مثل ماتدين تندان ياجماعة الخير الي ركب هالأمثال وهالحكم ماهو إنسان بسيط إلا هو ويش دراه أن أبو عارف رايح يصيد أبو ضبان ويدبسه في وليمة مقدارها خمسون خروف مع توابعها يقول الشاعر ياحلو ردات الجزاء قبل حينه ويقول الآخر خله مع الديان تمشي لحاله ياصرت مانت لمسة الخشم حمال.
السالفة مادريت اليوم إلا والجوال يصقع إطالع لرقم المتصل هذا ابو خزعل صاحب الضبان الذي وهقني بغداء المعاريس وضيوفهم ولكن ربك سلم ، قلت أجاوبه لا إلا المهم ترددت شوين وغلب خيار التجاوب هلو هلو وينك ماتجاوب يا أبو عارف آسف يا أبو خزعل جوالي كان على الشاحن نعم ويش عندك قال أنت بالبيت تلعثمت وترددت شوين وقلت إيه ويش عن\ك ليه تسأل قال جايك مسافة الطريدز.
قلت أصبر أقول فال آه قل قلقل الله حنوكك ويش تبي تقول قلت هونت ماني قايل شين قال أنا الي أقول قلت ويش تقول قال خلك عند الباب جايك أبيك تروح معي لحظاير الأغنام تشتري لي خروفين أقرنين تمايم لولدي خزعل قلت خزعل قال خزعل قلت جلي ماهو يدرس بالمتوسطة قال وياصار بالمتوسطة ماله طلاعة قلت بلى طرت علي اللعانة الله لايواثمن.
قلت إنتظرك ومخمخت على خطة صيد وإنتقام من أبو خزعل هذا المروح أخليه ثاني مرة مايلعب بذيله مع الكبار والكبير الله إنتفخ الشايب يوم سقطت عليه هالجملة من سابع سماء وصرت أدير رأسي يمين ويسار وفوق وتحت ويوم نظرت تحت يوم جتني الفكرة الجهنمية القاصمة والكاسحة والكارثة بس لا أحد منكم يسرب الخبر لأبو خزعل قبل تنفيذها والمذكور لديه حظيرة أغنام بس مايبيع بالأجل وتنبه الناس ماعندهم كأش فنويت ألعب عليه ولعبت لعبتي بس باقي التنفيذ الله يلحق على خير.
إحلفوا كلكم أنكم ماتخبرون أبو خزعل أبو الضبان إن علمتكم في خطتي. ، والللط ولللش أدري ماعندكم قدرة على حفظ السر بس أخبركم بالسالفة بعد يوم الخميس الجاي بعد إتمام الصفقة الرابحة.
تريونا يايينكم. سلام.
جتني رسائل تعهدات ومحاليف تطالب في شرح الخطة ولو بشكل مختصر مادريت أنكم شفاية إلى هذا الحد الله يدفع البلا.
الخطة بإختصار جاني الرجيلي أبو خزعل ورحنا للزرائب وشفت حظيرة المذكور وكان بها مايقارب الخمسين خروفاً سميناً ، قلت ويش هذه الخرفان يارجل ويشلون تبي تشتري وأنت عندك هالذبايح الزينة؟ ضحك ضحكة صفراء خخخخخخخخخخخ ههههههههههاي وقال تبي أذبح لهم يقصد خويانا شبتنا من هذولي أمهات الف ومائتين ريال ؟ قلت ليه لا أحسن من أن تشتري قال لا إشتري على 500 ريال يعني إثنان في واحد.
هنا جتني اللعانة بهذه اللحظة قبلها كنت صحيح وقلت ياشور عندي يا أبو خزعل قال ويشو قلت هو أن تأخذ غنمك كلها بلك دينا وتشيل عيالك وتذهب بها للربيع قبل الخفجي 40 كم يوم الإربعاء الجاي تخليها تشبع من نعمة ربك العشب بهالثلاثة ايام وأنا ومن يخف معي من الجماعة نلحقكم بعوايلنا يوم الخميس ثم تغذينا هناك بالبر على تمايم خزعل الله يصلحه .
قال والله خوش فكرة وبرأسك خلاص إتفقنا ويش يلزمني قلت ابد رز وقدور وصحون وطماط وزيت وملح وماء وتستأجر لنا من هالمخيمات الجاهزة وحنا نجيب معنا القهوة وملحقاتها وكميات من الماء والفواكة وتصير قيلة منتازة وإتفقنا على ذلك.
الخطة أن أدور على الجماعة كلهم والله يعين أشغل الهاتف على البيقية الباقية مثل أهل الجبيل والدمام والتقبة وأبقيق وأقول لكل واحد منهم أبو خزعل يعزمك على تمايم بالبر يوم الخميس وملزم عليك بالحضور وأبي إساعد أبو خزعل بالقدور والصياني والغاز والسكاكين الله يعين ولايمكن أن يرجع من الخمسين خروف واحد نقسمهم بين غداء وعشاء والبادي أظلم.
هاه تلحقوننا بالبر الله يحييكم على حسب أبو خزعل طلايع ولده الله يصلحه.
رد مع اقتباس
المشاركة الأصلية كتبت بواسطة الجثري
المفضلات