/// حفلة الخميس ///

[ليلى بنت عبدالعزيز]

مرحبا يالفلاويه
شخباركم مع البرد..!
:
:
بقول السالفه الي عندي
بعد دوام الاربعاء والجو بارد
جاني البرنس حماده قال يمه تراي عازم الشباب ومعهم اخوانهم الصغار بكره العصر
الله الله بالحركات والشغل الزين
قلت :ابشر ياابوي
واصبحنا الخميس
وبعد العصر
بدت الوفود تتجمع ..كن حماده دوله مستقبله اجتماع القمه داخل طالع>> ماقلت شي ترى
وعاد هاه يمه لايشوفونك الشباب ابد ..تكفين
ويهاوش اخته والله لو تنزلين للدور الي تحت ياويلك ..بتبرى منك >> فديت الغيره على المحارم
وبعد بدايه الاجتماع
جاني حماده باشا قال يمه وش اسم ام فهد يقول انا عارف اسم امك وكل شوي يقوله
قلت منيره ..
ويروح ويرجع ..
يمه
وش اسم خالة نواف الي تزوجت من الفلانيه في الاجازة تدرين حافظ اسامي خواتي وخلاتي وعماتي.. الوسخ
لاحول ولاقوة الابالله متى تفكك هالعقد..!
وادخل عليهم بزعم اني بصورهم واكسر الحواجز بيني وبينهم ..بغى حماااده ينجلط
ويستحون والعوينات تتلاقط ،، ياحليلهم
وينقز واحد خاله وش تشجعين ؟ واي لاعب يعرف يلعب ؟ وش الفريق الاروبي الي تتابعينه...؟
اممممم اسئله صعبه .. والله البلشه
قلت اشجع الهلال (الهلال عالي عالي) والاعب اكيد ماجد عبالله
والانديه الاوربيه مااااحبها كفار >>>عاش مصرف
ووغدي يتقلب وجهه جاء نصراوي على هلالي على مخلط ماشستر
المهم قام واحد جرئ ويحب الفضايح قال :خاله تدرين ان حماده يهرب من المدرسه
قلت :ايش .. تهريب >> اشتغلت الجينات الوراثيه
قال حماده : هالسنه مرة وحده بس ..
وابتسم ابتسامه ،،توعد خل الشله تروح واوريك
واطلع واخلهيم وافكر بتهريب الولد ضايقن صدري
لحظاااات
الاواحد يصيح وله جعير
ويجي عندي >>هو احد اخوة الشباب المعزومين (صغير 6 سنوات)
خاله: شو فيهم..
وش فيهم ياحبيبي ..اوريك فيهم
وش سويتوا بخلودي ليش يبكي
قال وهو يشاهق ياله يرد النفس : ماحلبوني
قلت: ايش وشو
قال واحد منهم :مافيه حليب وملعبينه عشان خاطر اخوه ..
صاروا الوغدان الكبار رعاه وراعين حلال ،والوغدان الصغيرورين حلال (بهم)
خلاص احلبوه وفكونا ..قال لا خلاص مابي اصير عنز
قلت هاه وش تصير ذيب >> برفع معنوياته
قال :لاوع ابي اصير تيس
قلت حطوه تيس وله قرون بعد
قالوا لا مانبي وتصير هوشه وبطلوا عن اللعبه
ولعبوا لعبه ثانيه >> تبكي بصراحه
حرب
حطوا المخاد والمراكي زي الحاجر وهات ..يارمي
معهم مسدسات ام خرز وبنادق ام خيط
وموت واسمع غزة واسرائيل واستشهاد..>> مالي دخل فيهم هم الي يقولون
ويجي ولد اختي ابشري ياخاله : ولدك استشهد
قلت : قل آمين الله يشرفني فيه ويموت شهيد في سبيل الله
وانا ودي اصيح بغيت اجي الخنساء الاشوي بس ربي ستر
قلت رددوا معي ياشباب:
اللهم انصر الاسلام والمسلمين
اللهم انصر الاسلام والمسلمين
اللهم انصر الاسلام والمسلمين
آه ياغزة
:
:
:
وفي نهايه العزومه الي ماخلصت الا الساعه 11 ليلاً
قعدنا نرتب المكان الين الساعه 2 فجراً وكملنا الباقي الجمعه
:
ادري جاكم مغص وصداع بس تحملوا سماجتي انا ووغدي وشلته بعد
فمان الله

[ماجد]

