انقرصت وتبت

**العَـــروب** · 23-01-2009 16:36

السلام عليكم

شلونكم يا جماعة .. مشتاقتلكم والله

هالفترة مثل ما انتو عارفين فترة امتحانات .. والكورس هذا كورس تخرج باذن الله

وابشركم اجتزت 5 مواد بنجاح وباقي بيني وبين الشهادة مادة وحدة .. والله كريم ..

المهم اني خلال هالفترة بديت استرجع ذكرياتي .. وبدت حياتي تنعاد على شريط .. << هيه منتي بالفيض

المهم

انا مثل ما تعرفون ان شهادتي هي كيميا حيوية وناوية اتوظف بمجال التغذية والريجيمات

بس ما تدرون ليش انا اخترت هالتخصص ..!!

ايام الثنوي كنت ابي ادخل طب .. وشديت حيلي لين تخرجت بامتياز ولله الحمد وطلعت من الـ 50 الاوائل على الكويت ..

وقدمت على الطب وانا واثقة اني بانقبل .. بس وقتها كان في نظام اختبارات قدرات جديد ما كنت ادري عنه وما قدمت هالاختبارات ..

حسبوا لي النسبة المكافئة ونزلت نسبتي حيل وما قبلوني

المهم ان نفسيتي تعبت وتضايقت وبنفس هالفترة تحدد موعد عرسي

بالفترة هذي زاد وزني حيييييييييل .. كنت دبة .. من النفسية وضيقة الخلق

عاد قبل العرس بـ 3 شهور ما خليت ريجيم ما سويته لين تحولت من دبة الى رشيقة

كانت فترة معاناة نفسية وجسدية

ومنها حطيت ببالي اني بـ اشتغل بمجال الريجيمات

المهم

الحين بما اني قربت اتخرج ولله الحمد .. كان لازم اني احط عيني على المكان اللي باشتغل فيه ..

زرت اكثر من مستشفى وشفت الاوضاع وقارنت بينهم .. وما عجبني الا مستشفى واحد بس

قلت بس هذا المكان اللي ابيه .. وما فيه الا شاغر واحد لا غير ..

وأنا وزميلتي نتنافس عليه

عندي هناك صديقة موظفة بالقسم .. قالت لي داومي معاي لمدة يوم واحد بس .. عشان اجرّب الوضع بشكل عملي .. بس انتبهي ترى بتشوفين العجب !

قلت لا تحاتيني اختج ذيبة

ولبست البالطو الابيض وداومت من صباح الله خير ..

وقلت لها يالله عاد وين تبيني ابدا..

قالت ابدي باجنحة المرضى دوري عليهم وشوفي شنو الانظمة الغذائية اللي يحتاجونها

قلت طيب ..

وانا رايحة هناك مريت عند غرفة كشف .. والا هذا ابو غازي يفحصونه ..

ما ابي اقول باي قسم .. الستر زين

كمّلت طريقي .. والا اسمع صوت صياح

صوت بكا على صوت ضحك .. على صوت صراخ ..

يوم قريت اللافتة والا هذا قسم الطب النفسي

شفت مريضة هناك .. وقلت يا ربي انا شايفة هالشيفة من قبل بس مادري وين

وين يا ربي .. وين وين وين وين وين ..

لين سمعتها تقول للدكتور : اص ص ص ص .. .. كن بخير

قلت بس عرفتها ..

خليتها تولي وكملت دربي

دخلت اول غرفة مريض ..

قريت تقريره وبلعت العافية .. مدري والله وشلون احط نظام غذائي لهالمرض

قلت له انت وش تحب تاكل ..؟

قال احب المجابيس .. قلت بس خلاص .. غداك اليوم مجبوس

طلعت ودخلت الغرفة الثانية .. والا هذا فلان .. ( شخصية مشهورة ) ..

قلت له سلامات ما تشوف شر يا فلان ..

قال الله يسلمج .. بس وين فلانة هي مسئولة التغذية .. انتي وش جايبج << مو طردة مو ؟

قلت له انا استلمت مكانها بس اليوم ..

قال .. اهاااااااا اكيد عرفتي اني موجود وجيتي تشوفيني وتسولفين معاي <<<<

قلت له نم بس نم واليوم ماكو غدا .. مادري تحسب روحك براد بيت

طلعت ورحت لصاحبتي .. قلت لها عووذه مابي قسم تغذية الاجنحة شوفي لي مكان ثاني

قالت خلاص .. استلمي عيادة الريجيمات ..

قلت طيب

رحت قسم الريجيمات وقعدت على المكتب .. طبعا يجوني مراجعين اشوف اوزانهم واكتب لهم ريجيمات ..

دخل واحد .. بعد السلام والمقدمات .. وشرح الحالة ..

قلت له تفضل على الميزان

قال ليه .؟

قلت ابي اشوف طولك ووزنك

قال ليه تبين تخطبيني ..؟

قلت له انقلع رح للغرفة الثانية ولا عاد تجي عندي

وبعده دخلت مريضة ما شاء الله للحين مادري شلون مرّت من الباب

ابلة عطيات الا شوي

قلت لها تفضلي يا خالة

قالت تخلخلت حنوجج انا كبر بنتج ..

