلع شارب ولدك حسن شاربك
قبل حول ثلاث سنين يوم تربع القاع بالصمان
رحلنا بالحلال يم الرفيعه
ورحت مع ابوي الله يطول بعمره اسوق له الوايت
وبهكالديار البدو واجد مايحتاج
والمزايين بكل حته .. اللي تمر من جنبك على شاص
واللي مصدره واللي وارده
واللي تسرح
وابوي خابروه مايحتاج القلب اخضر
وخذيت لي اسبوع عندوه
كل يوم نروح للمحطه .. الا الشايب رقبته تلف ما ادري وشبلاه
قلت يابو فلان لا تنكسر رقبتك
وهو يشطفن
مادققت بالوضع عادي
بطبعي ماني شفاي
ومن باتسر كذا ..
وعلى حين غره << معجبتن
راعيت بالمراة الا هكالزول اللي يخرع ويجيب الهم
ومن كثر مايخرع يمشي متمايل تقل دقسن ثلاث وثمانين محمله شعير واذره
يوم رجعنا للحلال
الا النور عندوه لوه رجال<< اسم الراعي السوداني
يبي يشري منوه خروف
وحنا نقلط الرجال ونتقهوى حنا وياوه
وقام ينشدنا من وين وننشدوه من متى وانت بهذا ؟؟
قال انا من اهل هالديره واجي بهذا بالنهار وبالليل ارجع
وقليل نمرح
قاله ابوي انتم اللي نياقكم وضح وعندهن لهن وايت وقلص << برنت كامل
قال ايوالله
تركت اختن لي ارمله معهن
تجي بهذا تستانس
ويقوم الوالد ويصوت للنور
وشوين الا الراعي جايبن اطيب الخرفان
وهو يحلف انه على شان هالجيره الا تاخذ هالخروف
و اللي يقهرك الطلي عليه وسم امي
ويوم مشى الرجال الا الوالد قام يهيجن << ارتفع
قلت له يبه والله لا اعلم امي
هذا غير منت جاين تعشق وتدنفس من وراه
تروح توزع طليانه هدايا
وهو يشطفن
ويروح للمحطه
ومن كثر مايلتفت ورا قشع لوه سدره
ويوم غابت الشمس بهكاليوم الكئيب
رحت اقول للراعي ثاني مره ياالنور
لاتصدم السدره
ورقبتك لا تنكسر من كثر ماتلفت << عيوني على ابوي وانا احتسي
وشوي الا ابوي مستدني الملقاط
وقام يضرب القاع
واكلم امي قداموه ابي اخرشوه
قلت له طليانتس ماشاء الله اطيب الحلال
واليوم هذا خصوصا خصوصا زادن واحد << خبل
وما امداني سكرت السماعة الا هو لي بالملقاط
ههههههههههههههههه
ماهي هاللون يايبه
الا هو ناقزن وبارتس على تسبدي
الا هاللون انا اوريك يالمروح
انا دزندت من الضحك << كنايه عن شدة الضحك اقوى من القهقهه بشوين
وهو ياخذ لوه شوين ويتركن ويجلس
يامار منغث ومبتسم
اعرفه ابوي مايحتاج << قل والله
قلت خلن الطف الاجواء
اعرفوه عليه طلعات على كيفك
خلن احرثوه
اغديه يطلع من رومانسياتوه
وانا اقول
رملا وعادي بس يابوي رفلا .. عجوز ومع هذا بالخشم كيه
في شوشته عشة جخاخن وقملا.. وبصحونها جتك الجعوله هديه
يازين عشقك خابر البنت بتلا .. هذيتس نعمه بس هذي خطيه
ما اعرفه بس ابيه يكرهه
وهو يستهيش ويحنتش وهو يقول
رملا وبيّك عاشقن بنت رملا .. مهي عجيز ياوليدي بنيه
ماحطت الخلطه ولا "دابر املا ".. ومادوجت بالليل بالفيصليه
القلب يهوى ودايم الدوم يسلا .. وابوك مايعشق بنتن رديه
دابر املا يستخدم للشعر سيم سيم ابو نخله
ونمنا هكالليلة مستانسين وراحت ضحك وسوالف عشق
ومن باتسر ودعت ابوي الله يخليه
وقلت له الاسبوع الجاي ان شاء الله نبي نجيك انا وامي ونخطبه لك ..
يوم مشيت منوه الا مرسل رساله
".. يامروح مزوح تجي وتروح
وبس ابي اونسك هالايام اللي طافت شفتك منت مستانس
والا الرملا ما أشكلت عندي ..آآآي" << السوداني كاتب لوه
وانا ماشي استغربت من الشطر
وابوك مايعشق بنتن رديه
والله انه صادز ... هذاك هو العشق
بنات عفيفات مستورات ورجال قلوبهم بيضاء
يازين عشقهم يمر من عند مراحهم على بعد كيلوات
ويامنوه شاف زوله هكاليوم ياربي دخيلك ماينام
والله يونسك يايبه .
اللهم يا ذا الجلال و الإكرام يا حي يا قيوم
ندعوك باسمك الأعظم الذي إذا دعيت به أجبت.. أن تبسط على والداي من بركاتك ورحمتك ورزقك
اللهم ألبسهما العافية حتى يهنئا بالمعيشة.. واختم لهما بالمغفرة حتى لا تضرهما الذنوب
اللهم اكفيهما كل هول دون الجنة حتى تبلغهما إياها
برحمتك يا ارحم الراحمين
اللهم ارزقنا رضاهما ونعوذ بك من عقوقهما اللهم ارزقنا رضاهما ونعوذ بك من عقوقهما ...
عذرا على الإطالة
المسافر
رد مع اقتباس
المشاركة الأصلية كتبت بواسطة الضاري11
المفضلات