أويطي يهالمتقاعدين أثريهم هاللون
هونت ماني متقاعد يوم شفت شغلهم وأكلهم وسوالفهم
البارحة عزمنا واحد شقردي الله يغنيه ويوم جيته يمار عنده سبعة من متقاعدي شركة أرامكو السعودية وربعطعش من موظفي الحكومة يمار كلهم لابسين نظارات دبل قلاص سود وفريماتهن حمر وكروشهم مثل الي يذكر المزيون بعضهم مركي لحيته على كرشه وبعضهم مفحج عنها ومنزله بالأرض حمالة الثقلات وكلهم يشربون شاهي مر بدون سكر دايت.
قلت إلا هذولا ويش يبي يشبعهم ليتي متعشي عند هلي وجاي ويش يملاء هالكروش؟ ،
وسوالفهم كلها بالضغط والكولسترول والسكري والرماتيزم وأنواع الأدوية وتوصيل الطلاب ومهاوش مع حريمهم قالة لي أم فلان وقالة لي أم فلانة ويقولون إنهن يخي بس يرسلننا تقل سواقين لهن هقوتي إنهن طفشانات منا.
واحد يقول كل يوم أجمعهم وأسوي لهم تجربة وهمية على إطفى الحريق هم يضحك الثاني يقول يعني تسوي لهم fire drill ثم يستقعد هذاك المتقاعد من الجيش ويقول اثريك مثلي أنا أعمل لهم طابور عسكري صباحي هروله وبطيء سر والي يغلط أوقفه على الدرام وأنا قاعد على فراشي لإني ما أقدر أجري من هالكريشة.
أحسن مافيهم إنهم يوم قلطنا هالنشمي على خروفين يمار خوياي يوم حطو يديهم بالسلطات والمقبلات والجريش وقلت متى يبون يمدون يديهم على هالخرفان إلا مامن شين شوي يمار يوم كل واحد ارتكى على جموعه وقام عشاكم يالربع ماذقتوه قالوا ممنوعين من اللحم الأحمر الله لايبلانا مابلاهم.
المهم هونت لا أتقاعد أبد لو ياصل عمري المية.
عوذا كيف مافيهم من مد يده على هالذبايح بكرا ابي أعزمهم على عشاء فجل وكراث وشاهي مر.
توي عرفت ليش ماترخص الغنم لهذا السبب تذبح وترمى بالزباله أعزكم الله لا وعاد الحلويات ما مروا من جنبها ولا يلتفتون.
سألتهم هذا السؤال قلت ويش هالي نافخ بطونكم تقل حلم يصار ماتأكلون؟ ، لكن ماجاوبوني إلا في إبتسامات ساخرة وكأنهم يقولون لي تقاعد وتلاقي جواب لسؤالك.
لا أحد يتقاعد وباقي فيه عرق ينبض أبد .
رد مع اقتباس
المشاركة الأصلية كتبت بواسطة ريال الفسحه
المفضلات