ألفية الأسهم,,انشاد (عمر المنسلح )
http://arabsh.com/061vewf9f7lx.html
.
.
ألف : أولف وأول السـوق نسبـه
نسبة تحت ما عاد تحتـاج حسبـة
سوق ضربنا فوق عشرين ضربـة
والصبر زين إلا بسهـم المواشـي
والباء : بدينـا وأشترينـا وبعنـا
وياليتنـا فيمـا كسبـنـا قنعـنـا
طرنـا وتعلينـا ولـكـن وقعـنـا
والصبر زين إلا بسهـم المواشـي
والتاء : توقعنـا تزيـد المكاسـب
وقلنا نبي نشرب لذيـذ المشـارب
لكن ورطنا بيـن عـارض وطالـب
والصبر زين إلا بسهـم المواشـي
والثاء : ثبت عنـدي بعلـم يقينـي
اني خسرت وراح مـا فـي يمينـي
الله علـى تسديـد دينـي يعيـنـي
والصبر زين إلا بسهـم المواشـي
والجيـم : جمعنـا سهـوم كثيـرة
ولا درينـا أن الدعـاوي خطيـرة
حتـى خسرنـا والخسـارة كبيـرة
والصبر زين إلا بسهـم المواشـي
والحاء : حسافة يا جماعة فلوسـي
حطيتها بأسهـم وكسّـرت قوسـي
صحيح هالدنيا عطتنـا الدروسـي
والصبر زين إلا بسهـم المواشـي
والخاء : خلاص اقول توبه ولا أعود
لو كنت بالمكسب موصى وموعـود
وهذا قرار مـا علـي فيـه منقـود
والصبر زين إلا بسهـم المواشـي
والدال : دجينـا بسهـم المواشـي
نشريه غالـي ثـم نبيعـه بلاشـي
هذا جزاة اللـي شـرا بالخشاشـي
والصبر زين إلا بسهـم المواشـي
والذال : ذاك اللـي تسبـب علينـا
ويـلاه لـو انـه يطيـح بيديـنـا
من دون ذبحـه كلنـا مـا رضينـا
والصبر زين إلا بسهـم المواشـي
والراء : رمينا رميـة دون رامـي
وصابت وقلنـا حرفنـة ياسلامـي
السوق طيب لين جانـا الصرامـي
والصبر زين إلا بسهـم المواشـي
والزاي : زدنا يوم شفنـا المرابـح
وقمنا مع العالـم نزيـد المطابـح
ويمكن على بعض السهوم انتذابـح
والصبر زين إلا بسهـم المواشـي
والسيـن : سوينـا بهـا فاهمينـي
نشري نقول السوق بكـره يزينـي
نبغى المكاسب وأثرنـا خاسرينـي
والصبر زين إلا بسهـم المواشـي
والشين : شاري يومه السوق غالي
ما همنـي لـو زاد فيهـا ريالـي
لا والله الا راح بـاقـي حـلالـي
والصبر زين إلا بسهـم المواشـي
والصاد : صدق اللي سهمـا منـول
حول ميه وسبعيـن واليـوم حـول
ينـزل الـى ستيـن شـي يهـول
والصبر زين إلا بسهـم المواشـي
والضاد : ضاربنا بسهـم الفنـادق
لكن رمونـا مثـل رمـي البنـادق
حتـى زبنـا بالحفـر والخـنـادق
والصبر زين إلا بسهـم المواشـي
والطاء : طمرنا طمرة دون داعـي
نبغى النسب بالباحه أو بالجماعـي
واليـوم يكفينـا حليـب المراعـي
والصبر زين إلا بسهـم المواشـي
والظاء : ظلمني من نصحني بتعمير
ويقول لي هذا السهم مكسبـه غيـر
وانا مطبح فيـه مـن دون تفكيـر
والصبر زين إلا بسهـم المواشـي
والعين : عيـوا يرفعـون المؤشـر
يمكن سياسـة سـوق لازم يخسـر
كم واحد مـن ذا المؤشـر مدمـر
والصبر زين إلا بسهـم المواشـي
والغيـن : غيّـر يالمحافـظ وبـدل
موضوعنا حلـه وبالسـوق عـدل
نظامكـم مـا هـو كتـاب منـزل
والصبر زين إلا بسهـم المواشـي
والفاء : فتيحي مشترينـه بطمعـه
لكن جانـا منـه عشريـن قمعـه
ما اظن يستاهـل حسابـه وجمعـه
والصبر زين إلا بسهـم المواشـي
والقاف : قالوا بكره السـوق يرتـد
والوضع اشوفه كـل يـوم يتعقـد
مقرود يامن طـاع شـور المقـرد
والصبر زين إلا بسهـم المواشـي
والكاف : كافي يا وزيـر التجـارة
خمسيـن بالميـه علينـا خسـاره
ان كان تفهـم فـي فنـون الاداره
والصبر زين إلا بسهـم المواشـي
واللام : لبنى يوم أغارت بلا خيـل
خذت بسطوتها سهـوم الرجاجيـل
وخلـت مدامعهـم تبـل المناديـل
والصبر زين إلا بسهـم المواشـي
والميم : ما تنفـع سهـوم العوايـد
خسرانة ومـا عـاد فيهـا فوايـد
الفايـده بالكـاش لا صـار زايـد
والصبر زين إلا بسهـم المواشـي
والنون : نادوا من يعرف السلومـي
وقولوا توجه يـم شيـخ القرومـي
يحلهـا لا صـار وقـت اللزومـي
والصبر زين إلا بسهـم المواشـي
والهاء : هروج كـل يـوم تعـادي
كـل يسـوي فاهـم ٍ واقتصـادي
ياطيبكم عنـد العشـاء والمنـادي
والصبر زين إلا بسهـم المواشـي
والواو : وهقنا المسمـى ابراهيـم
يقول انـا بقلـب جميـع المفاهيـم
ياعزتيـلـه علـقـوه الشغامـيـم
والصبر زين إلا بسهـم المواشـي
والياء : ياربي طالبك ترحم النـاس
وان تنتقم يارب من فعل الأنجـاس
ولا باس ياللي صابه الهم لا بـاس
والصبر زين إلا بسهم المواشي ..!!
رد مع اقتباس
المفضلات