لا تحسب ان دمعي نـزل دون سبّـه .,. ابكي من الفرقا و هي مابعد جـات
.
.
ليه المسا عـوق الشقـاوي و طبّـه ؟
و ليه الهبوب تصحي القلب لا بـات ؟
و ليه القمر يدعـي جريـح المحبّـه ؟
و يقول له يا هيه .. ما فات .. ما مـات
جرحك ظهر لو قلـت للوجـه خبّـه
و للحزن في ضحكك رسوم و علامات
و ليه المطر بالذات ريحـه .. و صبّـه
كنّه رسول بيـن الاحبـاب بالـذات ؟
اشتـاق فيـه لشوفـتـك و اتنـبّـه
للي نسيته مـن مواقـف و نظـرات
لا استانس الخافق ذكـر مـن يحبّـه
و رجع يراجع فالوناسـات مـا فـات
يا مرتـع القلـب الحزيـن و مربّـه
يزين بك مثل الذهب صدر الابيـات
هيهات ينسى القلب شخـص ٍ لعبّـه
و هيات يدله خاطري منـك هيهـات
سبك مديـح و مـدح غيـرك مسبّـه
تقول و اذني صوتها تقول لك هـات
و نبع الغلا عنـدك و عنـدي مصبّـه
و من الولا .. في خافقي لك .. ولايات
و طيفك حطب عيني .. و عيني مشبّـه
و الشوق برد ٍ ما انقطع لو للحظـات
و مكانك الصدر و لـك القلـب شبّـه
بين الظلوع اللـي فردهـا التنهـات
و لك بيـرق ٍ فالقلـب حبـك يهبّـه
شامخ و لا هزه من العـذل غـارات
محبتـك فالوقـت ذا مــا تشـبّـه
الا بخيمـة بـدو بيـن العـمـارات
ان شفتني ضايق و اهوجـس و اسبّـه
اخاف غدر الوقت .. و الوقـت دورات
لا تحسب ان دمعي نـزل دون سبّـه
ابكي من الفرقا و هي مابعـد جـات
الـيـوم كــل امورنا .. مستـتـبّـه
و بكره ماندري وش معه من مسرّات
اربّ قلبـك مثـل قلـبـي اربّــه
ما يخلفه شور العـرب و المسافـات
..
لـ الشاعر / محمد بن فطيس المري .
.
.
رد مع اقتباس
المشاركة الأصلية كتبت بواسطة صلفيق
المفضلات