صبّي و صبّي يا هجوسي صبّي
,,,,,,,, بأبيات شعري و أشعلي تنُّوره
و شبّي و شبّي يا قريحه شبّي
,,,,,,,, لعيون عذراء مرهفه مغروره
أحبها حب ٍ تعدّى حبّي :
,,,,,,,, للمال .. ولنفسي .. وللمعموره
لعيونها لو يُبعث ( المتنبّي )
,,,,,,,, خطفت قدّاااااام البريّه نوره
ولو كنت ماني خايف ٍ من ربّي
,,,,,,,, سرقتها و أدعيتها مقبوره
(بين الحنايا)..حسنها متخبّي
,,,,,,,, وان حاولت تطلع!؟ بقت مجبوره
الجادل اللي قلبها متربّي
,,,,,,,, على الهدى .. والطيبه المخبوره
لبّى دلعها يا ضلوعي لبِّي
,,,,,,,, و اقري عليها لا تثنّت سوره
خوف ٍ من اللي لا لمحها نبّي
,,,,,,,, اللي شفاته خارجه عن طوره
ناس ٍ عجز عنها (عصاي وطبّي)
,,,,,,,, يا الله لا تبلي بهم غندوره
تسرح بفكر الشاعر المتكبّي
,,,,,,,, بوصالها و حضورها و شعوره
هبّي عليها يا هبايب هبّي
,,,,,,,, قدّام عين ٍ نورها من نوره
اليا أقبلت يستثقلنّ اركبّي
,,,,,,,, واليا أبعدت ناظرتها بالصوره
أهديتها قلبي وخالص حبّي
,,,,,,,, مسرور أنا .. مادامها مسروره
يارب أنا طالبك وانته ربّي
,,,,,,,, يا واحد ٍ في معصيته اخطوره
اجعلني آرد و أرتوي وأعبّي
,,,,,,,, من بير حلم ٍ جيّته معسوره !!
رد مع اقتباس
المفضلات