قلت هاه ..

آسفة ما عليه سامحيني .. ما عندي نظر

قلت لها تفضلي عالميزان ..

وقفت عالميزان .. والمؤشّر قام يضرب يمين يسار يمين يسار يمين يسار

احس ان الميزان قام يلهث يقول تكفين شيليها عني

قلت لها خلاص سجلنا الوزن والطول

الحين جا دور قياس نسبة الدهون

الطريقة اننا نستخدم جهاز ينحط على اماكن معينة بالجسم نقيس فيه نسبة الدهن

واحد من الاماكن اللي نحط الجهاز عليها هو الفخذ قريب شوي من الركبة ( طبعا هذي ما نسويها الا للحريم ومو لكل الحالات)

قلت لها لو سمحتي ارفعي ثوبج ابي احط الجهاز عالفخذ

بنت الحلال ما صدقت خبر .. قبل ما اكمل جملتي والا هي رافعة ثوبها لين راسها

انا جبدي قامت تقلب وحسيت بصدمة واحساسي انجرح وحيائي انخدش

أنا قلت ابي الركبة .. تطلعين لي الاولي والتالي ليييييييييييييييييييش .. : (

تركتها ورحت استفرغ .. اكرمكم الله

عقبها رحت لصديقتي ..

قلت لها عووووووووووذه .. الله لا يحدني على هالشغلة ..

ودقيت على زميلتي اللي تبي المكان .. قلت لها المكان لج عليج بالعافية انا مابيه

باقي لي على التخرج امتحان واحد بس

ان نجحت فيه باذن الله .. بآخذ شهادتي وأعلقها ببيتي .. وباتفرغ لعيالي وتربيتهم ..

يكفيني اني اخذت الشهادة وباقتدار .. والا المكان اللي ما فيه راحتي الله لا يرده

هذي نهايتي مع هالمجال الله لا يعود ايامه

ملاحظة :

ابو مجابيس طلع ممنوع من الدسم .. وسمعت انه انجلط بعد الغدا

ملاحظة 2 :

الموضوع بريء لا تفسرونه غلط ..

وسلامتكم

**يـــوسف** · 23-01-2009 17:42

حيالله أم يوسف الطالبة الدافورة

امــا اللي على طول هذي عاهه ومن أسبـــآب هروب شبابنا وزواجهم من الخارج

أم يوسف الله يوفقك ويحقق اللي بخآطرك

لي نكسة تفصيلية .

لاهنتي ياام يوسف

توسدي إحترامي

**الشبث** · 23-01-2009 18:19

ام يوسف

افهم من كلامتس انتس عقب ما فشلتي بالطب قدمتي على الزواج

>>> فاااااهم غلط ومن جنب القده خخخخخخخخخخخ

الله يوفقتس يا ام يوسف

تستاهلين كل خير والله

حياتس بالفله

وتقلدي تحيتي

**ابو خلوف** · 23-01-2009 18:32

والله مشكله

الحين خلق الله يدورون وضايف

وانتي تشرطين

ولا الوضع عندكم ماشي

**العَـــروب** · 23-01-2009 19:09

مداخلة قبل الردود .. لان الظاهر انفهمت غلط

لا يروح بالكم بعيد

سالفة بريئة والله

**منصور الغايب** · 23-01-2009 19:41

إذا الموضوع مثل ما فهمت ...!!

أقول طولي بالك شوي يا ام يوسف ...!!

لي ردة بعد ما أفهم ..

<<<<<< منصور زعلان

**حمـود** · 23-01-2009 20:40

ههههههههههه

اجل خليج تعلقين الشهاده بالبيت فوق الفرن

هههههههههههههه

والله يوفقكتس بالاختبار وتخرجيين

دمتي بخير

**εïз خزامى εïз** · 23-01-2009 21:30

هههههههههههههههههههههههههههههههههههههههه ههههههههههه
صدز؟
يابنت لازم الكفآآح<<اقعد يالكفآآآح
طبيعي وضع المستشفى

هههههههههه
اللهم لا شمآته
يالوعة كبدي معكـ
اشتقنآلكـ وفقدنآتوآجدكـ يالعرووب
الله يوفقكـ

**ماجد** · 23-01-2009 23:05

ياشين الي يصير بينك وبين الصحن
خلوني اباكل على كيفي << هو صادق << دب يعزز لدب

حسب علمي ان في بعض المستشفيات الكبيرة عندهم مشرفات على اكل المرضى ويكون عملهم اشراف على المطبخ الخاص بتزويد المرضى بالوجبات والشغلة هذه ماتخليك تتعاملين مع المرضى والمراجعين بشكل مباشر يعني شغلك راح يكون مكتبي وقريب من المطبخ ( متى ماجعتي يصير الاكل حولك )

بالتوفيق اختي