ماجد يبي يعرس

**عجايب بنت الشايب** · 16-12-2008 18:45

سلام يااقااده

استغفر الله عنواني يذكرن

بموضوع

خالد يبي شوربه

ماعلينا

تخبرون مااااجد

العضو ( الله يعفو عنه )

لا ماسوا شيء

بس العفو زين على كل حال ..

يبي يعرس

>> استانسن يابنات فرجت

تورطت بوه وحده

الوكاد انه هالايام طلب منا حنا يابنات الفله (يالبا كبودنا ) أننا ننصحه

فأطلب من الأخوات الكريمات

تقديم النصائح .. المستقبليه وعرض المشاكل المتوقعه وبعض الحلول لها ..

سأبدأ بحكم ان لي خبره بالحياة ..

على فكره الحياة مالها خبره فيني

الأخ ماجد

مبروك عليك سعيك وجعلها الله سقيا بركه ..

أخي الكريم .. الممكلة العربية السعوديه بها 376 كلم مربع فارغه

نبيك ياطويل العمر تملاه بشر ( مخلوفات ناطقه )

الحياة تصعب أن صعبت وتسهل ان تسهلت >> فديت دكتورة الفلك انا

باعطيك بعض النقاط المهمه والبقيه على الاخوات

ياليت .. تبدأ حياتك بسعاده وفرح

شلون ؟ ؟

يوم العرس .. خل عقالك يضحك مثلاً

الناس بالعاده تعلق بالسياره أذكار وأدعيه وماشابه

انا ابيك هالفتره تعلق هالبيت الشعري

ياوجه التيس وش قومك // على أريش العين تزعلها؟

لأن بس تذكرك لوجه التيس

يعطيك إيحاء داخلي بعدم تزعيل المدام

فياليت تعلقها

من باب آخر ..

( باب جيراننا يعني ؟ ) >> لا باب الحريم

لا تنسى ماضيك الأليم بالشقه .. مع العيال

لذلك كل يوم احمد الله

ولا تقعد تتأفف من الأكل .. تبيه بسرعه

فأندومي ببيت الزوجيه أحلى من مفطح عند العيال بالشقه

شلون ؟

الأندومي تأكله على ارض نظيفه وريحه حلوه ووجهن حسن

والمفطح تاكله على فرشتن يابسه من الوصخ وريحة زقاير ووجيه عطايا

شفت الفرق

لذا لااااا تنفخ >> صورة واحد مدخل ثوبه بسرواله ومقدم رجل

أخواتي الكريمات المايك معكن فلتتفضلن مشكورات لا مأمورات

طحياتي ........,,

**منصور الغايب** · 16-12-2008 19:06

^
^
^

أنا أشهد أنه يبي ينخرب بيته لا سمع نصايحك ..

من قرد حظي كان حضوري الأول ..

**كلي حلا** · 16-12-2008 19:18

هاذي النصايح ياعجايب ولابلااااش

انا نصيحتي لك انك اول ماتخلصون من الاكل تروح تنظف المواعين بالمطبخ

بدل ماتقابل المنتديات والقنوات الفضائيه

يلا يابنات وين النصايح

**الشبث** · 16-12-2008 19:29

[align=center]
احب اضيف شي

هالحين بيت الشعر اللي قالتوه عجايب ليامنك كتبتوه

اكتب بالوجه الثاني للورقه هالبيت

ياعنز لا تبتسين والتيس موجود // ترى البكا يا عنز يثر على التيس

علشان تحس بوجودك معه قلبا وقالبا

وتقلد تحيتي
[/align]

**روح حايل** · 16-12-2008 19:39

ان سمعت كلامي يامويجد <<< تمون

ابي اطق بعرسكم ليما تنتفخ روسكم

اسمع وانا اختك ، المره ماينكسر خاطره الا من ثلاث

رجال شين وقوي عين / ولا العزايم اللي به 12 شخص فما فوق / ولا عدم التقدير والشكر لها في اي عمل تسويه

وتقول له / ماسويتي شي !!!!

عندها انتبه ترى ان قلتها تراك حطمت قلبها ، ولا تتوقع انها تسوي ازين من اللي سوت

مثل بعض الخلق الله يهديهم يحطم المره بزعموه تبي تجيب الأزين .....

وكن رغيغا معها .... امسح على راسها كما البسه .... وقل لها يابستي يابستي ...

صدقن تبي ترقعك بالقلايه

قصدي ترقعك بالحب والحنان وهلم جرا <<< ابكي على ماجرالي ياهلي انطربنا

والله يهدي سركم ومبروك مغدما .....