حياالله حصه

يالسامجة هههههههههههههه

مغامرات العيال مافيه احسن منه
قال :لاوع ابي اصير تيس

ههههههههههههههههههههههههههه

يحقلوه هذا دور البطل


الله يخليلك البرنس حماده
ودمتى سالمة

[حيل حليل]

هههههههههههههه
اول شي عسى الله يخليهم لك ويتربون بعزك
الشي الثاني
انا بصراحه مازلت مصر على ان هذه الاجتماعات تخرب ما أصلحته السياسه
<<<<<<< مازال مصر على المشي عكس التيار
فلذلك ينبغي عليك توخي الحذر الشديد في هذه المسائل
لانها تؤدي الى نتائج لا تحمد عقباها
<<<<<< جالس يصخن يبي يصير من شلة المضيف العام

لكن حلوه سالفة ابصير تيس
بصراحه رجعتينا سنوات بموضوعك
ذكرتينا بأيام الابتدائي لانه كانت هوايتي معرفة اسماء امهات الزقرت
<<<<<< نذل منذ نعومة اظافره

عسى الله يخليهم لك ويتربون بعزكم ان شاء الله

[السنعوووسيه]

ههههههههههههههههههههههههه



ههههههههههههههههههههههه


ياربي رباه مايبي ذيب ويبي تيس ههههههههههه


ياحلو برائة الاطفال



حصه عزي لتس من الترتيب بعد ماراحو


شـكــ وبارك الله فيك ـــرا لك ... لك مني أجمل تحية .














عاطر ودي
*

[عبدالله الجعيثن]

.




.




حصيصه....!!! قط الميانه





ترى حتى البساسه تجيب وغدان








ذبحتينا انتي وهالطوط اللي عندك!!!










تدرين .... هم زينة الحياه...الله يخليه لعينن ترجيه

[أحمد]

ويجي ولد اختي ابشري ياخاله : ولدك استشهد
قلت : قل آمين الله يشرفني فيه ويموت شهيد في سبيل الله



بدون مزح واستهبال والله لو كل الامهات زي حصة ماراحت لافلسطين ولا العراق ولا اي دوله مسلمه ......


وبعدين لايهمك ياخالتي هذولا بزران الشرهه على شيبان اعمارهم فوق الخمسين مطعنين بعض لانهم عايشين الدور ويمثلون الزير سالم والله ان هالسالفه حقيقيه خخخخخخخخخخخخ

ربنا لاتزغ قلوبنا بعد اذ هديتنا


[align=center]
تري مكاسي حصه
[/align]

[غالب]

^^^^^
هههههههههههههههههههههههههههههههه تسيف بالخمسين ههههههههههههه
^^^^^^^^^^^^
حصيصه

ويجي ولد اختي ابشري ياخاله : ولدك استشهد
قلت : قل آمين الله يشرفني فيه ويموت شهيد في سبيل الله

ماني قادر أتخيل الوليد وهو متقطعه حفاظته ومنفجره رضاعته إثر إصابته بصاروخ
ههههههههههههه
يختي والله قلبي ماهو مريحن أحس إنتس تتكلمين عن حال عرب من هالعربان


واستلموا سلامي

[ابو خلوف]

ههههه اجل ماحلبوني



مشكوووره حصيصه

[ريتاج]

هههههههههههههههههههههههههههههههه

ذكرتيني بأخووي يووم يسووي عزييمه وانا ماادريت ان العياال عنده

وانا ادخل علييهم وانا كشه <<تووه قاايمه من النووم

لا عااد اقوول .. ابي قهووه ابي قهوووه0تقل شاايب


الا انا بووسطالبزراان واسلم علييهم كلهم وااخووي كاان يقهوويهم

واجلس عندهم واطاالع لاخووي بنظرره يعني صب لي قهووه ..هههههههههههه

والله وانا اقدع ولا رحت جبت الطحيينه ماا اكل تمر بدوونه وررجعت يمهم وفدعت بقهووتهم لميين طلع الحثل ههههههههههههههههههههههه

معهم مسدسات ام خرز

يااعسااهن ياا ألاااهي ينقطعن قطع يقطعهن كاانهن شووهني


هههههههههههههههههههههههههه


ما اداانييهن..



حصحووصه الله يخليلتس ورعتس


ويتربى بعزتس


شييييييييييييييييع

[منصور الغايب]

عسى الله يخليلك حمادة ..


حصة تدرين شنو اصعب شئ ..


لما تحاول تنزل لمستوى الطفل ...


صعب صعب جدا ..

وتنقد على روحك اذا شافك احد ..


بس انت ماشاء الله عليك

ما فشلت ولدك <<< هين الا والله قصيت وجهه

شكرا على الموضوع الحلو ...