سلام عليكم يالربع والربعات أهلكتني عوامل التعرية الله يدفع البلا كيف يوم طالعت لنفسي بالمرآة بغيت أبتسي يخي صايرن مثل هالصورة بتوقيع المتكي ورا الشمس عاد هالوعكة الشتوية زادة الطين بله.
حتى عشيري ابو حسن يسألني يقول ويش بلاك يا أبو عارف صايرن هاللون ؟ قلت وليه معجباتك حنوكك هاللي تقل حنوك صخله ماذاقت حليب أمه؟ نسيت الله يجيرك إنه زعول ماينزل على خشمه الذباب ما أمداني أقول له هالكلام الي مابو شين إلا هو ناقزن بحلقي تقل قرطة تعرفون القرطة مثل النمر لكنها أصغر حجم تعيش بالجبال وتأكل الغنم تلبد للشاة تلصق بالقاع كأنها حصاة لين تجي الشاة تنشاها ثم تعض فمها حتى تموت بمكانه دون حراك أو جعير.
ابو حسن هذا طمر علي يقول أنا اللي تقل حنوك صخلة ياوجه العنز قلت عين خير حنا هالحين عند باب المسجد ولو تهاوشنا يبون يفرعون بيننا هالناس ولارايح يبرد نفسه الواحد منا من الثاني لكن إذا فيك خير وتبي تهاوش وعدك طعس مشهور في بر الجعيمة قال متى قلت يوم الخميس الي جاي الساعة الثانية مساءً قال تم.
ويوم جاء يوم الخميس الساعة وحدة حطو غداي يمار مالي خاطر بالأكل ما إشدهيه قالوا هلي ويش فيك تقل ما أنت على بعضك ؟ قلت لا مابي شيء بس ما إشتهي الأكل يوجعن بطني وضرسي الي باقي وأنا أعرف السبب ليش يوجعني بطني من الخوف خويي مصك وخبل وضرسي من كثر ما أعض نواجدي أتشجع وأراعي لنفسي بالمرآة يمار ما أخوف تقل باردن وجهي ما أدري ويش السالفة .
المهم يوم جت الساعة وحدة ونصف وأنا أشغل سيارتي قالوا عيالي وين رايح قلت أبي أتمشى لكن إن أبطيت شوفونن بطعس مشهور قالوا فال الله ولافالك والله اليوم ما أنت معجبنا الله الله ومشيت يوم أقبلت على الطعس يمار براس الطعس سيارة أبو حسن وعندها بعير وثور شوف عيني قلت أمنا بالله ويش جمع هالثلاثى ويوم قربت أكثر يمار السيارة فعلاً سيارة ابو حسن والبعير هو أبو حسن زاته والثور ثور ثور صعب وسمين قلت أيه أكيد هالأجودي أبو حسن تحسف على سوء الفهم الذي حصل بيني وبينه ويبي يذبح هالثور للجماعة ويجعلها مصالحة يمار أخبر الشمري مايداني الثور ولا يحبون لحم ولاحليب البقر إلا تالي عقب النيدو.
المهم وقفت سيارتي تحت الطعس ورقيت يم أبو حسن مقدم حسن الظن والنوايا وحتى عصاي خليته بالسيارة أبي أقول والله ما تذبح هالعجل ومسامحك يا أبو حسن ولكن الله يجيركم يوم قربت منه على بعد أمتار تعبان واقف نفسي من طول الطعس وعوامل التعرية قلت سلام عليك قال سلامك مايسلمك وهو يركض علي بهكالقناة وهو يصقعن بالرقبة يمار من صيد قبل أمس ويوم وعيت يمار أنا مربط على ظهر الثور يصب دمي مع رجلين الثور ويمار مالي إذان الثور خنافس وجعولة وحشرات وحازمهم وحازمني على ظهره وهو يطلق رباطه .
والله يامنك يحلق بي هالثور بين السماء والأرض ويتجشم الشجر مثل المجنون وهو وراو بالسيارة ويضرب بوري هرن وتعال شوف والثور يتوجه يم الخط السريع مثل الفشقة ويوم وصل طرف الهاي وي وهو يغماء علي قلت هالحين يتكرفس بحدى هالسيارات المسرعة ونروح فيها ماهمتني نفسي لكن خايف على الثور لا لا أقصد ماهمني الثور المأخوذ خايف على عمري.
ويوم أخذت مقدار بسيط وتروح الغيبوبة شوين وإطالع يمار يركض خلفي حوالي عشرين عسكري مع مدرج المطار وقدامي طائرة ترايستار الضخمة في أول المدرج وهو يغماء علي ويوم راحت الإغماءة يمار وراي سبع سيارات شرطة وإسعاف وهذا البحر قدامي وهو يغماء علي ويوم جرت بي نبهة يمار يذن الفجر ويابسن أفمي وأتذكر إن عشاي مرقوق.
كش يا أبو حسن حتى بالحلم يزعجك.
رد مع اقتباس
المفضلات