وعلمن وين قصركم عشان افخخ صالة الرجال

عجبجب فري متش ثانكيو

**ابو خلوف** · 16-12-2008 20:07

مويجد يب يعرس

ياحبي لوه

عقبالي انا وسناعيس للحين مالقينا خوات يتقبلننا

وكله منوه ولا انا يبوني بس الشكوى لله

بس ابي منك طلب واحد صغير

عندي سوالن محيرن منذ دهور

المعرس الجديد متى يصير معرس قديم ؟؟؟

وابو سلطان يقول يصير معرس قديم اذا صار مايحس انه معرس جديد

يعني ابيك تعلمن متى تحس انك معرس قديم

وشكرا

**..طيف الأمل..** · 16-12-2008 20:21

انا نصيحتي انه يدق له ثلاث غيرها ويصيرن بنفس العمر ويسكنهن ببيت واحد ولا بشقة وحدة بعد <<مانبي نكثر عليك ياماجد هههههههه

لا تحقدون علي
نيتي حسنة
نبي الشعب السعودي يكثر
غطو علينا الحضارم والبنقالية
صرنا المملكة البنقالية الحضرمية
الله يرحم الحال

**ماجد** · 16-12-2008 21:08

فأطلب من الأخوات الكريمات

تقديم النصائح .. المستقبليه وعرض المشاكل المتوقعه وبعض الحلول لها ..

الله كريم

سأبدأ بحكم ان لي خبره بالحياة ..

هاتي وش عندتس

على فكره الحياة مالها خبره فيني

يعني خذ وخل

الأخ ماجد

هلا

مبروك عليك سعيك وجعلها الله سقيا بركه ..

الله يبارك فيك وعسى ايامك ربيع

أخي الكريم .. الممكلة العربية السعوديه بها 376 كلم مربع فارغه

نبيك ياطويل العمر تملاه بشر ( مخلوفات ناطقه )

صارت ارنب مهي مره

الحياة تصعب أن صعبت وتسهل ان تسهلت >> فديت دكتورة الفلك انا

باعطيك بعض النقاط المهمه والبقيه على الاخوات

الله كريم

ياليت .. تبدأ حياتك بسعاده وفرح

سعاده وفرح منهن بناتوه

شلون ؟ ؟

يوم العرس .. خل عقالك يضحك مثلاً

شلون يعني اصير خبيل

تدرين .. لو تبيني اتزغلب عنده مافي اشكال

الناس بالعاده تعلق بالسياره أذكار وأدعيه وماشابه

انا ابيك هالفتره تعلق هالبيت الشعري

ياوجه التيس وش قومك // على أريش العين تزعلها؟

لأن بس تذكرك لوجه التيس

يعطيك إيحاء داخلي بعدم تزعيل المدام

اصير تيس ولايهمك

فياليت تعلقها

انقلعي

من باب آخر ..

( باب جيراننا يعني ؟ ) >> لا باب الحريم

اخلصي

لا تنسى ماضيك الأليم بالشقه .. مع العيال

افففففففففف لازم الاحراج

لذلك كل يوم احمد الله

ولا تقعد تتأفف من الأكل .. تبيه بسرعه

عاد اهم شي الاكل
ابيه برمشة عين

فأندومي ببيت الزوجيه أحلى من مفطح عند العيال بالشقه

العن خير ابو الاذلال

شلون ؟

الأندومي تأكله على ارض نظيفه وريحه حلوه ووجهن حسن

هذه الجنه الي يقولونه بس ليه اندومي

والمفطح تاكله على فرشتن يابسه من الوصخ وريحة زقاير ووجيه عطايا

عاشو الزقرت

شفت الفرق

وينوه

لذا لااااا تنفخ >> صورة واحد مدخل ثوبه بسرواله ومقدم رجل

لذا خليك على وقفتك >> صورة واحد مدنق يدور رضم

أخواتي الكريمات المايك معكن فلتتفضلن مشكورات لا مأمورات

فتحتي باب الله يستر منه
اقول تقل هونت ماني معرس

طحياتي ........,,

عجايب حياتس ربي
ويعطيك الف عافيه

**ريتاج** · 16-12-2008 21:11

انتبه ياوخيي من صفة البخل
...

لا تبخل على مريتك بشيين .. لا طلبت منك ميتيين اعطه خمس ميه ..

ولا طلبت الف اعطه الفيين

ولا طلبت 3 الاف اعطه عشر<< تبي تقعده على بسااط الفقر...

ولا تزقر ولا تخاانق ولا تعصب تفااهم خيوو ..

وبالتووفييتس لك في حيااتك الجدييده ..