السلام عليكم روحمة الله وبركاته
الف مبروك دخول فصل الربيع
وعقبال مانشوفكم ناجحين لـ فصل الربيع2
قبل كل شي لاحد يحتج على العنوان فهو قول مأثور عن امير المؤمنين عمر بن الخطاب رضي الله عنه !
عزمن واحد من العيال على شبة شيبان العصريه ــــــــــــــــ والله ياسوالفهم ومزحهم حتى خناقهم وهوشاتهم تشفق عليه
وعزالله ماتسذب من قال المجالس مدارس !
الوكاد جيتهم ومامداني خذيت الفنجال الا وباغتني حدا الشيبان بسؤال وشلون الربيع ؟؟
والله وهي تطقن البوهه
وانا اتبرطم
انا ماعرفه ولا هو يعرفن !!
بس وش عرفه اني رحت ادور الربيع وتوي جاي؟
الوكاد اني للوهله الاولى حسيت نفسي مشهور<<<< مايمديك !!
بلعت ريقي وجمعت قواي وشحذت الهمم للاجابه عن سؤاله خصوصا ان الكوره بملعبي والعيون موجهه لي
فــ ماقدرت اجاوب لان بطني قام يحكن من الشفايه وش عرفه !!
قلت وش عرفك اني طالع للربيع ؟؟!
قام يضحك لين بغى ينقض وضوه
قال وهذا اللي مهولك
وهو يستلم الكوره وهو يجيك مطبدز بهجمه مرتده علي ــــــــــــــــ خصوصا بعد ماشتت الكوره بملعبه
قال ماتشوف وجهك غادين اسمر ويديك ممشقات تقل جلد ضب يادافع البلا
الوكاد ان الشيبان بهم سرعة بديهه ويعرفون الرجال من وجهه ــــــــــــــــــ كيف لا واصغرهم متوطي الـ ثمانين سنه ماشاءالله !
نرجع لتقاذف الكوره
قالي هالشايب السلطه اللي ماخلاني اكمل فنجالي ـــــــــــــــ يقول حنا من اول اذا سمعنا ان الديره الفلانيه مربعه شدينا يمه بحلالنا واهلنا !!
مع ان الخبر ياخذ له شهور ياما يوصل ـــــــــــــــــ وانتم هالحين بهالجوال !
تلقى الواحد مرتسي بدونيته ويدري بيشه جاه مطر ولا لا !
ثم استطرد قائلاً شيباننا عندهم دعوه يقولونه بالربيع للي مايبونه ـــــــــــــــــ يقولون عساك ترعاه بعيونك !!
يعني تشوف الربيع وانت ماعندك حلال تسرحه به
وقام يضحك ويقول ياسبحان الله لحقتكم دعوتهم ــــــــــــــــــ هذولا انتم عانين للربيع علشان ترعونه بعيونكم
قلت يابن الحلال بس وكل الله عسى هكالوقت مايرجع بس !!
انت تضحك علينا علشاننا نرعاه بعيوننا على قولتك ــــــــــــــــــ وانا اقول الحمدلله اللي مامعنى حلال وعلى دور شيبانك كان تلقانا للحين مقفين نبي الربيع ولا وصلنا الصمان
8
8
بالثمانيات هاه
الوكاد قام واخذ الكوره يبي سنتر والاحتجاج بادي على محياه
قال انت تبي تقولي ان وقتكم احسن من وقتنا !!
قلت يابن الحلال انتم على العين والراس بس جيلكم وجيل شيبانكم ماخدمو البشريه
قال انزح وراك بس <<<< طرى علي شنقل
قلت ليه شايفن سناعيس
قال حنا مكنا المراجل والعلم الغانم ولا انتم جيل ابو سروالينماتسرحون بالبهم !!
ياوالله قلب الطاوله على راسي وشبكه بالتسعين ـــــــــــــــــــ اجل جيل ابو سروالين <<<<ماسبق عليه هاه
والله وانا استشيط غضبا واتأبط شرا ــــــــــــــ قلت ياخوي لاتشكيلي ابكي لك اجل شيبان ابو ثوبين معجبينك
والله وانا احشره ولاطرى علي الا موضوع للشبث !!
يقول فيه واصفن شيبان هالوقت
" لاهم اللي مكنو الغزاوي والمعارك وايام الذبح والسلب ولاهم اللي مكنو التكنولوجيا وجيل هالوقت وهم اشبه مايكونون بجيل ناقل للأحداث ليس الا
يعني ان جاز التعبير نقدر نسميهم اهل الفتره
88
8
8
والله وانا اجيبه بالهدف الذهبي
وانا اقوم من بينهم فرحان بالفوز وافسخ ثوبي وعلقه على الوجار
قالي وين وين تعال ياحبيبي ماتدري ان الفيفا من زمان الغــو شي اسمه الهدف الذهبي !!
تعال نمدد لضربات الترجيح !!
اجل حنا جيل ناقل ـــــــــــــــــ لا واهل الفتره بعد !؟؟
قم تسان بك حيل طارحن قم ــــــــــــــــــ والله وينزل بشته ويربط ثوبه اللي فوق واللي تحت ماني قايل لكم وش سوا به
وهو يتغير لون وجهي مابين اصفرارا واحمرارا مرورا بالاخضرار
وانا افز فزة الاسد ليا شاف غزال
و انا احزم ثوبي واتعصب بشماغي
وانا ااااا
بعد وانااا
وانا اقول اكرمكم الله تمسو على خير
رد مع اقتباس
المشاركة الأصلية كتبت بواسطة مصيول
المفضلات