هذا الموضوع رداً على موضوع شنقل
هيضن شنقل
ايام الطفوله الغبراء
كنت اتابع افلام كرتون واشوف بباي وشلتوه
تخبرون مخي من جنبه يوم انا على اولي ( يعني هالحين متسنع )
واشوف بباي ياكل هاللي بالقوطي ويصير قوي
المهم قمت اهوجس شلون اصير مثلوه
والمشكله اني مصدق
ويوم جاء الغداء ولا حضرة جناب الوالد الله يحييه ويخليه جايبن جرجير
وانا اقوم ابلع من هالجرجير
وندف
وبلع
واقوم
مدري ليه جاني احساس اني صرت قوي ( يلعب عليه الشيطان )
وانا انزل الفانيله واقوم اراعي لعضلاتي ( بعد ديود )
واطلع بالشارع بعز الظهر مصلوخ بطرق السريويل
واقوم ادور احد ابجرب قوتي عليه
وانا اشوف عياده ( شخص من عرض الاشخاص جارن لنا )
وانا اجيه واصفقوه كف ( كان صديقي بس ابليس زغواني )
قال وشفيك
قلت رح صوت لابوك ابيه
قال وش تبي بوه
قلت اخلص علي
وهو يروح ويصوت لابوه
يوم جاء ابوه قال خير يا شبيثان وش عندك تقل بريعصي
قلت ابتفاهم معك انت وولدك
وهو يهز راسوه ويدخل ولدوه ويدخل ويسكر الباب
قلت نااااااس ماتجي الا بالعين الحمرا
وانا اقوم ادور بالحاره ابي المشاكل
ولا فيه واحدن م عيال الحاره يلعب لحاله عند جدار بيتهم
وانا اجي واشوتوه
وهو يقمز ويصكن هكا الكف
وهو يهرب للبيت
وانا الحقوه ( ابليس يركض بجنبي يقول احلاااا يا قوي شف هرب منك )
وهو يدخل البيت
وانا ادخل وراووووه
وامسكوه بالحوش واسدحوه
ولا هذي اموه شايلتن صحن الغداء ( توهم متغدين وخالصين )
قالت شبيثاااان يا علك ماتلفي على الصديق
وهي تصفقن بطرف الصحن مع قلتي ( القله هي منتصف الرأس من فوق )
وانا ادوووخ احس اني ودي انام
وهي تصفقن مره ثانيه بالصحن مع وجهي
ولا الرز منكب على خشتي وخشمي طالعن من هامتي وطالعن منوه جرجير
وتخبرون القدر ما يركب الا على ثلاث
وهي تعطيني الثالثه مع اذني
تسيف يالربع خذيت شهر اسمع رنت الصحن بأذني
وانا اقوم
واروح للبيت بكل هدوء
وادخل البيت وامي تراعيلي ماتدري وشبلا خشتي معفوسه
وانا انجضع على فريشي وانام نومه هانئه
صحيت بأمي معه منشفه وتبله بماء وتمسح الرز اللي لاصقن لصدري
وتسمي علي
تقول وشبلاك متهاوش مع عمال المطعم اللي بجنبنا
شنقل
اللي اثر على عيالك هو افلام كرتون الله يقلعهن لا تخليهم يراعون له
خلهم يراعون للجزيره الوثائقيه
( علشان شهر وحمودي يصير مدرس علوم )
وتقلدوا تحيتي
رد مع اقتباس
المفضلات